Qaahir (SLpost) – Mar kasta oo hogaamiye muddo dheer dalkiisa xukumayay isla markaana ku amar ku taaglayn jiray shacbigiisa laga itaal roonaado ee uu dibad wareeg noqdo, ayaa waxa dhacda inuu gaboodsado ama isticmaalo hab uu doonayo inuu kaga dhuunto ama kaga baxsado in la qabto oo caddaaladda la hor keeno.
Xaaladahani waa mid aadamiga ku abuuran, mana dhacdo inta badan in hogaamiye kali talisnimo iyo arxan daro isticmaalayay muddo dheer uu si bilaa dhibaato ah isku dhiibo oo uu dalbado in la caddaaladd mariyo. Sababo badan ayaana ugu wacan inuu taa sameeyo, kuwaas oo ay ka mid tahay isagoo cabsi ka qaba in danbiyadii uu galay la mariyo xukunkiisuna ku dhamaado deldelaad ama xadhig dheer oo inta noloshiisa ka hadhay uu ku dhamaysto xabsiga. Waxa kale oo baxsiga iyo khiyaamaynta dunida ee hogaamiyayaashaasi ku kacaan ugu wacan, lacagaha badan ee ay ka khiyaameeyaan dalkooda iyo shacbigooda wakhtiga ay xukunka hayaan.
Haddaba waxa shalay warbaahinta dunidda qaar ka mid ahii baahiyeen, sawiro laga yaabo inuu muqaal ahaan isku badalo hogaamiyihii hore ee dalka Libya si uu dalka uga baxo ka dibna uu inta wakhtigiisa ka hadhay ugu noolaado bilaa maxkamad iyo xadhig. Muuqaalada la soo bandhigay waxa ka mid ah, sawir aad ugu eg jilayaasha filimada ee Hollywood gaar ahaan jilaaga Tom Cruse oo kale, sawirkani wuxuu tilmaamaya Qadaafi oo timaha la baxay, gadh isku joogana leh, kuwaas oo dul iyo hoosba laga madoobeeyay, waxa sawirkan soo bandhigay, mid ka mid ah dadka qurxinta iyo labiska madaxda xeel dheere sare ku noqday oo u dhashay dalka Barasiil, ninkan qurxiyaha ah ayaa sheegay in Qadaafi jeclaystay sawir qaabkaas u eg wakhti ay kulmeena waydiiyay in qaabkaas oo kale uu noqon karo. Waxa kale oo sawirada la soo bandhigay ka mid ah, sawir hablaha dharka xayaysiiya u eg iyo muuqaal uu Qadaafi noqon karo haddii uu iska dhigo, kaas oo ah oday u labisan sida dadka Dawaariqa loo yaqaan ee saxaraha afrikada galbeed ku nool. Sababaha loo saadaaliyay sawiradan ayaa ah in laga sii hor dego qaab kasta oo Qadaafi dunida ku khiyaamayn karo.
Hogaamiyihii hore ee dalka Libya ayaa ku jira dhuumasho, waxaana beegsanaya oo baadi goobkiisa ku jira dhinacyo kala duwan, oo ay ka mid yihiin kuwo neceb, kuwo lacag ku doonaya oo baadi goobkiisu dhinacyo kala duwan dan uga yahay. Waxa kale oo miiska saaran Hal Milyan iyo lix boqol oo kun oo abaal marin loo siinayo qofkii nolol ama dhimasho mid uun ku qabta Qadaafi. Sida dadka arrimaha madaxda firdhadka ah ka faaloodaa sheegayaana dadka ugu badan ee beegsanaya kuna jira raad goobka Qadaafi ayaa ah dadka saxaraha ku nool ee Barbariyiinta oo uu wakhtigan ku sugan yahay dhulkooda, dadkan ayaa sababo dhaqaale iyo cadaawad ay u qabaan leh u beegsanaya Qadaafi.
Somalilandpost.net
Editor@somalilandpost.net