Hargeysa (SLpost)- Guddoomiyaha Golaha Wakiillada Somaliland ahna Guddoomiyaha Xisbiga Muacaaradka ah ee WADDANI Cabdiraxmaan Maxamed Cabdillaahi (Cirro), ayaa la sheegay inuu caddeeyey in uu khaldanaa Xeerka uu hore ugu gudbiyey Golaha Guuritda ee ku saabsanaa diiwaangelinta Muwaaddinka iyo Cod-bixiyeyaasha, ka dib markii uu sixitaan ku sameeyey qodobbo ku jiray Xeerkii qabyo-qoraalka hore Golaha Guurtidu ugu soo celisay khaladaad ku jira awgeed, balse aanu isagu aqbalin, kuna eedeeyey in laga dambeeyo carqaladayntiisa.
Xeerka Diiwaangelinta Muwaaddinka iyo Cod-bixiyeyaasha doorashada oo hore Golaha Wakiilladu u ansixiyeen, balse la sheegay inaan nuqulkii rasmiga ahaa ee Wakiilladu aqlabiyadda ku ansixiyeen loo gudbin Golaha Guurtida, ayaa sida ila-wareedyo xog-ogaal ahi noo xaqiijiyeen uu Guddoomiyaha Wakiilladu Cabdiraxmaan-Cirro u gudbiyey Guddoomiyaha Guuritda Saleebaan Maxamuud Aadan qoraal uu ku soo saxay afar qodob oo ka mid ahaa khaladaadkii ku jiray nuqulka hore loogu gudbiyey Guurtida.
Guddoomiyaha Golaha Wakiillada Somaliland Md. Cabdiraxmaan Maxamed Cabdillaahi (Cirro), ayaa la sheegay in qoraal uu khamiistii toddobaadkii dhammaaday oo ku beegnayd 30-kii October ee 2014-ka u gudbiyey Guddoomiyaha Guuritda Md. Saleebaan Maxamuud Aadan ku soo saxxay qodobbada 7-aad, 25-aad, 26-aad iyo 29-aad, oo hore Golaha Guurtidu uga codsadeen in la soo waafajiyo sidii rasmiga ahayd ee Wakiilladu codka aqlabiyadda ah ugu ansixiyeen, marka laga reebo qodobka 29-aad oo aan ku jirin qoraalka Guurtida.
Sixitaanka Guddoomiyaha Wakiiladdu xilligan ku soo sameeyey qodobbadii khaldanaa ee ku jiray Xeerka hore Golaha Wakiilladu u ansixiyeen, balse aan loo gudbin nuqulkii rasmiga ahaa Golaha Guurtida, ayaa imanaya toddobaad ka dib xilli marar badan Guddoomiye Cirro laf ahaantiisa iyo Xisbiga WADDANI iyo Xildhibaannada Golahaas ee Mucaaradka ahi-ba ku celcelinayeen inaanu jirin khalad ku jira Xeerkii Guurtidu dib u soo celisay ee diiwaangelinta, balse ujeeddadu tahay mid Xukuumaddu ku doonayso inay ku carqaladayso qabsoomidda doorashooyinka, Guurtiduna gacan ku siinayso.
Qodobbadan Khamiistii Guddoomiye Cirro sixitaanka ku soo sameeyey, ayaa qeyb ka ah qodobbo gaadhayey sagaal oo dhaliyey khilaaf Golaha Wakiilladu ugu kala qeybsamay laba garab oo dhinac weliba ku doodayey in dhinaca kale khaldan yahay, Xildhibaannada taageersan Xukuumadda iyo Xisbiga KULMIYE ee talada haya, ayaa ku doodayey oo inay u gudbiyeen Guddoomiye Cirro inuu jawaab ka soo bixiyo, qaladaadka Xeerka ku jira, iyagoo diiday inay ka qaybgalaan Kal-fadhi aan caadi ahayn oo Guddoomiyuhu isugu yeedhay Mudanayaasha Golahaas si Xildhibaannadu u ansixiyaan Xubnaha cusub ee Guddiga doorashooyinka Qaranka ee bishii hore Liiska Magacyadooda Maxweynuhu u soo gudbiyey Golaha Wakiillada.
Tallaabada immika Guddoomiyaha Wakiilladda Cabdiraxmaan-Cirro qaaday, ayaa u muuqata mid lagu soo dabbaalayo, laguna asturayo khaladaad sharci-jebin ah oo lagu eedeynayo in Guddoomiye Cirro sameeyey, balse waxa la eegi doonaa sida Xildhibaannada dhinaca KULMIYE iyo Xukuumadda taageersani u arki doonaan iyo inay ku qanci doonaan aqbalaadda khaladaadka ay sheegeen inuu jiray iyo sixitaanka uu haatan ku dhiirraday Guddoomiye Cirro. Waxaanay Xildhibaannada Muxaafidka ahi ku hanjabeen inay xilka ka qaadi doonaan Guddoomiyaha Golaha Wakiillada, halka ay Xildhibaannada Mucaaradka ahina hanjabaaddaas kaga jawaabeen inay iyaguna Maamuus-ka-xayuubin ku samayn doonaan Madaxweynaha.
Qodobka 7-aad ee xilligan Guddoomiye Cirro la sheegay inuu sixitaanka ku soo sameeyey, ayaa ka hadlaya ansixinta Diiwaangelinta, waxaanu u dhignaa sidan:- ‘Wasaaradda Arrimaha Gudaha ayaa ka masuul ah ansixinta Diiwaangelinta Muwaadinnimada iyadoo Komishankuna u xilsaaran yahay diiwaangelinta Cod-bixiyeyaasha ee doorasho kasta. Hase-ahaatee, Komiishanku (Guddiga doorashooyinku) waa inuu furo diiwaangelinta Cod-bixiyeyaasha muddo aan ka yareyn lix bilood ka hor xilliga doorasho kasta, si loo diiwaangeliyo Cod-bixiyeyaasha cusub, loona tirtiro Cod-bixiyeyaashii hore loo diiwaangeliyey ee Xeer ka reebay in dib loo diiwaangeliyo.
SOMALILANDPOST.NET