Hargeysa (SLpost)- Kulan ujeeddadiisu tahay kor-u-qaadista wada-shaqaynta iyo xidhiidhka labada waddan ee Somaliland iyo Sweden, ayaa maanta ku qabsoomay magaalada Hargeysa.
Kulanka ayaa dhexmaray Wasiirka Arimaha Gudaha Somaliland Maxamed Kaahin Axmed oo uu weheliyo Agaasimaha Guud ee Wasaaraddaas Maxamed Yusuf Ismaaciil iyo Safiirka Dowlada Sweden u qaabilsan Jamhuuriyadda Somaliland iyo Somaliya, Ambassador Per Lindgärd iyo Wefti uu hogaaminayo oo socdaal ku yimi dalka.
War-saxaafadeed lagu faahaahiyey arrimaha lagaga hadlay Kulanka oo ka soo baxay Wasaaradda Arrimaha Gudaha Somaliland, ayaa u qornaa sidan:- “Kulankan oo ka qabsoomay Xafiiska Wasiirka Wasaaradda Arimaha Gudaha JSL Maxamed Kaahin Axmed, waxaa lagaga wada hadlay xidhiidhka labada dal ee Jamhuuriyadda Somaliland iyo Dawlada Sweden, iyadoo Dawlada Sweden ay ka mid tahay saaxibada Somaliland, xidhiidh aad u sareeyaana ka dhexeeyo labada dal.
Intii uu socdey kulankani waxaa lagaga wada hadlay arrimaha nabadgelyada, guud ahaana nabada Mandaqada Geeska Afrika, iyadoo Safiirku ka dareen celiyey nabadgelyada ka jirta Somaliland iyo horuumarka ka socda dal, kaasoo dhinac walba leh, iyadoo kulankan la iskula qaatay xoojinta xidhiidhka labada dalka, iskaashiga dhinaca nabadgelyada iyo fududaynta isu-socodka labada dal, taasoo ah mid muhiim ah labada dhinac.
Safiirka ayaa u mahadnaqay Wasiirka Arrimaha Gudaha JSL, Maxamed Kaahin Axmed, sida uu u soo dhoweeyey, iyadoo ay Safiirka ay wehelinayeen Saraakiil sar sare oo ka socda Dawlada Sweden, dhinaca kale Wasiirka waxaa kulanka ku wehelinayey Agaasime Guud ee Wasaaradda Arimaha Gudaha iyo madax kale oo ka tirsan Wasaaradda Arimaha Gudaha, iyadoo kulanku ku soo dhamaaday isfaham iyo jawi aad u fiican,” sidaas ayaa lagu sheegay warka ku saabsan kulanka dhexmaray labada dhinac.
Somalilandpost.net
contact@somalilandpost.net