Hargaysa (SLpost)- Wasiirka Wasaarrada Kalluumaysiga Somaliland Cabdillaahi Jaamac Cismaan (Geeljire), iyo Agaasimaha Guud ee Wasaarradaas ayaa maanta hortagay isla markaana xog-waraysi shaqadooda khuseeya siiyey Guddiga Joogtada ee Golaha Guurtida Somaliland.
Guddoomiyaha Guddida joogtada ee Golaha Guurtida Somaliland Muxumed Aw Axmed ayaa ugu horeyn waxa uu Wasiirka ku soo dhaweeyey inuu xog-warran faah-faahsan ka siiyo hawlaha shaqo ee ay Ummadda u hayaan Wasaaradaasi iyo halka ay hadda wax u marayaan si ay Guddida joogtadu macluumaad sax ah uga qaadato hawlaha wasaaradaas oo dhammaystiran, isla markaana waxa uu ku war-geliyey in markaas ay Xidhibaanadu Su´aallo waydiin doonaan.
Wasiirka Wasaarrada Kalluumaysiga Cabdillaahi Jaamac Cismaan (Geeljire), waxa uu sheegay in Wasaarrada Kalluumaysigu ay Qaranka kaalin muhiima ugu jirto, isla markaana ay ka mid tahay Wasaarrada ugu horeeya xagga wax soo saarka, isagoo ka dhawaajiyey in markii uu yimid Wasaarrada Kalluumaysig uu buuq badani ka jiray, hase yeeshee uu ku guulaystay inuu arrintaas ka dhameeyo.
Wasiirka Kalluumaysigu waxa uu daboolka ka qaaday in qaab dhismeedkii hore ee Wasaarradaaas ay wax badan ka badaleen, isla markaana ay dardar-gelin ku sameeyeen wax soo saarka Kalluunka oo uu sheegay inaanay markii hore Bulshada reer Somaliland wada fahamsanayn faa´iidooyinkiisa, waxaanu carabaabay inay hadda ku hawlan yihiin sidii ay suuqyo dibadeed oo Kalluunka loo dhaafiyo u yeelan lahaayeen, waxaanu yidhi “Ruqsadaha maraakiibta waanu adkaynay, inkastoo Xukuumaddu u baahan tahay Dakhli, haddana ilaa 25 Markab ayaa hadda aanu siinay Ruqsada, waxaana Baddeena hada ku jira Laba Markab oo kaliya. marka la eego dhinaca Wasaarrada waxaanu u samaynay qaab dhismeed cusub.” Ayuu yidhi Wasiirka Wasaarrada Kalluumaysiga Somaliland Cabdillaahi Jaamac Cismaan Geeljire
Wasiirka Wasaarrada Kalluumaysiga Cabdillaahi Jaamac Cismaan (Geeljire), waxa uu sheegay in Kalluumaysigu uu dalka soo geliyo Dakhli aad u badan, waxaanu yidhi Dakhliga Sannadkan, Sagaal bilood u soo xerooday waa Slsh 1, 082,364,000. Dakhligaasi waa inta ka soo Xerootay Kalluumaysiga Maraakiibta oo kaliya, hase yeeshee waxa jira Malaayiin Shallinka Somaliland ah oo ka soo Xeroota Laysamada, diwaangelinta Shirkadaha. isagoo hadalkiisa sii watana waxa uu yidhi “ Magaalada Hargaysa waxa maalintii lagu isticmaallaa 3,3.5 Ton, halka Magaalada Burco lagu isticmaallo 1,5 Ton, hase ha ahaatee labadaas Magaalo waxa ay maalintii isticmaali karaan Kalluunkaas ka badan oo u dhigma ilaa 10 Ton, balse Kalluunka soo galaya ayaa ku yar.” ayuu yidhi Wasiirka kalluumaysiga Somaliland Cabdillaahi Jaamac Cismaan Geeljire.
Wasiirku waxa kale, oo uu sheegay in Suuq baaxad leh uu uga banaan yahay Wadanka aynu jaar nahay ee Ethiopia, kaasoo uu sheegay inay Mustaqbalka waddaan qorshe loogu dhoofinayo Kalluunka iyo Milixda.
Somalilandpost.net
Editor@somalilandpost.net