Kabul (SLpost)- Dawladaha muddada dheer xulafada ahaa ee Maraykanka iyo Afghanistan, ayaa xilligan si adag isugu khilaafsan masiirka maxaabiis Daalibaan ah oo lagu hayo xabsiga weyn ee Bagram ee oo hore ciidammada Maraykanku gacanta ugu hayn jireen, balse xukuumadda Afgaanistan hadda maamusho.
Dawladda Afganistan ayaa qorshaynaysa sidii loo sii dayn lahaa 72 maxbuus oo Daalibaan ah, kuwaasoo loo arkay in aanay halis ku ahayn ammaanka iyo xasiloonida, balse dalka Maraykanka, ayaa arrintaas aad uga soo horjeeda, kaasoo maxaabiistaan u aqoonsan argagixiso khatar ah oo aan sinaba loo cafin Karin.
“Ma ogolaan doono in muwaadiniin Afganistan ah oo aan wax dambi ah lahayn in lagu hayo xabsiyada oo ay bilo ama sannado iskaga jiraan, iyadoo aan wax dacwad ah lagu oogin, markaas sabab la’aan uma xidhnaan karaan.” Sidaa waxa wakaallada wararka ee Reuters u sheegay Afhayeenka madaxweynaha dalka Afganistan, kaasoo intaas ku daray; “Waanu ognahay in nasiib-darro arrimahani ka dhacaan xabsiga Bagram, laakiin arrintaasi waxay xad-gudub sharci iyo sharaf dhac ku tahay qaranimada dalka Afghanistan.
Hasayeeshee, dawladda Maraykankan ayaa diidmo culus kala hortimi dalabka xukuumadda Afghanistan ku doonayso in lagu sii daayo maxaabiista la aaminsan yahay inay Daalibaan ka tirsan yihiin ee ku jira xabsiga weyn ee Bagram, arrintaasoo muran xooggan ka dhex abuurtay labada dal ee Maraykanka iyo Afghanistan.
Haweenay afhayeen ah oo u hadashay xukuumada Maraykankanka oo la yidhaah Jen Psaki, ayaa saxaafadda u sheegtay in 72-ka maxbuus ee dawladda Afghanistan doonayso inay ka sii dayso xabsiyadu yihiin qaar khatar ah, loona baahan yahay in aan wax xoriyad ah la siin. “Maxaabiista dhan 72-ka ee dawladda Afghanistan xoriyadda siinayso waa qaar khatar ah oo cadaymo xooggan loo hayo inay yihiin argagixiso xidhiidho la leh dambiilayaal ku shaqaysan jiray qaraxyadda, kuwaasoo dilay dad aad u badan oo rayid ah,” ayey tidhi gabadha u hadashay dawladda Maraykanka.
Waxa kale oo dawladda Maraykanku sheegtay in waqtigu timaami doono xad-gudubyada ay gaystaan haddii maxaabiistaas la siidaayo, kuwaasoo laga shaki qabo inay khalkhal ku beeraan heshiishka dhinaca ammaanka la xidhiidha ee la filayo in Maraykanka iyo Afghanistan kala saxeexdaan, iyadoo ciidamada ugu badan ee Maraykanku ka bixi doonaan Afghanistan dhammaadka sannadkan 2014.
Dhinaca kale, general u dhashay dalka Maraykanka oo ah taliyaha ciidammada NATO ee ku sugan waddanka Afghanistan, Gen. Joseph Dunford, ayaa si rasmi ah u diiday in la sii daayo maxaabiista ka tirsan Daalibaan ee ku xidhan jeelka weyn ee Bagram, kaasoo tilmaamay in heshiiskii la kala saxeexday markii dawladda Afghanistan lagu wareejiyey xabsiga Bagram aanay ku jirin in la sii daayo maxaabiista ku jirta, iyadoo xilligaas lagu heshiiyey in maxaabiista khatarta ku ah ammaanka Afghanistan iyo beesha caalamka ee ku jira jeelkaas aan la siidayn, laguna maamulo shuruucda u yaal dalka Afghanistan.
Kulan Khamiistii toddobaadkan dhexmaray madaxweynaha Afghansitan iyo madaxa Sirdoonka dalkaas, ayaa layskula isla qaatay in 16 maxbuus oo qudha oo ku jira jeelka Bagram loo hayo cadaymo muujinaysa inay khatar yihiin, balse 72 maxbuus oo jeelkaas ku jira aan loo hayn wax muujinaya inay amniga khatar ku yihiin, loona baahan yahay in xoriyada loo celiyo, iyadoo la rumaysan yahay in tallaabadani sii xumayn karto xidhiidhka aan xilligan fiicnayn ee u dhexeeya dalalka Afghanistan iyo Maraykanka.
SOMALILANDPOST.NET