Hargeysa (SLpost)- Xukuumadda Somaliland ayaa daboolka ka qaaday inaanay ka qeyb galayn shirka dalka Turkigu ay bisha June u qabanayaan Soomaaliya, waxaanay sheegtay in shirkaasi lagu falan-qeynayo arrimaha dalka Soomaaliya.
Wasiirka Arrimaha dibadda Somaliland Md. Maxamed Cabdilaahi Cumar ayaa sheegay in shirkaasi aanu khusayn Somaliland oo uu tilmaamay inay tahay qaran madax-banaan.
“Marka ugu horayso ajandaha shirkan Turkiga lagu qabanayaa uu u badan yahay arrimo xagga siyaasadda ah oo dawlad loogu dhisayo dalka Soomaaliya, arrimahaasina ma aha arrimo khuseeya Somaliland,”ayuu yidhi Wasiirka Arrimaha dibaddu.
Dr. Maxamed Cabdilaahi oo hadalkiisa sii watay wuxuu yidhi “Somaliland waa dal madax-banaan oo arrimihiisu u gaar yihiin. kamanay mid ahayd dariiqaas khariiradda nabadda (Road map-ka).sida waraaqaha loo soo dhigayna kama turjumayso qaranimadda iyo madax-banaanida Somaliland, haddii aan arrintaas wax laga qabanna ma filayo inay Somaliland ka qeyb-geli doonto shirkaasi.”
“Shirkaasi imika sida loo soo dhigay ma ah si aanu ku tagi karno, waxaanu dalbaynaynaa dawladda Turkigu anagoo danaynayna qeybo ka mid ah arrimaha lagaga hadlayo shirkaa qeyb ka mid ah oo xagga dhaqaalaha iyo horumarka u badan inay dib u eegto nidaamka ay Somaliland kaga soo qeyb galayso Somaliland oo aanu jecel nahay inuu noqdo mid la mid ah kii shirkii London aanu kaga qeyb-galay bishii febarwari ee sanadkan,”ayuu yidhi Wasiirka Arrimaha dibadda oo maanta u waramayay laanta Afsoomaaliga ee idaacada BBC-da.
Wasiirka oo la weydiiyay mawqifka Somaliland ee la xidhiidha shir Muqdisho ka furmay oo ay ka qeyb galeen Salaadiin aad u badan oo lagaga hadlayo ansixinta dastuurka cusub ee Somaliland, isagoo arrintaasi ka jawaabayayna wuxuu yidhi “Horta marka u horeysa waxaanu rajaynaynaa in lagu najaxo, dedaalka lagu wado sidii Soomaaliya nabad iyo dawladnimo loogu soo celin lahaa. Hase yeeshee dastuurkaas doodiisa, xulashadiisa, arrimihiisa iyo ansixintiisuba oo la sheegay inay Soomaaliya ka bilaabmeen. Waa dastuur aan khusaynin Somaliland.”
“Somaliland waa qaran madax-banaan oo dastuur u gaar ah leh oo muddo 21 sanadood ahna dalkeeda madax-banaani ku maamulanaysay, waxaanu ka xunahay in dastuurkaasi la sheegay in arrimihiisa lagu gudo-jiro inuu sheeganayo oo ay ku jirto gobolo ka mid ah Somaliland. Arrintaasna waxaanu u aragnaa mid nasiib darro ah oo aan Soomaaliyana aan wax u tarayn, Somaliland-na aan khusayn. Waxaanu ugu baaqaynaa masuuliyiinta arrintaasi ku hawlan inay ka saaraan sheegashada ay had iyo jeer sheeganayaan gobolo ka mid ah Somaliland,”ayuu yidhi Wasiirka Khaarajigu.
Dr. Maxamed Cabdilaahi oo la weydiiyay sida uu u arko salaadiin reer Somaliland ah oo shirka ansixinta dastuurka Soomaaliya lagu soo casuumay, wuxuu ku jawaabay “Salaadiintu iyagaa nagaga lexjeclo badan qaranimadda Somaliland, dalkana iyagaa bud-dhig u ah nabad-gelyadiisa iyo dhismihiisaba. Laakiin arrintan ka qeyb galka dawladda loo samaynayo Soomaaliya iyo dastuurkeeda, arrin sharciga dalku ogol yahay ma aha salaadiinta iyo dadka kaleba way ka war-hayaan xeer baa dalkan ka jira oo aan arrimahaasi fasaxayn. Dawladda Somaliland iyadoo wakiil ka ah qaranka, waxa dhawaan Baarlamaanka Somaliland u fasaxay inay ku meteli karto dalka wixii wada hadal ah ee lala yeelanayo Soomaaliya. Walaa siyaasiyiin, salaadiin, xisbiyo cid aan dawladda ahayn oo ka qeyb gali kartaa oo sharcigu u ogol yahay wada hadalo nabadeed ama siyaasadeed oo lala galo Soomaaliya ma jirto oo lama ogola.”
SOMALILANDPOST.NET
webmaster@somalilandpost.net