Caynaba (SLpost)- Afar ka mid ah ciidamada Booliska Degmada Caynaba ee gobolka Saraar, ayaa ku dhaawacmay rasaas kaga timi gaadiidka jaadka Qaada oo muddooyinkii u dambeeyey si qarsoodi ah dalka uga soo galinayey meelo ka mid ah xuduudda dalka, ka dib markii Wasaaradda Maaliyaddu ku Kordhisay Cashuuraha laga qaado.
Ganacsatada Jaadka ka soo waarida dhinaca dalka Itoobiya oo qaarkood ka biyo-diideen cashuur xukuumaddu ku kordhisay, ayaa maalmihii u dambeeyey sifo sharci-darro ah u marayey inay dalka ku soo geliyaan Jaadka iyaga ka baydhaya jidadka ay markii hore sida rasmi ah u soo mari jireen, cashuurtana lagaga qaadi jiray, waxaanay saddexdii todobaad ee u dambeeyey u wareegeen Kastamka Degmada Balli-gubadle oo ay sifo-sharci iyo mid aan sharci ahaynba uga soo galaan dalka, halka ay dhinaca kale, Gaadiidka qaadka ee gobollada Bari ee dalku maraan magaalada Caynaba oo Kastamka ugu weyn ee Cashuuraha wasaaradda Maaliyaddu ka hawl-galo.
Afartan Askari ee ku dhaawacmay magaalada Caynaba, ayaa ka dambeeyey ka dib markii Gaadhi ka mid ah Gaadiidka Jaadka ee Lagu cashuuro kastamka magaaladaasi, uu si xoog ah ku jiidhay kaantaroolka magaaladaas, ka dibna ay rasaas ku fureen askartii ku sugnayd Kaantaroolkaas oo ku yaala dhinaca Woqooyi-galbeed ee magaalada.
Wararka aanu ka helayno magaalada Caynaba, ayaa sheegay in sidoo kale falkan uu ku dhaawacmay Taliyaha Ciidanka Booliska ee Kastamka Caynaba oo dhaawacani ku yimi ka dib markii uu isku dayay inuu baabuurkiisa ku baacsado gaadhiga Jaadlaha ee Afarta Askari dhaawaca u geystay, haseyeeshee markii uu muddo eryanayey, ayaa gaadhigii uu watay la qalibmay.
Shirkadaha Qaadka soo waarida ayaa ka biyo-diiday cashuur-kordhin aan badneyn oo Wasaaradda maaliyaddu ku soo rogtay, waxaanay maalmihii u dambeeyey si kontarabaan ah uga soo geliyeen meelaha Xuduudda ku yaala ee Degmada Balligubadle ka mid tahay, iyaga oo ka baydhaya Kastamka Kala-baydh oo lagu cashuuri jiray.
Shirka jaadka ee Ina Af-diinle oo ka mid ah Shirkadaha cashuur-kordhintan ka biyo-diiday, ayaa intii ka dambaysay go’aanka wasaaradda Maaliyadda, waxa ay Qaadkooda ka soo gelinayeen magaalo-xuduudeedda Balli-gubadle oo Kastam Cashuureed ku yaalo.
Ganacsiga Jaadka oo Somaliland uga yimaadda dhinaca Ethiopia oo qayb ka ah ilaha dhaqaalaheeda, isla markaana dakhli-cashuureed ka soo galo dawladda, tiro shacab ahina nolol-maalmeedkooda kala soo baxaan, ayaa sannadkii malaayiin Dollar dalka dibadda uga saara, iyada oo aanay jirin badeecado kuwa gudihiisa ka soo baxa oo loo dhoofiyo Ethiopia si miishaanka dhaqaalaha dalka dibadda uga baxaa isu dheelli-tiro.
SOMALILANDPOST.NET