Hargeysa (SLpost)- Urur weynaha UMAD oo ka shaqeeya horumarinta adeegyada bulshada ee waxbarashadu ugu horrayso iyo iskaashiga bulshada ayaa caawa xaflad xil wareejin ah u qabtay gudidii lixaad ee ururkaasi doorto illaa iyo markii la aas’aasay 2009-kii.
Xafladdan xilwareejinta ah oo ka dhacday Imperail Hotel ee magaalada Hargeysa ayaa waxa ka soo qaybgalay inka badan xubnood oo isugu jira aqoonyahanka, dhalinyaradal, haweenka, culimada, waxgaradka, madaxdhaqameedka iyo xubno masuuliyiin ah oo ka soo jeeda beesha Makaahiil Isaxaaq ee degta koonfurta iyo woqooyiga Hargeisa iyo degmada Bulaxaar ee gobolka Saaxil.
Gudida xilka wareejinaysay ee uruenrka UMAD ayaa waxay soo bandhigeen waxqabadkii ururka mudadii ay xilka hayeen iyagoo sheegay inay waxbadan ka qabteen gaar ahaan dhinaca waxbarashada, abaabulka iyo isku xidhka bulshada, waxanay xuseen deegaannada Abaarso, Harcadaad, Waddo-makaahiil, Balligacas iyo Bulaxaar oo ay dhinaca waxbarashada waxka qabteen, sidoo kale waxay sheegeen inay aad uga shaqeeyeen walina ay wadaan dadaallo ku aadan xoojinta isku xidhnaansha iyo wadajirka qaybaha bulshada ururkan ku abtirsa si waxbadan looga qabto baahiyaha aas’aasiga ah ee bulshada, waxbarashada, caafimaadka, biyaha, kobcinta dhaqaalaha iyo dhinaca siyaasadda.
Waxa ugu horayn ka hadlay xafladda Xasan Sh Maxamuud Sh Suufi oo ka tirsan gudida UMAD isagoo dadka ka soo qaybgalay xafladda u sharraxday ahdaafta iyo ujeedooyinika waxqabad ee ururka. Guddoomiyaha xilka wareejinay Daaxa Axmed Ismaaciil ayaa isaguna ku dheeraaday waxqabadkii ururka mudadii uu xilka hayay, una mahadceliyay dhammaan shakhsiyaadkii iyo xubnihii ururka ee gacanta ka gaystay ama garab taagnaa, waxa kale oo uu sheegay inuu ururku aad isugu xidhay dadka u dhashay deegaanada ururku ka hawlgalo ee beeshaasi degto ee wadamo badan oo dibadda ah ku dhaqan. ir
Xildhibaan Maxamed Xaaji Cabdi oo ka tirsan Golaha Guurtida Somaliland oo eray ku lahaa xafladda ayaa ka hadlay muhiimadda uu u leeyahay isku xidhnaanshaha iyo wadajirku horumarka bulshada, waxanu usoo jeediyay dadweynihii ka soo qaybgalay xafladda in xoog looga shaqeeyo iskaashiga iyo dhaqaale ururin si wax looga qabto baahiyaha mudnaanta ee bulshada haysta.
Suldaan Maxamuud Siciid Maxamed ayaa isaguna usoo jeediyay bulshada uu suldaanka u yahay inay iyagu isku tashadaan oo aanay cidnaba waxka sugin kana wada shaqeeyaan sidii ay dadkooda iyo deegaannadooda wax uga qaban lahaayeen.
Waxa kale oo ka mid ahaa xubnaha iyo gudida ka hadashay xafladda ee ururka UMAD Axmed Xaashi Cilmi oo ah wakiilka ururka UMAD ee dalka Norway kaasoo ku hadlay afka qurbajoogga, Sh Axmed Dayib, Sh Yuusuf Waraabacadde, Faysa Maxamed, Cabdillaahi Ileeye iyo xubno kale.
Dhinaca kale, Axmed Xaashi Cilmi oo ka tirsan qurbajoogga Somaliland ee dalka Norway, isla markaana ah Wakiilka Norway ee ururka UMAD ayaa guddoon siiyay qalab kamarado ah oo jaaliyadoodu ugu soo deeqeen hawlaha ururku qabto.
Ugu dambayntii waxa ururka xafladdan qabtay uu shahaado sharafyo ku maamuusay xubno ka tirsan oo kala ahaa Axmed Xaashi Cilmi, Faadumo Garaw, Faysa Maxamed iyo Saynab Aw Maxamed kuwaasoo ay sheegeen inay ku mutaysteen waxqabad iyo dadaal dheeraad ah oo ay la yimaadeen.
Magacyada gudida cusub ee UMAD ee xilka lagu wareejiyay:
1. Cabdiraxmaan Xasan Aadan Askar (Cadduur), Guddoomiye
2. Axmed Daauud, Guddoomiye ku xigeen
3. Cabdillaahi Maxamed Colaad, Xoghaye