Hargeysa (SLpost)- Falal budhcad-nimo oo shaqaale ka tirsan Waaxaha Cashuuraha Barriga ee Wasaaradda Maaliyaddu ku leexsan jireen Cashuuraha ay dadweynaha ka qaadaan, ayaa la sheegay in Madbacadka Qaranku qayb ka ahayd Buugaag Foojagari ah oo loo adeegsaday Lunsiga Cashuuraha, ka dib markii Hanti-dhowrka Qaranku Baadhitaan ku sameeyey Silsilado isku xidhan oo xatooyadan u badheedhay.
Shaqaalahan oo Hanti-dhawrka Qaranku ku qabtay Buugaag been-abuur ah oo loo adeegsaday falalkan Budhcadnimo, kana hawl-gala Cashuuraha Berriga ee Magaalada Berbera, ayaa qaarkood Xabsiga Loo taxaabay isla markaana wakhtigan baadhitaan lagu wadaa, si loo xaqiijiyey sil-silad taxan oo lagu tuhmay inay heshiis ku yihiin Xatooyada Qaran.
Sidoo kale, Hanti-dhowrka Qaranku waxa uu dorraad Xabsiga u taxaabay mid ka mid ah shaqaalaha Madbacadda Qaranka oo lala xidhiidhiyey Taxanta Xatooyada Qaran ka dib markii baadhitaan lagu sameeyey Madbacadda Dawladda oo Qandaraas ku haysata Daabacaadda Buuggaagta Kala Duwan ee Dawladda.
Haseyeeshee waxa warkan ku gacan-saydhay Maareeyaha Madbacadda Qaranka Md Cabdilaahi Maxamed Jaamac (Carey) oo beeniyey in buugaagta Buugaagtaas Wax lagu dhacay aan Madbacadda lagala bixin.
Maareeyaha Madbacadda Dawladda oo maanta Shir-jaraa’id ku qabtay Xafiiskiisa, waxa uu ku sheegay inaanu Hanti-dhawrka Qaranku wax baadhitaano ah xiligan ka wadin Madbacada, balse uu ku eekaa Fal uu daba socday oo ku waajahnaa Waraaqaha lagala baxay Madbacadda Qaranka oo lagu eedeeyay Sidiiq Cali Seed oo ka mid ah Shaqaalaha Madbacadda.
Maareeya Cabdilaahi Caray oo ka waramaya kiiskan Hanti-dhawruhu ku qabtay Waraaqahaasina, waxa uu yidhi “hadii aan arintii Madbacada ka dhacday ka wararamo, horta waxa baadhitaan ah oo Madbacada ka bilaamay ama ku socdaa jiro , laakiinse waxa jirtay Maalintii salaasadii ee doraad, ayay noo yimaadeen qolada Hanti-dhawrku iyagoo war daba socda, kolkaa warkii ay iyagu daba socdeen way fushadeen, dabadeedna waxay halkan madbacada ka qabteen laba Nin oo midi yahay agaasimaha waaxda Farsamada, midna yahay Ninkii hayay Mishiinka waraaqaha lambarada u sameeya oo la yidhaahdo Sidiiq Cali Seed”.
Isagoo hadalkiisa sii wata waxa uu yidhi. “Laba saacadood ka dib wixii waraysi ah ee ay ka rabeen Agaasimaha Farsamada way soo daayeen , ninkii kalena ilaa hada baadhitaan ayaa ku socda, waxa ugu badan ee meesha yaalaana waxa weeye waraaqo iyo Buugaag la daabacay, markaa buugaag runtii la xaday iyo buugaag la daabacay midna ma jiraan, taa cid waliba waa ogtahay haday Wasaaradda Maaliyadda iyo haday tahay Hanti-dhawrka Guud, anigana halkan waa laygu keenay oo waa ilaa afar shan waraaqood.
Afar shan waraaqoodna waa la heli karaa oo inanka meesha ka shaqaynayay wuxuu joogay meesha Farsamadu ka socoto, meesha farsamadu ka socotana waa waadh, dee waadhkana lagama waayayo Maqas iyo Baandheys dhulka ku dhacay midna lagama waayayo oo waa laga helaa, markaa waxa dhici kaarta Waraaq Lambarka badh maqanyahay oo aanu saani ugu wada dhicin waa la heli karaa, waraaq kale oo dheeraad ah oo loogu talo-galay in hadhow hadii wax dhinaadaan waa la heli karaa, qof meeshuu ka shaqaynayay xadayana lagama joojin karo, inkasta oo aanan hada ku cadaynayn oo aan hubin wuxuu qaatay, laakiinse hadana afar waraaqood qof shaqaale ahi jeebadda wuu gashan karaa, inkasta oo shaqaalaha Madbacadda qaranku mudadii ay halkan ka shaqaynayeen aan lagu arag oo ay aad iyo aad ugu amaananyihiin , qaab aanu u ilaalino oo amaanka aahna meeshi way leedahay.”
Ugu dambeyn Maareeyuhu waxa uu hadalkiisa ku soo gabagabeeyay isagoo sawirayo in Waraaqahan suuqa laga qabtay, lagu farsamayn karo Madbacaddo kale, maadaama Ninka Farsamo yaqaanka ah ee lagu hayaa farsamda Garanayo meeshuu doono ka daabacan karo waraaqo la mid ah kuwii Madbacadda qaranku soo saaraysay “markaa arinta meesha ka dhacday waa intaa wargeysyadu qoreen, baadhisbaanay ku jirtaa arintu, waxa la baadhayaana waa waraaqo, mid kalaa iyaduna dhici karta Ninka Shaqaalaha ah ee Meesha ka shaaqaynayay mar hadii Cabirkii Waraaqda garanayo, mishiinkan gacanta ee lagu dhufto waraaqduna Dukaan walba waa yaalaa, markaa madbacadu doono ayuu ka samayn karaa mar hadii Farsamadii hayo”ayuu yidhi Mudane C/Laahi Maxamed Jaamac (Carey).
Hanti-dhowrka Guud ee Qaranka, ayaa dhawaan Xabsiga u taxaabay Shaqaale ka tirsan Waaxda Cashuuraha Berriga ee magaalada Berbera, ka dib markii la ogaaday Buugaag aan Diiwaanka ku jirin oo loo adeegsaday in Shacabka lagaga Qaado Cashuuraha, kuwaas oo fashilmay ka dib markii baadhitaan iyo Isberberdhig lagu sameeyey Numberrada buugaagta cashuurta lagu bixiyey oo aan Serial-numberkoodu is-waafaqin.
SOMALILANDPOST.NET