Hargeysa/Gabiley (SLpost)- Allaah ha u naxariistee Taliyihii Ciidanka Booliska Saldhigga deegaanka Arabsiyo Cabdi Ismaaciil Cigaal (Cabdi-Case), ayaa mar dhawayto ku geeriyooday Cusbitaalka guud ee magaalada Hargeysa oo lagu dawaynayey dhaawiciisa, ka dib markii gelinkii hore ee Salaasada Maanta uu magaalada Gabiley ku toogtay mid ka mid ahaa Askarta Saldhigga Arabsiyo.
Dhaawaca Marxuumka oo isla maanta la soo gaadhsiiyey Cusbitaalka guud ee magaalada Hareysa, ayaa lagu sameeyey qalliin lagaga badbaadinayey Rasaasta uu Askarigaasi ku riday oo qaarkood fadhiisteen jidhka dhexdiisa.
Taliyaha Booliska Somaliland Cabdillaahi Fadal Iimaan, ayaa BBC-da u sheegay in Allaah ha u naxariistee uu Marxuumku mar dhawayd oo shantii galabnimo oo daqiiqado ka dhiman yihiin ahayd uu geeriyooday, isagoo xusay in dhaawiciisu cuslaa.
Qaab Noocee ah ayuu Dilka Taliyuhu u dhacay?
Maayerka magaalada Gabiley ahna Guddoomiyaha Golaha Deegaanka ee degmadaas Shucayb Maxamed Muuse, ayaa sharraxaad ka bixiyey qaabka ay u dhacday Toogasho uu ku dhaawacay Taliyaha Booliska Degmada Arabsiyo Askari ka tirsan Saldhiggaasi gudaha magaalada Gabiley gelinkii hore ee maanta.
Waxa uu Duqa Gabiley sheegay in Askari ka tirsan Ciidanka Saldhigga Booliska degmada Arabsiyo ee gobolka Gabiley uu gelinkii hore ee maanta ku toogtay gudaha magaalada Gabiley, isagoo ku dhuftay shan xabbadood oo dhaawac culus soo gaadhsiiyey Taliyihii Saldhiggaas Cabdi Ismaaciil Cigaal (Cabdi-Case) sida uu sheegay Maayerku.
Waxa isla markiiba ciidanka Booliska Gabiley ku guulaysteen inay qabtaan oo ay gacanta ku dhigaan Askariga shanta xabbadood ku dhaawacay Taliyihiisa sida uu xaqiijiyey Taliyaha Booliska Somaliland Sarreeye Guuto Cabdillaahi Fadal Iimaan.
“Waxaa halkan ka dhacay Maanta Taliyihii Saldhiga Arabsiyo, Cabdi Ismaaciil Cali (Cabdi-Case), ayuu Askari kale oo isla Saldhigga Arabsiyo ahi 5 Xabbadood ku dhuftay oo dhabarka iyo Caloosha kaga soo dhuftay, waxaanu Illaahay uga baryaynaa inuu Caafimaad siiyo.” Sidaa ayuu yidhi Maayerka Magaalada Gabiley Shucayb Maxamed Muuse oo markii toogashadaasi dhacday ka dib Warbaahinta kula hadlay isla Gabiley.
Duqa Degmada Gabiley Mr. Shucayb oo hadalkiisa sii wataa waxa uu intaas ku daray oo uu yidhi; “Askarigii falkaas geystayna markiiba gacanta ayaannu ku dhignay, Dhaawacana si Qaliin deg-deg ah loogu sameeyo ayaanun hadda u qaadnay dhinaca Cusbitaalka Caasimadda Hargeysa.” Lama Oga Sababta dhabta ah ee Askarigu toogashada badheedhka ah ugu gaystay Taliyaha balse waxaa la sheegayaa in Dacwadi ka dhexaysay Askariga iyo Taliyaha islamarkaana sidaasi isula tageen Gabiley.
Taliyaha Booliska Somaliland Cabdillaahi Fadal Iimaan, oo isaga iyo Wasiirka Caafimaadku ay Warbaahinta kula hadleen Cusbitaalka guud ee magaalada Hargeysa markii dhaawaca Taliyaha la soo gaadhsiiyey ee dawada loo bilaabay ka dib, ayaa Warbaahinta u sheegay in Askariga toogashada xaq-darrada ah u geystay Tiliyihiisii ay gacanta ku hayaan, isla markaana sida ugu dhaqsaha badan Sharciga loo horgeyn doono.
Taliyaha Booliska oo ka hadlay
Sarreeye Guuto Fadal oo maanta warbaahinta la hadlay, ayaa xaqiijiyey geerida Marxuumka, waxaanu sheegay in si degdeg ah Maxkamadda loo horkeeni doono Askariga dilka Taliyihiisii u geystay oo ay Ciidanka Ammaanku gacanta ku hayaan. Waxaanu Tacsi u diray qoyska, Ehelada, Qaraabada, Asxaabta, Ciidanka Booliska iyo guud ahaanba Qaranka Somaliland ee uu Taliyahaasi ka baxay, Marxuumkana waxa uu Allaah uga baryey inuu u naxariistay.
SOMALILANDPOST.NET