ADDIS ABABA (SLpost)- Wasaaradda Arrimaha Dibadda dalka Itoobiya, ayaa faahfaahin ka bixisay natiijada kulan magaalada Addis Ababa ee dalka Itoobiya shalay ku dhexmaray Wasiirul-dawlaha Arrimaha Dibadda dalkaas Danjire Berhane Gebre-Christos iyo Wasiirka Duulista iyo Hawada Somaliland Maxamuud Xaashi Cabdi oo socdaal shaqo ku tagay dalkaasi Itoobiya.
Dawladaha Somaliland iyo Itoobiya, ayaa ka wada-hadlay sii xoojinta xidhiidhka ganacsi, dhaqaale iyo nabadgelyo u dhexeeya labada waddan, waxaanay si qoto-dheer uga wada-xaajoodeen iskaashiga dhinaca ammaanka iyo la-dagaalanka argagixisada oo laba waddan wada-shaqayn ka leeyihiin, sida lagu sheegay war-saxaafadeed ka soo baxay wasaaradda Arrimaha Dibadda Somaliland.
Ma jiro war ka soo baxay dhinaca xukuumadda Somaliland oo tafaasiil dheeraad ka bixinaya natiijada kulanka dhexmaray labada dawladood, haseyeeshee sida lagu sheegay war-saxaafadeedka wasaaradda arrimaha dibadda Itoobiya kaga hadashay qodobbada lagaga hadlay kulanka, dawladda Itoobiya waxa ay xukuumadda Somaliland ku bogaadisay horumarka ay ku tallaabsatay isla markaana ay dawladda Federaalka ah ee Itoobiya ay ka-dhab tahay sii ballaadhinta xidhiidhka labada dal ka leeyihiin duullimaadyada iyo dalxiiska. Waxa kale oo wada-xaajoodka lagu soo qaaday sidii ay labada dawladood isaga kaashan lahaayeen hirgelinta mashruuca isticmaalka dekedda Berbera oo dawladda Itoobiya baahi weyn u qabto iyo sidii diyaaradda Ethiopian Airlines si buuxda uga hawl-geli lahayd madaarrada Somaliland.
Waxa kale oo kulankaas lagaga hadlay sidii loo dhiirrigelin lahaa, loo xoojin lahaa is-dhex-galka labada shacabka iyo xidhiidhka wada-shaqayneed ee labada dawladooda ka dhexeeya.
Sida war-murtiyeedka lagu xusay Danjire Berhane waxa uu wasiirka Duulista Hawada Somaliland u caddeeyey inay dawladdiisa ka go’antahay sii xoojinta xidhiidhka ay labada dal iska kaashaadaan ee Nabadda, Xasiloonida, horumarka iyo dalxiiska.
Dhinaca kale, Wasiirka Duulista iyo Hawada Somaliland Maxamuud Xaashi Cabdi, waxa uu dawladda Itoobiya ku bogaadiyey kaalinta dawladda Itoobiya ku leedahay nabadda, deggenaanshiyaha iyo horumarka gobolka, sida ay wasaaradda Arrimaha dibadda Itoobiya ku sheegtay war-murtiyeedka lagu faahfaahiyey nuxurka kulankaas.
“Mr Xaashi waxa uu xoojiyey muhiimadda taageerada Itoobiya u leedahay Somaliland, waxaanu rejo fiican ka muujiyey xoojinta xidhiidhka dibloomasiyadeed iyo xidhiidhada kale ee Somaliland iyo Itoobiya u dhexeeya. Waxa uu intaas ku daray in iskaashiga Itoobiya ee hoos u dhigista heerka faqriga iyo la-dagaalanka Al-Shabaab ay muhiimad weyn ugu fadhiyaan dalkiisa,” sidaas waxa lagu sheegay war-saxaafadeedka dawladda Itoobiya ka soo saartay kulanka dhexmaray labada masuul.