Hargeysa (SLpost)- Madaxweynaha Jamhuuriyadda Somaliland Md Muuse Biixi Cabdi, ayaa munaasibadda Ciidul-Adxaha awgeed cafis ugu fidiyey 546 Maxbuus oo ku jira xabsiyada dalka.
Wareegto madaxweyne oo sumaddeedu tahay JSL/XM/WM/222-900/072022 ayuu madaxweynaha Somaliland cafis ugu fidiyey maxaabiista dambiyada fudud ku xukuman ee jira xabsiyada dalka laga bilaabo taariikhda maanta.
Madaxweynuhu waxa uu wareegtada ku sheegay inaanu Cafiskani saamayn ku lahayn xuquuqda Madaniga ah iyo Raadka ciqaabeed ee ka dhalan kara dembiyada ay ku xukunnaayeen, iyadoo amarka cafiska madaxweynaha uu fulinayo Xafiiska Xeer-Ilaaliyaha Guud ee Qaranka.
In kasta oo wareegtada madaxweynaha oo lagu faafiyey war-saxaafadeed ka soo baxay madaxtooyada aanay ku lifaaqnayn liiska magacyada maxaabiista la cafiyey oo loo gudbiyey xeer-ilaalinta Guud, haddana waxa xusid mudan in Salaasadii toddobaadkan xabsiga laga sii daayey xubno siyaasiyiin ah oo ka tirsan xisbiyada Mucaaradka oo xorriyadooda dib u helay kaddib muddo Afar toddobaad ah oo ay xidhnaayeen.
Sidoo kale, waxa Isniintii toddobaadkan xoriyaddooda dib u helay laba suxufi oo maxkamadda gobolka Hargeysa ku xukuntay xadhig sannad iyo badh ah kaddib markii lagu eedeeyey inay ku kaceen muuqaallo amniga waxyeello u geysanaya ka faafiyeen dhacdo laba bilood ka hor ka dhacday xabsiga Dhexe ee Hargeysa, taas oo sababtay inay gadood sameeyaan qaar ka mid ah maxaabiista ku jira.
Labada Suxufi oo ka kala tirsan telefishannada MMSomali Tv iyo Horn Cable tv, ayaa Xabsiga ku jiray muddo 80 maalmood ah.
Sii-deynta siyaasiyiinta Xisbiyada Mucaaradka ayaa la rumaysan yahay inay qayb ka ahayd bilowga dhex-dhexaadin iyo waan-waan ay guddi is-xil-qaantay ka dhex-bilaabeen xukuumadda iyo Xisbiyada Mucaaradka ah oo isku khilaafsan arrimaha Doorashooyinka.
Haseyeeshee, lama oga in liiska maxaabiista uu madaxweynaha Somaliland cafiska u fidiyey ay ku jiraan siyaasiyiinta iyo suxufiyiinta xorriyadooda dib u helay oo lagu sii daayey cafis madaxweyne.
Somalilandpost.net
contact@somalilandpost.net