Cagahayga yaryar, kabo buudhaa sudhan. Feedhahaygan qalan, maryahaa ku wadhan. Surwaalkaygan ballaadhan iyo kubkaygan duban ciid baa u dhaxaysa. Dhulkan tuuraha leh, laydhan aan qoyanayn, qorraxdan cadhaysan, dhexdoodaan iska aallaa. Dhaqaaq ma laha xubnahaygu dhammaan. Muddaan jiifay halkan, dadkii way iga tageen intii awoodi karaysay. Saddex ayaannu ka tagnay intii aanan dhicin. Qofkii afraad ee saxaraha looga tago, anigaygani weeyaan. Bartanaan ku dhiman intaan waagu baryin. Naftaa bixi la’, dacal uun iga saaran. Inta aanan dhiman, weji aad u madow Eebbahay la hor aadin, bal aan dib u eego, safarkaygani gaaban. Sababta aan u dhiman, bal aan sii yara baadho. Bal aan is weydiiyo, tahriibkan aan u baxay, maxaan kaga baaqan lahaa.
Haddaan ahaan lahaa macallinkii wax i baray, tacliintaan dhigayaan aad u fiirin lahaa. Wixii aan saluugaan kaba saari lahaa. Dhengadda aan sito baan iska tuuri lahaa. Dhallintaan qalbigooda dufan aan marin laa. Wixii aan kari waayo, maammulkaan u gudbin laa.
Hoggaankii waddankayga haddii aan ahaan laa, iimaankaan qabi laa. Xoolaha ummadda kuwaygaan ka sooci laa. Dadkaygaan hanan laa, iyagaan dhisi laa. Intaan meelahaa qayrkay, baryo tuugsi la joogo, intaydaan macnayn laa. Tacliintaan kobcin laa, shaqadaan kordhin laa. Sida loo siman yahay, dadkaygaan bari laa. Qabiilkaan aasi laa, waan walaalayn lahaa.
Wasiirkii aniga ii diiday shaqada haddii aan ahaan laa, waan ka fiirsan lahaa. Qabyaaladda aan inaadeerkay booska aan ku siiyaan iska joojin lahaa.
Yarkii shaqaalaha qorayey hay’addii kalena haddii aan ahaan laa, Rabbigaan ka baqi laa.
Aabbihii i dhalay haddii aan ahaan laa, dhashaan joojin lahaa. Qabiilkaygoon wacnayn amma wasiirro lahayn, carruurtaan dhalayaan iska dayni lahaa. Lug-gooyada ubadkayga aan u soo wado baan iska joojin lahaa. Guurka aan ku dhaqaaqaan kaba joogi lahaa. Inta Eebbe xaalka dadkayga sidan uu ka rogaayo ayaan dhowri lahaa.
Hooyaday Milgona haddii aan ahaan laa, odaygan i qabaan, ubad in aan u dhalo, iska diidi lahaa. Naxdin soo socotaan iska moosi lahaa. Ubad aan dhalay baan duni aad u silloon uba diidi lahaa. Waan ka dhaaran lahaa. Werwerkaa tahriibtaan kaba raysan lahaa. Inankaagii curdeed saakuu baxay baan qalbiga ka dhowri lahaa. Waan xinnaysan lahaa.
Haddii aan ogahay in aan dhiman doono dhowaan, tilifoonkaygii wacnaa waan iska haysan lahaa. Waxba maan iibiyeene waan ku haasaawi laa. Lacagtii aan ka helay hooyaan siini lahaa. Noloshii adkaatay waan u samri lahaa. Macallinkagii wacnaa ducaan ”hoo” odhan laa. Aabbihii ila dedaalay, wax wanaagsan i baray, tunkaan saari lahaa. Hooyaday i dhashay illintaan ka tiri laa. Aniga daraadday in ay u ciishooto waan ka dhowri lahaa. In ay i dhashaan wax weyn uga dhigi laa.
Shaqo marka aan waayo, tu kalaan raadin laa. Madaxdan xumaatay waan u ducayni lahaa. Iyaga dartooda halaagga aan u maray iyo naftaa aan halligay, waan iska haysan lahaa. Tahriibkaa aan u baxay waan ka joogi lahaa. Naftaa iga gurmaysa waan u heesi lahaa. Carrabkaa qallalan dhaydii baan dari laa. Calooshaa engegan dherigii hooyaday iyo jeeni bisil baan ”ham” ku siini lahaa. Baruur hooyo ay shiishaan bisinka u qaban laa. Marka uu dufanku qawlalkayga dareero, anigoo xiiqsan baan iska biini lahaa. Gabadh raalli ku ah dalkaygaa gudihiisa jacayl baan u marin laa. Oori suubban iyo afadii gurigaan ka yeelan lahaa. Naqaskaan qaybsan layn oo midba mar aayar neefsan lahaa. Eebbahay ii cadhaysan raalli baan gelin laa. Nolosha maalmo uun weeyee waan iska ciidi lahaa. Tasbiixdaan badin laa. Sidaasay noqon layd. Balse waanay ahayn, si kalaanay ahayn. Si Allay noqotay.
Ismaaciil Cabdilaahi Ubax
London, Uk
Sheeko Wadareed Bahda Hiilqalin/ Tahriib