Hargeysa (SLpost)- Xisbiga mucaaradka ah ee WADDANI, ayaa maanta kulan aad u qiimo badan oo is xogwaraysi ah magaalada Hargeysa kula qaatay dad naafo ka ah dhinaca Araga oo ka kala yimi dhammaan goballada Somaliland.
Waxaana kulankan ka soo qeyb-galay Hoggaamiyaha Xisbiga WADDANI Md.Xirsi Cali X.Xasan, xoghayaha guud ee Xisbigaasi Md.Maxamed Cabdillaahi Uurcadde, guddoomiyaha gobalka ee Xisbiga WADDANI Siciid Bustaale, Xoghayaha gobalkaasi iyo weli ba sida oo kale Xuseen Asad oo isna ka tirsan guddida fulinta Xisbiga WADDANI.
Cabdiraxmaan Sheekh Xuseen oo Xisbiga WADDANI u qaabilsan Waaxda Naafada, oo ugu horreyn halkaas ka hadlay, ayaa sheegay in uu si aad ugu faraxsan yahay kulankaasi, waxaana uu yidhi:“Aniga oo Xisbiga u qaabilsan Waaxda Naafada, sida oo kale na sidii na aan araga waxba ka arag in aan aniga iyo Xisbigaygii oo ay i garab joogaan mas’uuliyiintii ugu sar-saraysay Xisbiga oo uu hoggaaminaayo hoggaamiyaha Xisbiga Xirsi Cali X.Xasan, Xoghayahii guud ee WADDANI iyo kuwii gobalka ba, waan uga mahadcelinayaa madaxdayda sida dhakhsaha badan ee ay uga soo jawaabeen codsi uga yimi ururka Indhoole yaasha ee SOBA oo fadhigiisu yahay Hargeysa. Naafadu guud ahaan iyada oo u kala baxda mid jidh ahaana iyo mid maskax ahaana ba waxa Xisbiga WADDANI isaga oo dareensan uu baahiyaha ku xeeran uu iyo qoyskasta culayska ka haysta dadka ka naafoobay ee aanay jirin cid ka caawisa in Xisbigu uu sameeyey garab u gaara Naafada, kulankana ma noqon doona kii ugu dambeeyey isha Allahu sidaas baynu mar walba u wada xidhiidhi, wixii karitaan ah ee la idin tari karana waxba idin kala hagran mayno.”.
Qaar ka mid ah indhooleyaashii iyagu na halkaas ka hadlay, ayaa waxa ay yidhaahdeen “Waanu ku faraxsanahay in kulankan ay nala qaateen Madaxda WADDANI oo si deg dag ah nooga ga soo jawaabay codsigii aanu u gudbinay, waxa farxad noo ah in dhammaantayo aanu maanta yididiilo ka muujinayno sida Xisbiga WADDANI uu noo dareen galiyey ee uu naruurada nooggu abuuray sida oo kale na aanu ugu soo hiranayno, garabkaas uu Xisbigu u sameeyey naafada oo aanu ka maqalnay Warbaahinta, awgeed baanu Xisbiga ku nimi.”.Ayey yidhaahdeen Indhooleyaashii halkaas ka hadlay.
Ugu dambeyn, Hoggaamiyaha Xisbiga WADDANI Xirsi Cali X.Xasan oo isna halkaas ka hadlay, ayaa sheegay in uu si aada ugu faraxsan yahay kulankan ay ka xisbi ahaan la yeesheen ururka indhooleyaasha ee SOBA, waxaana uu carabka ku dhuftay in dhammaan ba ay wixii awoodooda ah kala qeyb-qaadanayaan baahiyaha kala duwan ee ay u soo gudbiyeen dadka Indhooleyaasha ahi,
“Waxa runtii mahadcelin ballaadhan aan siinayaa dedaalka badan ee ay sameeyeen ururkan indhoole yaasha ah ama naafada indhaha ka ah ee SOBA, runtii dedaal badan ku sameeyey in ay iyagu na is urursadaan sida oo kale na ay nafahooda wax taraan, wixii kale ee ay diiwaan-gelin karaan ee dadka kale ee indhaha naafada ka ahna ay ku dedaalaan aad bay ugu mahadsan yihiin, waad mudan tihiin runtii in wax la idin taro iyo in la iskiin garab taago, xafiiska hawshiisa na waanu idin kala qeyb-qaadanaynaa oo waanu isku tagaynaa guddoomiyaha Xisbiga iyo Murashaxii ba, waana aanu idin ka bixinaynaa wixii kiro ah oo waad ku tallo-galaysaan, wixii kale ee kolba awoodayadu tahay na waa la idin la garab galayaa, tii hore ee la idiin qabtay na xaq baad u lahaydeen oo Illaahay baa Subxaanahu Wa-tacaalaa ye mahad ku leh in uu na karsiiyey madaxweynahii aanu la shaqeynaynay so kadii.”.Ayuu yidhi Xirsi Cali X.Xasan
Hoggaamiye Xirsi oo sida oo kale hadalkiisa sii wata, ayaa waxa uu yidhi: “Qofka bani Aadamka ahi mar haddaanu qalbiga waxba ka qabin mushkilad maaha naafada kale oo waa mid aad ka soo kaban kartaan, siddaa Cabdiraxmaan wax u bartayna waxa uu idii noqon karaa tilmaansi aad, sidaa uu wax u bartay u barataan, shaqooyinka uu u galo, waxyaalaha kala duwan uu u bartay, ururada kala duwan uu u sameynaayo ee uu dunida u kala gooshaayo, ayaad idin ku na gaadhi kartaan, waayo dawladaha Ingiriiska oo kale waxa jiri jiray nin wasiir ah oo indho la’ oo gaadhay halkii ugu sarreysay, waxa kale ood og tihiin caalimkii sheekh Ibnu Baas oo ahaa muftigii ugu sarreeyey dawladdii Sucuudiga ama caalamul Islaam ka ahaa dadka loo daba fadhiisto diinta ahaa. dad badan oo araga naafo ka ahaa ayaa meelo sare ka gaadhay cilmiga, idin kuna waad gaadhi kartaan meel kasta oo qof bani Aadam ahi gaadha ba.”.Ayuu yidhi Hoggaamiyaha Xisbiga WADDANI