Hargeysa (SLpost)-Wakiillo ka kala socda 40 shirkado caalami ah oo ka kala yimi guud ahaan qaaradaha adduunka oo dhan si ay ugu tartamaan qandaraaska mashruuca biyo-ballaadhinta caasimadda Hargeysa ee uu bixiyey Midowga Yurub, ayaa shir lagu siinayo xog-warran uu u furmay maanta.
Shirkan oo lagu qabtay hoolka Wakaaladda Biyaha Hargeysa, waxa ka qaybgalay masuuliyiin kala matalaysa inta badan 40 shirkadood oo ku guulaystay inay ka soo gudbaan qiimaynta wareeggii kowaad (short list) kadib markii hay’adda UN-HABITAT oo fulinaysa mashruucan iyadoo la kaashanaysa Wakaaladda Biyaha iyo Wasaaradda Khayraadka Biyaha Somaliland ay warbaahinta gudaha iyo mid caalami ah ku baahisay qandaraaska biyo-ballaadhinta Hargeysa ee dhigidda dhuumaha (pipes) iyo dhismaha xarun cusub oo kaydiya biyaha ka hor inta aan la soo gaadhsiin magaalada Hargeysa ee biyo-soo-saarka degaanka Geed-deeble. Waxaanna la siiyey faahfaahin ku saabsan mashuurcan iyo hawlaha shaqo ee laga rabo, iyadoo dhammaantood la soo tusay xarunta biyo-soo-saarka Geed-deeble, ceelasha biyaha iyo dariiqa uu soo raaco dhuunta biyaha soo qaadaa.
Qandaraaskaasi oo ahaa mid si caalami ah loo shaaciyey oo cid walba u furnaa, ayaa 40-ka shirkadood ee ku soo baxay wareegga kowaad oo ka kala socda Qaaradaha Africa, Europe, America, Latin America iyo Aasiya, isla markaana ka kala jira in ka badan 20 waddan oo dunida ku yaal oo ay ka mid yihiin; Somaliland, Kenya, Uganda, France, Germany, Rwanda, Sudan, South Sudan, Somaliya, Djibouti, Rwanda, Ethiopia, India, China, Argentina, USA, UAE, South Korea, Italy, Turkey, Switzerland, South Africa, Netherland iyo Spain, waxa laga dalbaday inay dalka Somaliland yimaadaan oo ay arkaan shaqada la qabanayo ka hor inta aan lagu kala saarin wareegga labaad ee qiimaynta lagu samayn doono dhukumentiyadooda.
Maareeyaha Wakaaladda Biyahay Hargaysa Ibraahim Siyaad Yoonis oo ugu horreyn furitaankii shirkan ka hadlay, ayaa sheegay in afartankan shirkadood ee tartanka biyo-ballaadhinta caasimadda u galaya oo badankoodu 25-kii bisha dalka soo gaadhay sababta loogu yeedhay tahay si ay xog-dheeraad ah u helaan ka hor inta aanay gelin tartanka wejigiisa labaad, isla markaana shirkan ay u qabteen ujeeddadiisu tahay sidii loo siin lahaa faahfaahin dheeraad ah, loogana jawaabi lahaa wixii su’aalo ah ee ay qabaan.
“Shirkani marka uu u dhammaado shirkad waliba way iska noqonaysaa oo ay soo xarayso codsiyada qandaraaska waqtigii loogu talogalay. Waxaannay tani bilow u tahay in hawshii mashruuca biyo-ballaadhinta Hargeysa uu degdeg u bilaabmo oo ciddii ku guulaysataa gudasho, dhuumihiinna waa xayeysiiyey oo waqtigii qandaraaska tartankiisu xidhmayeyna waxyar baa ka hadhay, Isha Allaahu waxaan rajaynayaa in hawshaasi Ilaahay inoo fududeeyo oo aynu u guulaysanno,” ayuu yidhi Maareeyaha Biyaha Hargeysa.
Wasiirka Wasaaradda Khayraadka Biyaha Somaliland Md. Xuseen Axmed Cabdalle oo isna halkaasi ka hadlay, ayaa ka soo qaybgalka shirkadahan ee tartanka biyo-ballaadhinta Hargeysa ku tilmaamay mid guul wayn u ah Somaliland, waxaannu yidhi, “40-kaa shirkadood ee maanta caasimadda Somaliland ee Hargeysa yimi si ay uga qaybgalaan tartanka mashruuca biyo-ballaadhinta Hargeysa waxay muujinaysaa Somaliland iyadoo aan weli la aqoonsan nabadgalyada iyo maamulka dawladeed ee ka jira, wakiillada ka socda shirkadaha waxa wejiyadooda ka muuqda inay faraxsan yihiin inay hawl fiican qabtaan Somaliland oo ka shaqeeyaan, waxaan odhan karaa ictiraafkii aynu inta badan sugaynay inuu furihii u horreeyey tani tahay, maadaama afartan shirkadood oo qaarkood ka socdaan waddamada ugu waawayn adduunka ay maanta doonayaan inay Hargeysa ka shaqeeyaan, waxaannan rajaynayaa inay si dakhso ah adduunka uga soo baxdo kelmada Somaliland waa dal jira.”
SOMALILANDPOST.NET