Hargeysa, 25 January, 2012 (SLpost)- Xukuumadda Somaliland ayaa ka hadlay dagaal maanta ka dhacay deegaan ka tirsan Gobolka Buuhoodle kaas oo malleeshiyada nabad-diidka Buuhoodle weerar gaadmo ah ku soo qaadeen ciidamada Qaranka ee ku sugan aaggaas, isla markaana shaaciyey khasaaraha ay u geysteen malleeshiyadaas weerarka ku soo qaaday ciidamada Qaranka.
Agaasimaha Guud ee Wasaaradda Warfaafinta Md. Faysal Cali Sheekh oo caawa shir-jaraa’id ku qabtay xarunta wasaaradda Warfaafinta, ayaa sheegay in abaaro 3:30 galabnimo ee maanta weerar lagu soo qaaday ciidamada Qaranka isla markaana dhirbaaxo kulul lagu qaabilay maalleeshiyadii duullaanka ku soo qaadday ciidanka, firxadkoodiina la gaadhsiiyey ilaa magaalada Buuhoodle.
“Dagaalku wuxuu bilaabmay 3:30-kii waxaanu joogsaday makhribnimadii Caawa. Waxa ciidanka Qaranka ee jiidda Buuhoodle soo weeraray malleeshiyo ay wataan kooxda fidmo-wadayaasha ah ee dhawaanahanba ku shirayey deegaanka Taleex,” ayuu yidhi Agaasimaha Guud ee Warfaafintu, isaga oo hadalkiisa raaciyey, “Ciidanka Qaranku waxay malleeshiyadii weerarka soo qaadday gaadhsiiyeen khasaare culus oo ciidanka qaranku ku baacsadeen ilaa magaalada,” ayuu yidhi Agaasimuhu.
Agaasimaha Warfaafintu waxa uu ka gaabsaday inuu xuso khasaaraha dhabta ah ee soo gaadhay ciidanka qaranka isaga oo sheegay inay gadaal ka soo sheegi doonaan wixii khasaare ah ee jira.
Dhinaca kale, wararka ka imanaya magaalada Buuhoodle ayaa sheegaya in cusbitaalka magaaladaas la geeyey meydadka 7 maleeshiyo-beeleed iyo dhaawaca 5 kale in kasta oo wakhtiga dagaalku joogsaday oo habeen noqotay awgeed aan la heli Karin maydadka iyo dhaawacyada maleeshiyo-beeleedka.
Dhanka ciidanka Qaranka ilaa hadda lama shaacin tirada dhabta ah ee Dhimashada iyo Dhaawaca, haddana sida ay wararku sheegayaan, waxa weerarkaas gaadmada ah ku dhintay laba Askari oo saarnaa mid ka mid ah baabuurta Saadka ee Ciidanka oo Malleeshiyadu gacanta ku dhigtay kaas oo ay ula baxsadeen dhanka magaalada Buuhoodle.
Dagaalka ka dhacay duleedka degmada Buuhoodle ayaa ku soo beegmay wakhti maanta ay booqasho ku tageen magaaladaas wakhti culus oo ka socda xubno qawlaysato ah oo dhawaan maamul-goboleed kaga dhawaaqay magaalada Taleex ee gobolka Sool kuwaas oo iyaga oo wata maleeshiyo-beeleedyo ku hubaysan noocyada kala duwan ee hubka, dhuumaalaysi ku galay magaalada Buuhoodle.
Maaha markii ugu horreysay ee Malleeshiyo-beeleedka nabadiidka ah ee Buuhoodle ay weerar gaadmo ah ku soo qaadaan ciidamada qaranka Somaliland balse waxa jiray tirada dhowr jeer oo ciidanka weerarro gaadmo ah lagu soo qaado dabadeedna ay malleeshiyadu u baxsato oo ay gabbood ka dhigtaan dadka shacabka ah.
SOMALILANDPOST NEWS
webmaster@somalilandpost.net