Hargeysa, 02 February, 2012 (SLpost)- Taliyaha Guud ee ciidamada Qaranka Jamhuuriyadda Somaliland Jeneral Maxamed ayaa ka warramay sababaha uu ku bilaabmay dagaalkii ka qarxay magaalada Buuhoodle isla markaana meesha ka saaray inay ciidamada Qaranka ay si toos ah ugu lug lahaayeen dagaalksaas.
Taliyuhu waxa uu iftiimiyay sababta ay u baaqatay xuskii loo samayn jiray munaasibadan, taas oo uu ku tilmaamay in xeer milateri jidaynayo in taliyaha ciidanka qaranku haddii aanay mudada xil hayntiisu gaadhin Lix bilood ka warami Karin ciidanka qaranka waxaanu xusay inay jiraan fadhiisimo badan oo aanu soo marin mudadii koobnayd ee uu xilka taliye-nimo ee ciidanka qaranka hayay isagoo intaas ku daray in sannadka soo socda ay weynayn doonaan munaasibada aasaaska ciidanka qaranka, waxaanu farriin hambalyo ah u diray dhammaan ciidamada Qaranka iyo xaasaskooda. “Maadaama ay maanta tahay sannad-guuradii sagaal iyo tobnaad ee aasaaska ciidamada Qaranka Jamhuuriyadda Somaliland, waxaan halkan hambalyo iyo bogaadin uga dirayaa ciidamada jamhuuriyadda Somaliland, carruurahooda iyo xaasaskooda. Illaahay waxaan uga barayayaa inuu cimri dherer iyo bash-bash sannadka cusub ay ku noolaadaan, qaranka dadka reer Somaliland-na mid taas la mid ah ayaan u dirayaa dhammaan gobollada Somaliland, haddy Sool tahay, hadday Buuhoodle tahay, hadday tahay Sanaag, hadday tahay Togdheer, Hadday Tahay Hargeysa, Hadday Tahay Awdal, hadday tahay Salal, intaba waxaan Illaahay idiinka barayayaa inaad nabad-galyo ku noolaataan.”
Taliyuhu mar uu ka hadlayay dagaaladii ka dhacay dhawaan deegaanka Buuhoodle waxa uu sheegay in shaqaaqadii dagaal ee ka dhacday Buuhoodle uu sababay dagaal Ooge ka yimi dhinaca degmada Taleex oo halkaasi yimi, isla markaana ummada deegaankaasi ugu baaqay dagaal uu ku doonayo in qalalaase iyo xasilooni daro uu ka abuuro deegaan nabdoon.
“Waxaan ka hadlayaa shaqaaqadii ka dhacday gobolka Buuhoodle. Anigu siyaasad ma gelinayo oo runtu sida ay ahayd ayaan idiin sheegayaa. Shaqaaqadu waxay bilaabantay Khamiistan maanta ah Khamiisteedii. Sida aad la socotaan waxa magaaladaas tagay nin fidno wade ah oo dalka maalmahanba ku wareegayay, Taleex buu ka yimi ninkaasi. Umadda reer Somaliland ee halkaa ku sugan waxa uu ugu baaqayey inay dagaalamaaan oo wax xorayn la yidhaahdo oo aan jirin ayuu faafinayey. Caafimaadka umadda wax umuu qaban, tacliinta wax umuu qaban, noloshooda kale daryeel umuu sidin, isagu dibadaha ayuu ku nool yahay, carruurtiisiina jaamacadaha ayey ku jiraan. Markaa dadka sidaas ku nool oo waxaas oo dhami ka maqan yihiin oo dawladda Somaliland dedaal ugu jirtay, ee ciidamadu dedaalka ugu jireen, ayuu isku dayay inuu umadda kiciyo oo wax aan suurto-gal ahayn ugu baaqo, ayuu yidhi Taliye Jidhif.
Taliyuhu isaga oo ka hadlaya natiijadii ay xukuumaddu ka filaysay shirkii lagu qabtay magaalada Taleex iyo wixii ka soo baxay sidii ay ukala fogaayeen, waxa uu yidhi, “Umadda reer Somaliland beelaha ku nooli way shiraan oo wixii ay tabanayaan iyo khaladaadka dhexdooda ah ayey ka shiraan mana yidhaahdaa Somaliland baanu ka baxnay. Kii ugu dambeeyey waxa qabsaday reer Berbera oo may odhan Somaliland baanu ka baxaynaa ee waxa ay lahaayeen waddanka waxaas halaga hagaajiyo. Somaliland waxay moodaysay in shirkaas ay beesha dhulbahante danahooda khaaska ah kaga tashanayaan maadaama ay gogol nabadeed taallo, wixii ay halkaas ku gooayaanna ay la iman doonaan gogosha nabadeed ee madaxweynuhu fidiyey, May yeelin oo waa la ogaa wixii ka soo baxay. Waxa taas ka sii darayan, waxay ku baaqeen dagaal.”
Taliye Jidhif oo ka warramaya sidii uu ku bilaabmay dagaalka ka dhacay degmada Buuhoodle iyo cidda markii ugu horreysay dagaalantay waxa uu sheegay in markii ugu horreysay ay isku qabteen dadka deegaanku inuu Cali Khaliif Galaydh soo galo magaalada, isaga oo arrintan ka warramayana waxa uu yidhi, “Maalintii uu ninkaasi Buuhoodle yimi, dadka halkaas ku nooli waxay isu qabteen laba siyood. Qolo tidhi ninkan innaga daaya waxba inooma sido aan dagaal ahayne, qolana waxay yidhaahdeen wuu imanayaa. Horta dagaalka la sheegayaa wuxuu dhexmaray qolada Somaliland taageersanayd iyo qolada isaga doonaysay. Sagaalkii buu dagaalkaasi bilaabmay. Labadii markii ay ahayd ayaan anigu cutub ka mid ah cutubyada ciidamada Somaliland aan idhi dhex gala oo kala badbaadiya dadkan haseyeeshee, runtu sida ay tahay, waxaanu taageernay dhinacii Somaliland taageersanaa ee lahaa ninkan naga daaya. Dhaawaca iyo dhimashada ciidanka Qaranka wuxuu ku yimi badbaadinta dadka reer Buuhoodle ee taageerayaasha reer Somaliland ah ayaanu taageernay.”
General Maxamed Xasan Jidhif waxa been abuur ku tilmaamay in baabuur la sheegay in ciidamada qaranka laga qabsaday aanu ahayn sida loo buun-buuniyey, isaga oo arrintan ka hadlaya waxa uu yidhi, “Haddii aad aragteen gaadhi TV-yada lala wareegayo, gaadhigaasna runta ayaan ka sheegayaa. Wuxuu ahaa gaadhi weyn oo xambuul ah ayuu ahaa. Ciidamo Somaliland ah ayaa ku sugnaa Buuhoodle way ila soo hadleen, waxaanay igu yidhaahdeen go’doon ayaannu nahay ee raashin noo soo dir. Dabadeed gaadhigaas ayaan raashin u saaray waxaana dhexda ka qabsatay qoladii kale ee nabad-diidka ahayd intii aanu gaadhin ciidankayagii, markaa gaadhigaasna xaqiiqadiisu caynkaas ayey ahayd.”
Mar uu ka hadlayay siyaabaha ay saxaafaddu wax uga qoreen dagaalkaasi , wuxuu xusay in warbaahintu ay habab kala duwan wax uga qoreen, kuwaas oo qaarkood ay xaqiiqada rasmiga ah marin habaabiyeen isagoo u soo jeediyay warbaahintu inay ka feejignaadaan wararka been abuurka ah ummadana ay u gudbiyaan xaqiiqada dhabta ah iyo siday wax u dhaceen.
“Shacbiga Jamhuuriyadda Somaliland waxaan leenahay yaan la idin kicin, ciidanka Qaranka waxaad kalsooni ku qabtaan boqolkiiba 99 inuu idin difaaco, inaad seexataan, inaad ganacsigiina wadataan, inaad hurdo fiican seexataan, annaga ayaa soo jeedna ee idinkuna ha soo jeedina. Waxaan leeyahay, wax dhibaato ah oo aanu annagu hadda haynaana oo naga hor yimi ma jirin.”
Taliyaha Ciidamada Qaranku waxa uu gabo gabadii casdeeyay in ciidanka qaranku ay ku sugan yihiin fadhiisimadoodii jiidaha kala duwan ee gobolada bariga Somaliland isla markaana aanay jirin awood dib uga soo riixi karta goobaha ay ku sugan yihiin. “Waxaanu ka baqaynaan ma jirto, qaranka Somaliland ciidankiisa ayaa masuuliyaddiisa qaadaya inay si fiican u noolaadaan, horumarka la wado. Wax naga hor iman kara oo aan ka baqaynaa oo aan Illaahay ahayn ma jiraan, cid kastaa wax ha sheegato, Moorgan kastaa ha soo hadlo,” ayuu yidhi Taliye Jidhif.
SOMALILANDPOST NEWS
webmaster@somalilandpost.net