WASHINGTON (SLpost)- Dawladda Maraykanka, ayaa hanjabaad daan-daansi u muuqata u jeediyey dawladd Ruusha oo ay uga digtay inay qalalaasaha bani’aadamnimo ee ka taagan dalka Ukraine marmarsiinyo uga dhigtaan duullaan milatari oo ay ku qaadaan, tallaabadaas oo Maraykanku ku tilmaamay mid aan la aqbali karin.
Digniinta Maraykanka, ayaa ku soo beegantay ka dib markii dawladda Ruushku ay qaban-qaabisay kolonyo gaadiid mucaawimooyin u sida shacabka ku dhaqan Bariga dalka Ukraine ee ka qaxaya dagaallada u dhexeeya Malleeshiyaadka gobonimo-doonka ah iyo Ciidamada dawladda Ukraine oo wakhtigan kaabiga u saaran inay la wareegaan magaalada Donetsk oo malleeshiyaadku ka taliyaan.
Safiirka dawladda Maraykanka u fadhiya Qaramada Midoobay Samantha Power, ayaa Golaha Ammaanka ee Qaramada Midoobay u sheegtay Jimcihii in hay’adaha caalamiga ah ee gar-gaarku ay ku sugan yihiin bariga dalka Ukraine isla markaana ay caawimo u fidinayaan dadka shacabka ah ee ku dhex-xanniban malleeshiyaadka taageerada ka hela Ruusha iyo Ciidamada Ukraine.
“Tallaabo kasta oo Ruushku farogelin ku sameeyo dhulka Ukraine, oo ay ku jiraan hay’adahooda gaargaarka bixinaya, ma noqon doonto mid la aqbali karo, waxaananu si qoto dheer u shaacinaynaa, una arki doonnaa inay tahay duullaan lagu qaaday Ukraine,” sidaa waxa tidhi ergayga Maraykanka u qaabilsan Qaramada Midoobay.
Xukuumadda Moscow, ayaa la sheegay inay qorsheysay kolonyada gaadiidka mucaawimooyinka sida inay ka tallaabaan Xuduudka Ukraine iyaga oo isticmaalaya magaca Guddiga caalamiga ah ee Lan-qeyrta Cas, haseyeeshee waxa shaki laga muujiyey doorka ay ICRC-du ku yeelan doonto gudbinta mucaawimooyinka.
Ciidamada Ukraine ayaa kaabiga u saaran magaalada Donetsk oo xarun u ah Bariga dalka Ukraine halkaas oo ay ka taliyaan malleeshiyaad taageero milatari iyo mid dhaqaale ahba ka hela dawladda Ruushka, waxaana magaaladaas ku xanniban boqolaal dad ah oo ciidamada labada dhinac isku dul haystaan, halka qaar kale ay labadii maalmood ee u dambeeyey ka qaxayeen, taas oo sababtay in qaylo dhaan caalami ah laga jeediyo gar-gaar deg-deg ah oo shacabku u baahan yihiin.
Qaramada Midoobay, ayaa sheegtay inay diyaar u tahay kor-u-qaadista taageerada dedaallada dhinaca gar-gaarka ee dawladda Ukraine, sida uu war-murtiyeed ku sheegay xoghayaha Guud ee Qaramada Midoobay Ban Ki-moon.
“Haddii ay xaaladda bani’aadamnimo ka sii darto sida ay immika tahay, ama haddii dedaallada heer qaran ee xaaladda lagaga jawaabayo ku filnaan waydo inay daboosho baahida bani’aadamnimo, Qaramada Midoobay waxay diyaar u tahay taageero kasta oo lagu xoojinayo baahida jirta,” ayuu xoghayaha guud ee Qaramada midoobay ku sheegay war-murtiyeedka uu soo saaray. Isaga oo intaas ku daray, “Marxaladda immika, xaaladda waxa gacanta ku haysa dawladda Ukraine oo kaashanaysa saaxiibbadooda caalamka.”
Dagaallada ka socda Bariga dalka Ukraine oo haatan socday muddo Afar bilood ah, waxa ku dhintay 1,300 qof, waxaana ku baro-kacay dad tiradooda lagu qiyaasay 285,000 oo qof. Sidoo kale dagaaladani waxa ay cirka ku sii shareereen xidhiidhadii ka dhexeeyey waddamada reer galbeedka iyo Ruushka oo halkii ugu hooseysay maraya tan iyo wixii ka dambeeyey dagaalkii qaboobaa ee sahayday Midowgii Soofiyeeti.
SOMALILANDPOST.NET