Accra (SLpost)-Madaxweynihii dalka ku yaalla Galbeedka Afrika ee Ghanna John Evans Atta Mills, ayaa xalay ku geeriyooday cisbitaal ku yaalla Magaalada caasimada ah ee Accra.
Sida uu sheegay xafiiskiisu Madaxweynaha waxa uu Madaxweynuhu ku geeriyooday cisbitaal , ka dib markii loola cararay xanuun shalay ku soo booday, isaga oo dhawaan ka soo laabtay socdaal caafimaad oo ku tagay dalka Maraykanka.Kulan ay isugu yimaadeen baarlamanka dalka Ghana ayaa xilka Madaxweynenimada loogu dhaariyaya Madaxweyne ku xigeenkii John Dramani Maha oo xilka hayn doono illaa bisha December ee sannadkan , waxaana lagu dhawaaqay toddobaad baroor-diiq Qaran ah,iyada oo hoos loo dhigay calanka dalka Ghana.
Madaxda caalamka iyo Qaramada Midoobay ayaa tacsi u diray Madaxweyne John Atta Mills oo ay ku tilmaameen nin dadaal ugu jiray sidii uu dalkiisa u horumarin lahaa.
Madaxweyne Barack Obama oo ay kulmeen sannadkii 2009-kii markii uu booqashadiisii ugu horeysay ku maray Qaaraada Afrka , ayaa sheegay in uu ahaa hogaamiye u adeegayay shacabkiisa“ Madaxweyne Mills isaga oo ka dadaalan waxa uu u shaqeeyay sidii uu horumarin lahaa nolosha dadka reer Ghana” ayuu yidhi Obama.
Xog-hayaha guud ee Qaramada Midoobay Ban Ki Moon, Madaxda dalalka Nigeria, Ivory Coast, Toga iyo hogaamiyayaasha kale ee caalamka ayaa iyana dadka reer Ghana ka tacsiyeeyay dhimashada Madaxweyne John Mills.Mr Mills ayaa sannadkii 2010-kii ku guulaystay in dalkiisa saliid laga soo saaro, ka dib markii uu soo jiitay maalgashi caalami ah.