Hargeysa (SLpost)- Shirkadda Xawilaadda Lacagaha Ee Dahabshiil, ayaa macaamiisheeda daafaha dunida ku kala nool ku wargelisay inay nidaam fudud oo online ah iyagoo guryahooda jooga ku diri karaan lacagaha ay doonayaan inay u diraan eheladooda iyo asxaabtoodaba.
War-saxaafadeed ka soo baxay xafiiska Suuq-geynta iyo xidhiidhka Bulshada, ayaa shirkaddu macaamiisheesa kula wadaagtay sida ay shirkad ahaan u dareensan tahay wer-werka kaga soo kordhay caabuqa CoronaVirus iyo saamaynta uu ku yeeshay hab-nololeedkooda iyo lacagaha ay eheladooda u diri jireen.
War-saxaafadeedka ay soo saartay Shirkadda Dahabshiil, ayaa u qornaa sidan:-
“Fariin ku Socota Macaamiisha Dahabshiil ee xaaladda Covid-19
Waxaanu la dareennahay Macaamiisha Dahabshiil ee Daafahadunidda ku nool, iyo warwar-ka ay ka qabaan xanuunka (Covid-19) oo aad ugu fidaya aduunyadda oo dhan iyo sidii ay eheladooda iyo asxaabtooda u gaadhsiin lahaayeen Lacagihii ay u diri jireen.
Sidaa daraadeed, waxaanu Macaamiisha Dahabshiil la socodsiinaynaa in Lacagaha aad eheladiina u soo diraysaan aad ka soo diri kartaaan Mobile App-ka Talkremit (www.talkremit.com) idinka oo Jooga Guryihiina.
Shirkadda Dahabshiil Waxay sidoo kale ku wargelinaysaa macaamiisheeda joogta dalka gudihiisa in lacagaha loo soo diro ay ku heli karaan Mobile-kooda iyaga oo jooga guryahooda. Sidaa awgeed macmiil fadlan la wadaag ehelkaaga iyo asxaabtaada Lambarkaaga Somtel ee leh adeega eDahab si lacagta laguu soo dirayo aad ugu hesho mobile-kaaga.
Shirkaddu waxay ku dadaalaysaa inay laban-laabto dedaalkeeda adeeg-bixineed Wakhtigan adag ee lagu jiro, si aanu u xaqiijino in dhammaan macaamiishayadu ay degdeg u helaan lacagaha ay u soo dirayaan eheladooda iyo asxaabtoodu.
Shirkadda Dahabshiil waxa ay macaamiisheedda ku waaninaysaa inay ku dadaalaan ilaalinta nadaafadooda iyo inay raacaan dhamaan talooyinka iyo talaabooyinka caafimaad ee lagaga horta tagayo xanuunkan (Covid-19).
Waxaad kala socon kartaan si joogta ah wixii kasoo kordha xaallada Xanuunka iyo adeegyadda Dahabshiil Degelkayaga (https://www.dahabshiil.com). Ilaahayna waxa aanu ka rajaynaynaa inuu ina hareer mariyo masiibadan caafimaad (Aamiin).
Wa billaahi Tawfiiq
Sacad Muse Abdi
Marketing & PR Manager