Hargeysa, 04 Feb 2012, (SLpost)- Madaxweynaha Somaliland Md. Axmed Maxamed Maxamuud (Siilaanyo) ayaa kulamo gooni-gooni ah Qasriga madaxtooyada kula yeeshay Goleyaasha Baarlamanka, Qaar ka mid ah Madax-dhaqameedka, Ururrada Arrimaha Bulshada iyo Ururrada Siyaaasadda Somaliland si uu uga talo galiyo ka-qayb galka Shirka London ee Soomaalida iyo doorka Somaliland uga bannaan.
In kasta oo aan saxaafadda loo ogolayn kulamadan, haddana waxa natiijada kulamadaas la iskula qaatay inay Somaliland ka qayb-gasho shirkaas isla markaana ay xukuumadda ku taageerayaan tallaabo kasta oo danta Somaliland ku jirto.
Madax-dhaqameedka kulanka la yeeshay madaxweynaha oo ka dib markii uu dhammaaday kulankoodu warbaahinta u warramay ayaa sheegay inay isla af-garteen in laga qayb-galo shirka London. Salaadiintu waxa ay madaxweynaha ku ammaaneen inuu ka talo-galiyo go’aan qaadashada masiirka umadda gaar ahaan ka-qayb-galka shirka dawlada Ingiriisku kooxaha Soomalida ugu qabanayso London, waxayna tilmaameen inay haboon tahay in Somaliland shirkaasi ka qayb-gasho.
Suldaan Axmed Daahir oo ugu shirkaasi ka hadlay ayaa si weyn ugu mahad naqay Madaxweynaha Somaliland iyo Golihiisa wasiirada oo uu uga mahad celiyay sida ay uga aqbaleen talooyin badan oo ay u jeediyeen “Waxaanu ka soo baxnay shir aanu la yeelanay madaxweynaha Somaliland iyo Wasiiro oo aanu ka wada hadalnay go’aanka ay gaaadheen ee in laga qayb galo shirka London lagu qabanayo oo lagu soo casuumay dawlado badan oo ay ka mid tahay Somaliland, kaasoo aanu hore anagu hadii aanu nahay Golaha Salaadiinta si gaar ah u falan qaynay, ka dibna waxaanu isla garanay inay maanta haboontahay in laga qayb galo”ayuu yidhi Suldaanku waxaanu intaa ku daray “Nasiib wanaag madaxweynaha iyo dawladu waxay go’aamiyeen , oo ay naga talo geliyeen in lala qaato go’aanka ay soo jeediyeen oo shirkaasi si mug leh looga qayb galo, anaguna anagoo ka wakiil ah umadda Jamhuuriyada Somaliland waxaanu ku taageernay in laga qayb galo shirkaasoo maanta waxa inoo diidayaa jirin, waayo oo dawlad isku dheeli tiran ayaynu”
Suldaan Axmed Daahir waxa kale oo uu soo qaaday “Markaa Madaxweynaha iyo dawlada waanu ku taageersanahay in laga qayb galo shirka, waanan ugu ducaynaynaa, shacbiga reer Somaliland meel kasta oo ay joogaana waxaan lu soo jeedinaynaa inay go’aankaa nala qaata”
Waxa isna kulanka xog-waranka ah ee ay la yeesheen Madaxweynaha ka hadlay Suldaan Aadan faarax Cumar oo sheegay inay soo dhaweeyanayaan ka salaadin ahaan shirka ka qaybgalkiisa “ Madaxweynaha Somaliland iyo Wasiiraddu go’aanka ay gaadheen ee shirka London ee ay ka soo qaybgaleen dawlado badan oo ay ka mid yihiin Somaliland oo lagu casuumay shirka London.Haddaanu nahay Golaha Salaadiinta hore ayaanu arrintan u falaqaynay oo shirka London uga haddalnay marka waxaanu majoorati ahaan, isla garanay inay maanta haboontahay in shirka laga qaybgalo.”Ayuu yidhi Suldaan Aadan Faarax Cumar waxaanu inta sii raaciyey hadalkiisa “Nasiib wanaag dawladu waxay go’aamiyeen oo ay naga talo-galiyeen in lala qaato go’aanka shirka.Arrintaasina waanu la qaadaynay xukuumada in si mug leh looga qayb galo shirka London”
Dhinaca kale, waxa uu madaxweynuhu kulan noocan oo kale ah Hoteel Maansoor kula yeeshay Xildhibaannada labada Gole-qaran oo uu Qado-sharaf ugu sameeyey. Kulankan oo aan saxaafadda loo ogolayn, waxa uu madaxweynaha iyo xildhibaannada labada gole isla qaateen in ka hor inta aan laga qayb-galin shirka magaalada London, in labada gole la horkeenno si loo ansixiyo.
Madaxweyne Siilaanyo ayaa habeen hore kulan wada-jir ah la yeeshay Hoggaamiyeyaasha Saddexda Xisbi qaran kaas oo uu ugu soo bandhigay in dawladda Ingiriisku wax-ka-beddel ku samaysay qaabkii ay Somaliland shirkaas uga qayb-gali lahayd, waxaanay madaxweynaha iyo hoggaamiyeyaasha Xisbiyadu isla qaateen in shirkaas laga qayb-galo oo laga muujiyo rabitaanka iyo horumarka Somaliland.
SOMALILANDPOST NEWS
webmaster@somalilandpost.net