Berlin (SLpost)- Garsoorka dalka Jarmalka ayaa Jimcihii toddobaadkii dhowaa beeniyey sheegashada inan yar oo dhowaan ku dacwootay in lagu afduubay gudaha magaalada Berlin ee dalka Jarmalka, kaidbna lagula kacay kufsi. Inantan yar oo ah Iska-dhal Ruush iyo Jarmal ah ayaa ku andacootay in iyada oo dugsigeeda ka timid kuna socota gurigooda ay afduubeen dad leh dhiigga Bariga dhexe oo u eeg qaxoontiga dalkaas ku sii badanaya. Laakiin garsoorku waxa uu hadda caddeeyey in inantaasi ay been sheegaysay, oo habeenkaas ay ku beriday guriga saaxiibkeed oo Jarmal ah, sidaa awgeedna aanay dib ugu noqon guriga qoyskooda, sababta ugu weynina ay ahayd cabasho la xidhiidha dhibaatooyin dhinaca waxbarashada ah oo haystay. Inantan yar oo 13 sano jir ah ayaa khilaaf iyo muran adag oo siyaasi ah ka dhex qarxisay dalalka Jarmalka iyo Ruushka oo ay aabaheed iyo hooyadeed ka soo kala jeedaan. Wasiirka arrimaha dibadda Ruushka Sergei Lavrov oo dhowaan ka hadlay qadiyadda inantan yar, ayaa dowladda Jarmalka ku dhalleeceeyey in ay muddo dheer qarinaysay macluumaad la xidhiidha waxa ku dhacay inantan yar. Lavrov waxa uu intaas ku sii daray, “Inantan yari ikhtiyaarkeeda 30 saacadood kuma ay qarsoonayn” Laakiin garsoorka dalka Jarmalka oo baadhis dheeraad ah sameeyey ayaa warka wasiirka beeniyey kadib markii sida ay xaqiijiyeen in aan inantan yar la afduubin, lana kufsan.
Afhayeen u hadlay xeer-ilaalinta oo lagu magacaabo Martin Luithle ayaa isaga oo arrintan faahfaahinaya waxa uu yidhi, “Inantan yar talefankeeda gacanta ee burburay ayaa aanu ka helnay macluumaad aanu ku ogaannay in ay u hoyatay guriga wiil 19 jir ay asxaab yihiin ah oo u dhashay dalka Jarmalka. “Mushkilado dhinaca waxbarashada ka haystay ayaa sabab u ahaa in ay gurigooda ka dhaxdo” ayaa aanu intaas ku sii daray, sida ku cad warkan uu Geeska Afrika turjumay isaga oo xusay in baadhitaanno dheeraad ahna ay ku sii samayn doonaan.
Geeska Afrika oo soo xiganahaya wargeyska The Independent iyo ilo kale ayaa ogaaday in garsoorka Jarmalku uu inantan yar ku eedeeyey in ay hore xidhiidh ay raalli ka tahay ula yeelatay laba wiil oo midi Turki yahay, kan kalana Jarmal asalkiisu Turki ah ka soo jeedo yahay. Masuulkan oo sida loo fahmay u jawaabaya wasiirka arrimaha dibadda Ruushka, balse aan magac dhabin ayaa intaas ku sii daray, “Jarmalku waa dal sharci ka jiro, cadaadis siyaasi ah oo dibadda kaga yimidna waxba kama beddeli karo mabaadii’da dastuurkiisa”
Kooxaha midigta ee xag-jirka ah ayaa qisada inantan yar muddooyinkii u dambeeyey ka dhigtay sabab ay ku weeraraan dadka soo-galeetiga ku ah dalkaas, iyaga oo dariiqyada marka ay ku arkaanna ku tuura ereyo aflagaaddo ah, oo kufsiga la xidhiidha.
Qoyska ay inanta yari ka dhalatay ayaa dowladda Jarmalka ku eedaynaya in ay inanta yar culays ku saartay inay ka noqoto warka ay hore u sheegtay ee afduubkeeda iyo kufsiga. Wasiirka arrimaha dibadduna waxa uu Jarmalka ku eedaynayaa in arrintan sababo siyaasadeed awgood dowladdu u qarinayso.
Muddooyinkii u dambeeyey dalka Jarmalka waxaa cirka isku shareeray murannada siyaasiga ah ee la xidhiidha qorshaha ‘Albaabo furan’ ee ay raysalwasaaraha Jarmalka Angela Markel ku qaabisha dadka ajaanibka ah.
Xigasho Geeska Afrika