Washington (SLpost)- Xukuumadda Somaliland ayaa heshiis shidaal qodis iyo sahamin isugu jirta kula saxeexatay shirkad lagu magacaabo DNO oo laga leeyahay wadanka Norwey, balse fadhigeedu yahay magaalo madaxda dalka Maraykanka ee Washington D.C.
Madasha Heshiiska Waxa goobjoog ka ahaa Madaxwaynaha Somaliland Md Axmed Maxamuud Siilaanyo, Wasiirka Macdanta iyo Biyaha iyo Wasiirka Arrimaha Debedda, waxaana dhanka Somaliland Heshiiska u saxeexay Wasiirka Macdanta iyo Tamarta Eng Xuseen Cali Ducaale halka dhanka kale uu u saxeexay Guddoomiyaha Shirkadda DNO Norwegian oil company, Mr Bijan Mossavar-Rahmani.
Wasiirka Macdanta iyo Biyaha Somaliland oo hadal kooban ka jeediyay halkaas, ayaa sheegay in uu ku faraxsan yahay heshiiska cusub ee ay xukumadda Somalilnad la gashay shirkada DNO.
Sidoo kale, Madaxa fulinta ee shirkadda DNO Bijan Mossavar-Rahmani oo madasha ka hadlay, ayaa sheegay in heshiiskani uu yahay mid taariikhi ah oo midho dhal noqon doona.
Dhanka kale, Qoraal Shirkaddu ku baahisay boggeeda Internetka, ayaa lagu sheegay in labada dhinac ay isku af garteen Heshiis ay ku qaybsanayaan shidaalka bogcadda ee SL18 oo xukuumadda Somaliland u ogolaatay inay shirkaddani Shidaal ka soo saarto Ceelkaas oo dhulka Xeebta ah ee u dhexeeya Berbera iyo Karin.
“Qalcadan 12,000 ee kiiloomitir oo isku wareeg ah, waxa raaca hawl-gal shidaal raadin ah oo labadan dhinacba isla qaateen inay saliidi ku jirto walina aan la qodin,” sidaa waxaa qoraalkiisa ku sheegay gudoomiye Mossavar-Rahmani, waxaanu intaas ku daray in Somaliland ay ku taalo Juquraafi ahaan dhulka shirkadu sida weyn diiradda ugu hayso. “Waxaanu si firfircoon uga howl gali jirnay ilaa 1990-naadkii, gacanka Cadmeed ee Yemen.”
Shirkada ayaa howsheeda ka bilaabi doonta qalcadda (Block SL 18) iyadoo meelo badan oo kalena sahamin doonta sida qorshuhu yahay sanada 2014-ka.
DNO International ASA ayaa ah shirkad ka diwaan gishan waddanka Norwey, xooggana saarta shidaal qodista Bariga dhexe iyo Woqooyiga Afrika, waxaanay Qoditaanka shidaalka iyo saliidda ku haysataa Liisamada 18 waddan oo kala duwan, iyada oo horumarin iyo shidaal qodis bada gunteeda iyo Barigaba ah ka samaysay gobolka Kurdistan ee wadanka Ciraaq, Jamhuuriyada Yemen, Saldanada Cumaan, Imaaraadka Carabta, Jamhuuriyada Tuuniisiya iyo hadda oo ay ka bilaabayso Somaliland.
Waa shirkaddii saddexaad ee heshiis shiidaal baadhis ah la gasha Somaliland sadexdii sanadood ee ugu danbeeyay, iyada oo wasiirka macdanta iyo Biyuhu ku sababeeyey sida shirkadaha Caalamiga ahi u danaynayaan shidaalka ku keydsan Somaliland.
SOMALILANDPOST.NET