Hargeysa 15 April, 2012 (SLpost)- Shirweynihii golaha dhexe ee xisbiga Kulmiye oo maanta lagu soo gebo-gabeeyey hotelka Maansoor ee Magaalada Hargeysa, ayaa waxa hadheeyay khilaaf xooggan, ka badib markii maamuus ka xayuubin lagu sameeyay guddoomiye ku xigeenkii 2aad ee xisbiga Cabdiraxmaan Cabdiqaadir Faarax.
In kasta oo khilaafkaasi hakad geliyay shirka, laakiin guddida doorashada, ayaa sii waday shaqadooda , waxaana jagada laga qaaday Cabdiraxmaan Cabdiqaadir iyada oo lagu beddelay Xildhibaan Maxamed Waabeeye oo ka tirsan Golaha Wakiillada.
Waxa kale oo goobta lagu doortay Guddoomiye-ku-xigeenka 1aad ee Xisbiga oo jagadiisu bannaaneyd ilaa wakhtigii Guddoomiyaha Xisbiga loo doortay Muuse Biixi Cabdi, waxaana loo doortay Afhayeenkii Xisbiga Maxamed Kaahin oo xilkaas hayey tan iyo shirweynihii koowaad ee Xisbiga oo qabsoomay sannadkii 2003-dii.
Dhanka kale, waxa aan la soo hadal-qaadin tartanka Guddoomiyaha Xisbiga Kulmiye oo uu hore u hayey Guddoomiye Muuse Biixi Cabdi oo lagu wareejiyey xilkaas ka dib markii guddoomiyihii xisbigaas Axmed Maxamed Maxamuud (Siilaanyo) uu ku guulaystay talada dalka.
Md. Cabdiraxmaan Cabdiqaadir oo markii lagu dhawaaqay in mansabka guddoomiye kux-geenka iyo xubinnimada Kulmiye lagu dhawaaqay in laga qaaday ayaa madasha buuq ka dhaliyey isaga oo ku tiraabayey hadallo ay ka mid ahaayeen, “Waan inaan ka jawaabaa , maxaa ku diidayaan inaan ka jawaabo Dacwadda ay….? Yaa Arkay Dacwad lagu isku qaado…..” taas oo markii dambe sababtay in loo dalbado ciidamo boolis ah oo xarunta uu shirku ka socday isku dayey inay Garbo-duub kaga saaraan.
Cabdiraxmaan Cabdiqaadir oo warbaahinta la hadlay ka dib markii uu dhammaaday Shirka Kulmiye, waxa uu ku hanjabay inaanu kaga hadhaynayn kuna dagaalami doono booskiisa isla markaana uu ha’yadaha deeqda bixiya iyo caalamka gaadhsiin doono dhibaatada uu sheegay in lagula kacay.
“Bulshada caalamka, hay’adaha deeqda bixiya iyo safaaradaha ayaan gaadhsiin doonaa, kagana hadhi maayo oo waan ku dagaalami,” ayuu yidhi Cabdiraxmaan Cabdiqaadir.
Dhanka kale Guddoomiyaha Xisbiga Muuse Biixi Cabdi oo isagana wax laga weydiiyey tallaabada uu xisbigu xilka kaga qaaday Cabdiraxmaan ayaa sheegay inay dariiq sharci u mareen xil-ka-qaadir Masuulkan sare ee Kulmiye.
Shirweynahan saddexaad ee Golaha Dhexe ee Kulmiye oo maanta la soo gebo-gabeeyey waxa kale oo lagu doortay Xoghayaha Guud ee Xisbiga oo loo doortay Xasan Siciid Yuusuf oo muddooyinkii u dambeeyey xilkaas si ku-meel gaadh ah u sii hayey ka dib markii uu sannadkii hore geeriyooday Xoghayihii guud ee Xisbigaas Marxuum Keyse Xasan Cige.
Dhacdadan maanta soo wejehday Shirka Golaha ee Kulmiye oo dad badani ku macneeyeen tallaabada loo maray xil-ka-qaadista mid ka fog cadaaladda iyo Dimuqraadiyadda, waxaanay u muuqatay mid si weyn u kala qaybisay xubnaha iyo taageerayaasha Kulmiye.
SOMALILANDPOST.NET
webmaster@somalilandpost.net