Madaxweynaha Somaliland oo si adag uga fal-celiyey Hadal ka soo yeedhay Madaxweynaha Soomaaliya oo Gole-weynaha Adduunka ee Qaramada Midoobay ka sheegay inuu muddo laba sanno ah ku soo celinayo Midnimadii Soomaaliweyn
Hargeysa (SLpost)- Madaxweynaha Somaliland Md Axmed Maxamed Maxamuud (Siilaanyo), ayaa sheegay in dawladdiisa iyo Shacabka Somaliland diyaar u yihiin inay dhiiggooda mar kale ku difaacaan qadiyadda madax-bannaanidooda, waxaanu shacabka ugu baaqay inay isku-duubnaadaan isla markaana ay il-kaliya ku eegaan cadowgooda.
Madaxweyne Siilaanyo, ayaa hadalkiisu daba-socday hadal ka soo yeedhay madaxweynaha Soomaaliya oo xarunta Qaramada Midoobay oo uu shir kaga qayb-galay ka sheegay inuu muddo laba sanno gudahood ah uu ku hirgelinayo midnimada dalkii laysku odhan jiray Jamhuuriyadda Soomaaliya, waxaanu madaxweyne Siilaanyo hadalka dhiggiisa Soomaaliya ku tilmaamay war khaldan iyo riyo aan waxba ka jirin oo uu dunida u gudiyey.
Md Axmed Siilanyo oo maanta khudbad ka jeediyey munaasibad ay ku qalin-jabiyeen arday waxbarashada ka dhammaystay Jaamacadda Hargeysa, waxa uu sheegay in dawladdiisa iyo shacabkuba diyaar u yihiin inay dhiiggooda u huraan cid kasta oo ku soo xad-gudubta xuduudaha ay Somaliland leedahay.
Madaxweynuhu waxa uu yidhi, “Waxaan jecelahay in aan kelmad ka idhaahdo Madaxweynaha Somalia iyo dawladiisa oo weli ku-naaloonaya midnimo, dunidana u tebinayey war khaldan iyo riyo aan waxba ka jirin.
Waxaan leeyahay Somaliland waa qaran madax-banaan, dadkiisuna way tashadeen waxaanay rabitaankooda ku dhisteen dawlad iyagoo codkooda 97% ku-meel-mariyey dastuurka JSL iyo jiritaankooda.
Midnimadii Somalia waa tii fashilantay, diyaarna uma-nihin durbaanka Somali-weyn, dadkaygu waxay diyaar u yihiin inay dhiigooda ku difaacaan cid kasta, oo ku soo xadgudubta xuduudaha dalkan Somaliland dhulkiisa, badiisa iyo cirkiisa. Waxay dawladda Somalia u muuqataa, in aanay ixtiraamayn wixii aanu ku heshiinay, kana warwareegayso miiskii wadahadallada, waxaanu weli idiinku baaqaynaa miiska wadahadalada si aynu u kala baxno.”
Md Siilaanyo waxa uu beesha Caalamka ugu baaqay inay ka garaabaan xuquuqda dawladnimo ee Somaliland ku leedahay adduunka. “Beesha Caalamka waxaan ugu baaqaynaa in ay garwaaqsadaan xaqiiqada Somaliland, waxaanu ugu baaqaynaa inay caawiyaan horumarka iyo dimuquraadiyada ka hana-qaaday dalkan, waa noo muhiim doorashooyinku waanan soo dhawaynaynaa doorka ay ka qaataan deeq-bixiyayaashu,” ayuu yidhi Madaxweynuhu.
Ugu dambayntii, waxa uu madaxweynuhu Isku-duubni ugu baaqay shacabka Somaliland, waxaanu yidhi, “Dadka Somaliland waxaan ugu baaqayaa inay is-ku-duubnaadaan, Dalka illaashadaan meelna uga soo wada jeedaan cadawgooda.”
Madaxweynaha Soomaaliya Xasan Sheekh Maxamuud oo khudbad ka jeediyey fadhigii 69aad ee Jimciyadda Quruumaha ka dhaxayso uu todobaadkan kaga qayb-galay xarunta guud ee Qaramada Midoobay ku leedahay magaalada New York ee Maraykanka, waxa uu sheegay inuu muddo laba sanno gudahooda ah ku soo celinayo midnimadii Soomaaliya.
“Waxaanu leenahay waddan immika ku socda inuu u midoobo Qaran ahaan, annaga oo hindisahayagu in sannadka 2016-ka la helo Soomaaliya oo midaysan,” sidaas ayuu madaxweynaha Soomaaliya ka yidhi Xarunta Guud ee Golaha Ammaanka.
SOMALILANDPOST.NET