Addis Ababa (SLpost)-Dawladda Somaliland, ayaa shaaca ka qaadday inay Ciidammadeedu geli doonaan haddii degmada Taleex ee gobolka Sool lagu qabto wax shirar ah oo lagaga soo horjeedo wada-jirka iyo Qarannimada Somaliland, isla markaana ay dawladda Itoobiya ku qancisay inaanay waxba ka jirin qaylada iyo borabagaandaha uu Maamul-goboleedka Soomaaliyeed ee Puntland faafinayo ee ay ku sheegayaan Ciidanka Qaranku ku duulay Taleex.
Wasiirka Arrimaha Dibedda Somaliland Maxamed Biixi Yoonis oo isaga iyo Wasiirka arrimaha gudaha Cali Maxamed Waran-cadde ku sugan yihiin magaalada Addis Ababa ee xarunta dalka Itoobiya, ayaa Waraysi gaar ah oo uu Wargeyska Himilo khadka taleefanka kula yeeshay, waxa uu Wasiir Biixi ku sheegay inaanay Somaliland u dul-qaadan doonin in shirar ku lid ah Qarannimadeeda lagu qabto Taleex, haddii ay taasi dhacdana ay Ciidanka Qaranku geli doonaan halkaas iyo guud ahaan deegaan kasta oo dalkeeda ka mid ah oo lagu qabto shirar aan u danaynin wada-jirka bulshada iyo dawladnimada.
Waxa uu Wasiirka arrimaha dibedda Somaliland Mr. Maxamed Biixi waraysiga Himilo la yeeshay tafaasiil ka bixinayey kulan ay yeesheen dhiggiisa Itoobiya, oo uu sheegay inay u gudbiyeen cabasho Somaliland ka qabtay farogelin kaga timi Ciidammo Itoobiyaan ah oo yimi Taleex, isla markaana loo ballan-qaaday inaanay dib u dhici doonin.
Wasiirka oo ugu horreyn ka jawaabayey su’aal laga weydiiyey kulan ay wada yeesheen Wasiirka arrimaha dibedda Itoobiya iyo waxa xilligan keenay kulankooda, waxa uu yidhi; “Sababta keentay kulanka waxay ahayd inaan la wadaagno xaaladaha dalka iyo gobolka guud ahaan ka socda, khaasatan arrimaha ku lug leh Puntland, Khaatumo iyo Taleex, oo war fiican ka siinno in Somaliland tegtay dhulkeeda sida Taleex oo ashkhaas doonayey inay shir ku qabtaan, wakhtiganna ay soo noqdeen, haddii ay ka fursan weydana aannu ku laaban doonno. Marnaba ma oggolaan doonno in shir lagu qabto. Waxaan u sheegnay inaannu nahay dad nabad jecel, balse aan aqbali doonin in Xuduudaheeda hawl aan Xukuumaddu oggolayn lagu qabto.”
“Waxaan kala hadlay gar-darrada Puntland iyo waxyaalaha ay warbaahinta kaga hadlayaan, balse loo baahan yahay inay faraha kala baxdo arrimaha Somaliland, iyo sidoo kale diyaaradda Xamar ka soo duushay annagoo wada-xaajood noo socday, horena laysula qaatay inaan dhinacna gacan siin qolo dhibaato ku keenaysa dhinaca kale ama imaanshahoodii Killilka Shanaad ee Itoobiya, inaan guud ahaan gacan la siin, iskana kaashanno dhinacayaga iyo dhinaca Itoobiya-ba. Adduunka iyo cid walbana u sheegaan in Somaliland nabad jeceshahay, balse aanay oggolaan doonin in Xuduudaheeda cidi ku soo xad-gudubto.” Sidaa ayuu yidhi Wasiir Maxamed Biixi Yoonis.
Mar Wasiirka arrimaha dibedda Somaliland la weydiiyey inay Ciidanka Itoobiya la socday Cali Khaliif Galaydh iyo in kale iyo jawaabta ay Itoobiya ka bixisay arrintaas markii ay u gudbiyeen waxa uu yidhi; “Itoobiya waxay sheegtay inaanay oggolaan doonin cid kastoo khalkhal-gelinaysa nabadgelyada Somaliland ama xuduudkayaga laga soo tallaabo. Sidaad la socotid Askar Boolis ah oo magaalada Buuhoodle dhinaca Itoobiya joogay ayaa la socday diyaaraddii oo soo dhoweeyey, waxaannu ballan-qaaday Wasiirka arrimaha dibedda Itoobiya inaanay dib u dhici doonin, tallaabana ka qaadan doonaan faro-gelinta Askarta kililka shanaad ee u soo tallowday Somaliland.
Waxaa Wasiir Biixi la weydiiyey waxa uu kaga jawaabayo socdaalkooda Itoobiya oo dadka qaarkood u arko inuu la xidhiidho raalli-gelin ay Somaliland ka bixisay Saraakiil Sirdoonka Itoobiya ka tirsanaa oo Gabiley lagu xidhay, waxa uu yidhi; “Maya! Taa lama xidhiidhin tegitaankayaga Itoobiya. Falkaa horena waxaannu kala hadalnay Safiirka Itoobiya u jooga Somaliland Brig. Jen Tesfaye, una sheegnay inaan tallaabo ka qaadnay Ragii falkaa sameeyey ee Ciidanka ahaa, aad bay ugu qanceen. Itoobiya dhinacooda way baadhayaan inuu khalad jiray.
SOMALILANDPOST.NET
XIGASHO: Himilo