Hargeysa (SLpost)- Wasiirkii Hore ee Wasaaradda Maaliyada Somaliland Eng Maxamed Xaashi Cilmi, ayaa Xukuumadda Madaxweyne Siilaanyo ku eedeeyey inay hab-dhaqan shuruucda dalka ka baxsan kula dhaqmayso isla markaana kaga jawaab-celinayo dhaliilaha maamulkeeda loo jeediyo iyo qorsheyaasheeda ololeysan ee ay mar kale ku doonayso inay hoggaanka dalka gacanta ku sii hayso.
Maxamed Xaashi Cilmi oo xiligan ka mid ah siyaasiyiinta ku bahowday Madasha Wadatashiga iyo Toosinta Qaranka, waxa uu si adag ugu dhaliilay xukuumadda tallaabada ay u martay xayiraadda xarumaha warbaahineed ee Wargeysyada dalka qaarkood.
Maxamed Xaashi Cilmi waxa uu arrimahan ka hadlay shir-jaraa’id oo ay maanta qabteen siyaasiyiinta Madasha Wada-tashiga, waxaanu ugu horreyn ka hadlay Xayiraadda Xukuumaddu ku riddey Wargeyska Haatuf.
“Inaga oo ictiraaf raadinayna, inaga oo ay ahayd inaynu sharciga ku dhaqano, inaga oo ay ahayd inaynu Soomaalida kale kaga duwanaano oo aynu tusno wanaaggeena iyo sidaynu halgankeena ku soo marnay; isaga oo madaxweynuhu ahaa gudoomiyihii ugu mudada dheeraa intii halganku socday, maanta lagama filayn xukuumada madaxweyne Siilaanyo inay xaq-darro xalaashadaan, waxay ahayd haddii jariirad wax laga sheegayo in ninkii qoray maxkamadda la geeyo oo uu ka dacwiyo wixi lagu helana lagu qaado, jariiraddana in marna la xidho may ahayn, waayo jariirada dad ayaa ka shaqeeya,” ayuu yidhi Maxamed Xaashi, waxaanu intaas ku daray, “Nin durbaan qaatay cilaaq dalbay ayaa la yidhi marka uu ninku madaxnimo u baxo oo uu xil ummadeed qaado inuu yidhaa cidbaa wax I tidhi maaha, waa la odhanayaa waana lala xisaabtamayaa, wixii ay xumeeyeen ayaa la sheegayaa, jaraa’id ayaa sheegaya oo dadka ayaa sheegaya. Waa la xukumay oo ninkii arrintan loo haystay maxkamadba lama marin maaha wax sharciya, mana aha wixii aynu maanta ku kici lahayn.”
Maxamed Xaashi Cilmi waxaa uu sidoo kale ka hadlay qaabka ay u dhaqmaan ciidamada RRU-da xilliyada habeenkii, waxaanu yidhi, “Maanta waxaynu u baahan nahay inaynu tusaale fiican noqono oo wixii ina soo maray aynu ka nasano mana aha inaynu mid kale galno oo RRU-du kolba aqal jabiso oo dadka loo dhaco habeenkii, dadkana layska xidh-xidho, waxaasina waa wax inaga fogaynaya aqoonsigii aynu raadinayey.”
Maxamed Xaashi waxa uu intaas raaciyey hadalkiisa, “Nasiib-darrada ugu waynina waxa weeye raggii ina Siyaad Bare ku dhaliilayey inay xaq-darro ku kaceen oo aynu ka dagaalanay oo aynu ku ridnay inay iyagii galaan waa nasiib daro wayn, waxaanan leeyahay madaxweynaha waa in si dhakhso ah loo sii daayo jariiradaha xidhan, wixii ka baaqdayna dawladdu ha bixiso iyadaa gashay danbigaase,” sidaas ayuu yidhi Maxamed Xaashi Cilmi.
SOMALILANDPOST.NET