London(SLpost)Wararka ka imanaya degaanka Cali Xaydh ee degmada Baki ayaa sheegaya in halkaasi ay ku dhufteen duufaan ku lamaanayd roobab mudo dhawr maalmood ah ka da’ayay degaankaasi isla markaana ay ka dhasheen qasaare isugu jira mood iyo noolba.
Sida uu shabakada u xaqiijiyay Suldaan Abshir Maxamed Ducaale oo ku sugan Cali Xaydh oo khadka taleefanka kula soo xidhiidhay, waxa uu sheegay in duufaantaasi ay ku dhaawacmeen sedex qof oo midi dhaawac halis ah yahay isla markaana ay degaankaasi ku burbureen guryo badan.
“Roobab mudo dheer da’ayay ayaa waxa ay mar kaliya isku badaleen dabayl xoogan oo afarta jiho iska qabsatay isla markaana xawli xoogan ku socotay, dabayshan ayaa jiingado badan ka qaaday guro dhisnaa, sidoo kalena waxa ay burburisay guryo kale oo cooshado u badnaa oo degaankaas ku yaalay, dabayshaas xoogan iyo burburkaasi guryaha ayaa waxa ay sababeen in 2 qof oo rag ah ay dhaawacyo fududi soo gaadhaan, halka ay qofka kale oo haween ah ay ku jirto KOMA isla markaana uu xaalkeedu yahay mid halis ah” sidan waxa yidhi Sul. Abshir
Waxa aan sheegayaa in loo baahan yahay gurmad degdeg ah oo dhinaca caafimaadka iyo adeegyada kale ee gargaarka degdega ah, waxana tan ku lamaan oo aan ka dayrinayaa kaabayaasha ay ka midka yihiin wadooyinka oo gabi ahaanba ay roobabku waxyeeleeyeen isla markaana ay suura gal tahay inay adkaato in gurmardku si sahlan u soo gaadho Cali Xaydh ayuu yidhi Sul. Abshir.
Dhanka kalena Ugu yaraan labo ruux ayaa ku geeriyooday roobab lixaad leh oo labadii maalmood ee u dambeeyey ka da’ayey meelo ka mid ah gobolka Salal.Iyadoo guud ahaan ay Somaliland ka da’ayaan roobab wata dabaylo qoyan.
Magaalada Garbo-dadar ee Gobolka Salal waxaa la xaqiijiyey dhimashada laba qof oo kala ah oday waayeel ah oo daad soo rogmaday uu qaaday iyo haweenay ay la duntay meel bullaacad ahi.
Weriyahayaga Gobolka Salal, Maxamed Cawaale Daahir oo soo xiganayey Caaqil Ibraahin Muumin oo ku sugan tuulada Geerisa iyo Maayarka magaalada Garbo-dadar Cabdi Cabdilaahi Kalluunle oo ku sugan caasimadda Hargeysa ayaa ku soo warramay in roobabkaasi dhaliyey khasaare naf iyo moodba leh,iyadoo roob aan kala go’ lahayni deegaanadaasi ka da’yeen labadii maalmood ee la soo dhaafay oo dhan.
Wararku waxa kale oo ay sheegayaan in daadad ka dhashay roobabkaasi ay qallibeen oo rideen gaadhi booyad ah oo shidaal u soo siday dhanka magaalada Hargaysa isagoo marayey dooxa degmada Garbo-dadar.
Sidoo kale Duufaan xoog leh oo wata dabaylo qoyan ayaa maanta ku dhuftay Degmada Ceelaayo ee Gobolka Badhan ee Bariga Somaliland, kaas oo sababay Khasaare kala duwan.
Maayarka Magaalada Ceelaayo Md Barkhad Aadan Xasan oo hawlo shaqo hadda u jooga magaalada caasimadda ah ee Hargaysa ayaa galabta u sheegay warbaahinta in wararkii ugu dambeeyey ee uu ka helay maamulkii degmadu ay caddaynayaan in Duufaan xoog leh oo wata dabaylo qoyan iyo roob ay ku dhufteen Magaalada Ceelaayo.
Maayarku waxa uu sheegay in Ku xigeenkii Maayarka ee magaaladaasi Ceelaayo oo lagu magacaabo Faarax Maxamuud Shuucaar uu ku soo wargeliyey xogta ku saabsan duufaantaasi oo sababtay khasaare soo gaadhay xoolaha nool, hanti kale iyo dhismayaashii kaabayaasha bulshada, duufaankaas oo dumiyey dhismayaal badan, doonyihii taagnaa xeebtana banaanka uga soo saaray badda oo burburiyey, isla markaana dilay qiyaastii boqol neef oo adhigii magaalada ah.
Dhanka kalena Maayarku waxa uu sheegay in aan laga war haynin dadkii danyarta ahaa iyo reer guuraagii deganaa magaalada nawaaxigeeda, isla markaana aan la ogayan khasaaraha gaadhay maadaama ay dabayluhu dhacayeen maalinimadii oo dhan welina socdaan.
Somalilandpost.net
London