Hargeysa (SLpost)- Maxkamadda Ciidammadda Qaranka Somaliland, ayaa maanta fadhi ay yeelatay xarunta taliska guud ee ciidanka qaranka waxay xukuno dil iyo xabsi daa’in iskugu jira ku xukuntay qaar ka mid ah 28 malleeshiyo beeleed oo shalay lagu qabtay weerar ay ku qaadeen saldhigga ciidamada qaranka ee Bariga Caasimadda Hargeysa.
Xukunka lagu riday kooxdan oo dhegaysiga dacwaddoodu saaka 7:30 subaxnimo ka bilaabmay maxkamadda ciidamada Qaranka JSL ayaa lagu sheegay in 17 ka mid ah malleeshiyo-beeleedkan lagu xukumay dil toogasho ah, 5 kalena lagu xukumay xabsi daa’in halka saddex kalena xorriyaddooda loo soo celiyey ka dib markii ay ku caddaan weyday inay ku lug lahaayeen Dambiga Qaranka laga galay.
Xeer ilaaliyaha Guud ee Maxkamadda Ciidamada JSL Ibraahim Cabdi Xaaji Maxamuud oo waraabinta u warramay ayaa tafaasiil dheeraad ah ka bixiyey natiijada ka soo baxday go’aanka dacwadda lagu oogey iyo qaraarka maxkamadda.
“Saaka Todobadii iyo Badhkii ayey maxkamaddu dacwadda u fadhiisatay dambiga nimankaas loo aanaynayey, galabta Afartii iyo Badhkii ayaa lagu dhawaaqay oo ay soo gabo-gabawday. Maxkamaddu waxay xukuntay 22 ka mid ah oo 17 lagu xukumay dil toogasho ah. Shan ka mid ahna waxay ku xukuntay xabsi daa’in, saddex ka mid ahina dhaawac ayey ahaayeen oo maxkamaddu dib ayey u dhigtay dacwaddooda oo marka la soo daweeyo ayaa kiiskooda la qaadayaa, saddexda soo hadhayna wax dambi ah waa lagu waayey oo waa la sii daayey,” ayuu yidhi Xeer ilaaliye Ibraahim.
Xeer ilaaliyuhu waxa uu kale oo uu sheegay in 22 ka qof ee xukunku ku dhacay ay maxkamadda horteeda ka qirteen inay iyagu soo weerareen xerada Ciidamada Qaranka iyaga oo hubaysan isla markaana ay maxkamaddu soo xaadirisay markhaatiyaal ku filan si xukunkan loogu rido.
Wasiirrada Arrimaha Gudaha, Gaashaandhigga iyo labada Taliye ee Ciidamada Qaranka iyo Booliska ayaa shalay soo bandhigay saanad milatari oo culus oo laga qabtay kooxda weerarka ku qaadday saldhigga Ciidamada Qaranka ee Soodaani taas oo sababtay dhimashada saddex ka mid ah ciidamada Qaranka, Laba ka mid ah Maleeshiyo beeleedka weerarka soo qaaday iyo laba qof oo Shacab ah.
SLpost News/Hargeysa