Nairobi (SLpost)- Wefti sare oo ka kooban wasiirro iyo masuuliyiin xukuumadda Somaliland ka tirsan, ayaa maanta magaalada Nairobi ee dalka Kenya kulan kula yeeshay Wakiillo ka socda saaxiibbada beesha Caalamka ee taageera horumarka iyo dimuqraadiyadda Somaliland.
Weftiga oo uu hoggaaminayo Wasiirka Arrimaha Dibadda iyo Iskaashiga Caalamiga Dr Ciise Keyd oo ay weheliyaan Wasiirka Maaliyadda Dr Sacad Cali Shire iyo Ergayga gaarka ah ee Madaxweynaha u qaabilsan wada-hadallada Soomaaliya Dr Edna Aadan oo Arbacadii toddobaadkan socdaal ku tagay magaalada Nairobi, ayaa maanta la kulmay Wakiillo ka socday beesha caalamka oo kala ah Denmark, Midowga Yurub, Finland, Germany, Netherlands, Sweden, Boqortooyada Ingriiiska iyo Maraykanka.
Madaxa Iskaashiga Caalamiga ah iyo Horumarinta ee Safaaradda Somaliland ku leedahay Nairobi, Ismaaciil Shirwac, ayaa war-murtiyeed uu ka soo saaray ku faahfaahiyey arrimaha ay ka wada-hadleen weftiga Somaliland iyo Beesha Caalamka, waxaanu sheegay in kulanku qayb ka yahay Barnaamijka Sanduuqa Horumarinta Somaliland, kaas oo weftigu warbixinno ka siinayeen beesha caalamka geeddi-socodka horumarka iyo isbeddellada ay xukuumadda Somaliland ku tallaabsatay.
“Weftigu waxa kale oo ay u caddeeyeen sida ay uga go’an tahay Somaliland inay sii xoojiso hannaanka dimuqraadiyadda iyo qabashada doorashooyin xor iyo xalaal ah,” sidaas ayuu sheegay Ismaaciil Shirwac.
Dhinaca kale, beesha caalamka ayaa soo dhaweysay ballan-qaadka Somaliland ee qabsoomidda Doorashada iyo sida ay madaxweyne Muuse Biixi iyo xisbiyada mucaaradka uga go’an tahay in doorashada madaxtooyada la qabto sannadka 2022. Waxa kale oo beesha caalamku soo dhaweysay sida ay xukuumadda uga go’an tahay ballanqaadka ah in la hubiyo in qorshaha horumarinta qaranka ee soo socda uu yeelan doono qorshe kooban oo mudnaan iyo qiimo ugu fadhiya dalka.
War-murtiyeed ay beesha caalamku magaalada Nairobi ka soo saareen maanta, ayaa sidoo kale lagaga hadlay muwaadiniin u dhashay Soomaaliya oo xukuumadda Somaliland dhawaan ka mastaafurisay magaalada Laascaanood oo muddo 30 sanno ka badan qaarkood qaxootinimo ugu noolaayeen.
Tallaabadan ayey beesha caalamku ku tilmaantay baro-kicin khasab ah oo Sharci-darro ah, sida lagu sheegay war-murtiyeed ay maanta soo saareen.
“In kasta oo saaxiibbada beesha caalamku ay ammaanayaan dimuqraadiyadda wanaagsan iyo horumarka dhaqaale ee Somaliland ku tallaabsatay sannadihii u dambeeyay, barakicinta khasabka ahi waxay leedahay dib-u -dhac khatar ah, waxaanu xukuumadda ugu baaqaynaa inay joojiso barokaca khasabka ah iyo xad -gudubyada sharci-darrada ah ee la arkay toddobaadyadii la soo dhaafay,” sidaas ayaa lagu yidhi war-murtiyeedka beesha Caalamka oo sidoo kale xukuumadda Somaliland ugu baaqay in la ilaaliyo ganacsiyada iyo hantidii ay lahaayeen dadka la mustaafuriyey.
Waxa kale oo war-murtiyeedka beesha caalamka lagu sheegay in weftigu Somaliland u sheegeen saaxiibbada caalamka sida ay Somaliland uga go’an tahay ilaalinta xuquuqaha aasaasiga ah ee bani’aadamka, ku-dhaqista Sharci loo siman yahay dhammaan dadka ku nool gudaha Somaliland.
Xukuumadda Somaliland ayaa horaantii bishan October magaalada Laascaanood ka fulisay hawl-gallo dad sharci-darro ku jooga dalka kaga mustaariyey magaalada Laascaanood, iyadoo xukuumaddu fulinta tallaabadaas ku tilmaantay mid lagu xoojinayo amniga magaalada Laascanood iyo rabitaan shacbiga magaalada ka yimi.
Sida lagu sheegay war-saxaafadeedka ka soo baxay Safaaradda Somaliland ee Nairobi, wefti Somaliland waxa ay saaxiibbada beesha Caalamku u sheegeen sababaha ku kallifay go’aanka magaalada Laascaanood lagaga mastaafuriyey muwaadiniinta u dhashay Soomaliya.
“Waxaanu u sheegnay saaxiibbada beesha caalamka in go’aanka Somaliland lagaga mustaafuriyey dadkaasi uu ku yimi arrimo dhinaca amniga la xidhiidha iyo codsiyo ka yimid bulshada deegaanka iyo maamulka degmada Laascaanood,” sidaas ayaa lagu yidhi war-saxaafadeedka.
Xukuumadda Somaliland ayaa hore u sheegtay inay jiraan Xogo sirdoon iyo talo-wadaag dhexmaray bulshada iyo Maamulka Gobolka, kuwaas oo ay sheegtay inay caddeyn buuxda u noqdaan in Dadka la mastaafuriyey khatar ku ahaayeen ammaanka degmada Laascaanood ee xarunta Gobolka Sool.
Somalilandpost.net
contact@somalilandpost.net