Hargeysa (SLpost)- Wasiirka Wasaaradda Macdanta iyo Tamarta Somaliland Eng. Xuseen Cabdi Ducaale. ayaa ku dooday inaanay Xaq u lahayn Goleyaasha Sharci-dejjinta ee Dalku Ansixinta iyo Naaqishaadda Heshiishyada ay Xukuumaddu la gasho Shirkadaha Ajaanibka ah.
Wasiirka Macdanta iyo Tamartu waxa uu ku dooday in aanay shuruucda shiidaalka ee dalka u yaallaa dhigayn in Golaha Baarlamaanka la horgeeyo heshiiyada shiidaal-sahaminta ee wasaaradiisu xukuumadda uga masuulka tahay.
Eng Xuseen Cali Ducaale oo shalay si gaar ah ugu warramay Telefishanka Gaarka loo leeyahay ee HCTV, waxa uu daboolka ka qaaday in xukuumadu diyaarinayso ciidamo si gaar ah uga hawl-geli doona ammaanka shaqaalaha iyo goobaha laga wado sahaminta shidaalka ee Shirkadda Genel Energy ka fulinayso gobolada Bari ee dalka.
Wasiirka oo ugu horreyn ka hadlayey sababihii kallifay inay Shirkadda Genel Energy joojiso hawlihii Sahaminta Shidaalka ee ay dalka ka wadday, ayaa yidhi, “Shirkadda Genel Energy marnaba qaraar kumay gaadhin inay dalka ka baxdo ee hakad ayay gelisay hawlaheedii. Markii ay hakadka gelisayna waxay hawlaheedii u joojisay sababo la xidhiidha caqabado ka hor yimid shaqadeeda. Xukuumad ahaan waanu ka hawl-galnay waanigii dhawrka jeer la kulanay masuuliuyiintooda. Shirkadu wixii cabasho ah ee ay sheegatay waanu ka xalinay.”
Wasiirku waxa uu sheegay in xukuumadda oo ka jawaabaysa cabashadii ka soo yeedhay Genel Energy ay go’aansatay inay samayso ciidan gaar u ah xarumaha shiidaalka laga baadhayo oo la yidhaahdo Xoogaga ilaalinta shiidaalka (Oil Protection Force) , isagoo arrintaas ka hadlayayna waxa uu yidhi, “Waxa xukuumaddu go’aansatay inay samayso ciidan cusub oo la yidhaahdo xoogaga ilaalinta goobaha shiidaalka (Oil Protection Force), ciidan oo noqon doona ciidan cusub oo qalabkiisa iyo tababarkiisuba gaar u yihiin oo ka hawl-geli doona inuu sugo shaqadaas soconaysa. Imika hawsha shiidaalku waxay maraysaa marxaladii qorshaynta ee la dejinayay waxa la qabanayo.”
Wasiirka oo hadalkiisa sii watay, waxa uu sheegay,“Haddii aan dib ugu noqdo heshiisyadan ama shuruucdan sheekadeedu dhawrka jeer soo noqnoqonaysay ee la leeyahay heshiisyadan maxaa loo geyn waayay Baarlamaanka. Anigu horena waan u idhi, imikana waan leeyahay wax runtii baqasho ah oo aanu ka qabno inaanu Baarlamaanka u gudbino heshiisyadan wax allaale iyo waxaanu kaga baqaynaa ma jirto. Laakiin meesha waxa jira nidaam sharciga shiidaalka ee hore ee inoo yaalay dal ahaan. Wasiirka Macdanta iyo tamarta ayaa hormuud ka ah ayuu qorayaa. Haddii laakiin heshiis ajanabi ah oo macdan iyo shiidaal baadhis ah waxa sharcigu qorayaa in laga ansixiyo Golaha Wasiirrada,”ayuu yidhi Wasiir Xuseen Cabdi Ducaale, waxase uu intaas ku ladhay “Laakiin meel ay kaga taalo Golaha Wakiiladdu waa inuu ansixiyaa ma jirto marka la eego sharciga imika inoo yaalla. Shuruuc cusub ayaanu imika wadnaa oo aanu doonayno inaanu samayno.”
Eng Xuseen Cali Ducaale oo ka sii hadlaya shuruucda ay wasaaraddiisu u dejisay Sahaminta Shidaalka, waxa uu yidhi, “Imika iyo haatan-na haddii ay jirto shuruuc muujinaysa in Baarlamaanku ansixiyaan heshiisyadan, waxa weeye in shirgudoonku soo gudbiyaan oo ay yidhaahdaan sharcigan ayaa sidan iyo sidaas u sugaya in Baarlamaanku ansixiyo.”
Si kastaba ha ahaatee, Axsaabta Mucaaradka ah iyo Xiildhibaannada Goleyaasha Xeer-dejinta qaarkood, ayaa xukuumadda madaxweyne Siilaanyo inta badan dhaliilo ugu jeediya inay iska idho-tirto shuruucda iyo xeerarka dalka u yaala isla markaana aanay u gudbin Heshiisyada ay Shirkadaha Ajaanibka ah la gasho goleyaasha Xaqa u leh inay naaqishaaan Heshiis kasta oo saamaynaya kheyraadka Dalka ee la wada leeyahay.
SOMALILANDPOST.NET/Hargeysa