Hargeysa (SLpost)- Mid ka mid ah Siyaasiyiinta Soomaaliya, isla markaana xubin ka ahaa Ergadii dawladda Federaalka Soomaaliya u metelayey wada-hadallada u dhexeeya Somaliland, kana qaybgalay wejigii 5-aad ee wada-hadalka labada dal, kaasoo 16-kii bishii koowaad ee sannadkan 2014-ka ka furmay magaalada Istanbul ee waddanka Turkiga oo isagu wada-hadallada marti-geliyey.
Faarax Giindhe oo la sheegay inuu ka mid ahaa xubnihii ugu ad-adkaa doodda labada dhinac u dhaxaysay ee sida wayn uga soo hor-jeeday qaddiyadda gooni-isu-taagga Jamhuuriyadda Somaliland wakhtigaa uu ka midka ahaa Ergada Wadahadalka ee ka socday dhinaca Soomaaliya, isla markaana la sheegay inuu ku dhegganaa qaddiyadda Midnimada Soomaaliyeed, ayaa shalay ka soo dhex-mudhay Odayaasha Dhaqanka ee Soomaaliya oo Arbacadii inna dhaaftay soo gaadhay magaalada Hargeysa ee Caasimadda Somaliland, ka dib markii ay diyaarad ka soo raaceen magaalada Muqdisho.
Faarax Giindhe waxa uu shalay hadal ka jeediyey kulan qado-sharaf ahaa oo uu Xisbiga UCID u sameeyey Odayaasha Dhaqanka Beelaha Soomaaliyeed ee Hargeysa soo gaadhay oo intii hore Warbaahinta afka ka xidhay, isla markaana shaki badani ku xeermay ujeeddada socdaalkooda, kulankaas oo ay Masuuliyiinta Xisbiga UCID su’aalo ujeeddada socdaalkooda ku saabsan ku weydiiyeen, uguna bandhigeen qaddiyadda gooni-isu-taagga Somaliland inay tahay go’aan shacab oo lama taabtaan ah.
Waxa uu Faarax Giindhe oo ka mid ahaa xubnihii su’aalaha Siyaasiyiinta Xisbiga UCID ka jawaabay ee dhinaca Odayaasha u hadlayey, waxa uu sheegay inuu yahay xidhiidhiyaha Barnaamijka u dhexeeya Somaliland iyo Soomaaliya, balse muu caddaynin in Barnaamijkaasi yahay wadahadallada sida caadiga ah ugu socda labada dawladood iyo in uu ula jeedo socdaalka Madax-dhaqameedku ku yimaaddeen Hargeysa.
“Barasho wanaagsan Aniga waxa la I dhahaa Faarax Giindhe, Ninka xidhiidhinayey runtii barnaamijkan Somaliland iyo Soomaaliya ka dhex socda min bilawgii hadda Guurtida xidhiidhinayey Aniga weeye. Marka xaqiiqda laga hadlayo Odayaashani iyagaa isa soo abaabulay, iyagaa gartay inay Walaalohood Somaliland inay soo booqdaan, iyagaa gartay bal waxa dhabta ah ee Somaliland ka jira inay xog-ogaal u noqdaan, iyagaa jeclaystay Jibbo iyo jacayl mid kale oo lixdankii jiray oo ka horreeyey inay mar kale iyagu idiinla yimaaddaan, maaha in iyaga wax loo soo yeedhiyey ee iyagaa go’aansaday inay Somaliland yimaaddaan.” Sidaa ayuu yidih Faarax Giindhe.
Inkasta oo ay Odayaashii Dhaqanka ee Kulankaas shalay ka hadlay ay ku doodeen in ujeeddada socdaalkoodu aanay sal iyo raad toona ku lahayn mid siyaasadeed ee ay tahay arrin dhaqan iyo inay indhahooda ku arkaan waxa ay Somaliland qabsatay oo ay ugu hambalyeeyaan, isla markaana ka bartaan dhismaha nabadda iyo dawladnimada iyo abuuritaanka is-dhex-galka Bulshada, haddana markii Siyaasigan Faarax Giindhe lagu dhex-arkay Odayaasha waxa sii kordhaya dareennada siyaasadeed ee markii horeba laga muujiyey imaanshiyaha Madax-dhaqameedka Muqdisho ka yimi oo aan haba-yaraatee Warbaahinta Soomaaliya iyo ta Somaliland midna u caddaynin ajandaha ujeeddada safarkooda Hargeysa.
XIGASHO: HIMILO