Madaxweynaha Qaranka Somaliland Md. Muuse Biixi Cabdi waxaan u soo jeedinayaa Saddex qodob oo horumar u ah Maamul-wanaagga iyo wada-shaqaynta Hay’adaha Dawladda, waxayna kala yihiin:-
- Isbeddelka Xukuumadda aad hoggaamiyaha ka tahay kuma koobna Xubnaha aad Magacowdo ee kala ah, Wasiirka, Wasiir ku-xigeenka iyo Agaasimaha Guud, balse Isbeddelku wuxuu ka bilaabmaa Shaqaalaha, Madax-qaybeedyada oo la siiyo Tababbarro iyo wacyi-gelin ah ku dhaqanka Shuruucda Hay’adaha Dawliga ah, haddaba Mudane Madaxweyne wixii ka dambeeyay markii aad Magacowday Xubnaha Golaha Wasiirrada iyo Agaasimayaasha guud, waxa soo ka soo if baxay isla-markiiba is qabqabsi iyo wada-shaqayn la’aan ka dhex jirtay Xukuumadihii horeba, taana waxa sabab ah masuulka ugu sarreeya Wasaaraddu iyo ku-xigeenkiisuba ma samayn karaan isbeddel, balse waxa keena Isbeddelka ku dhaqanka Sharciga Wasaaraddaas ama Hay’addaas iyo la xisaabtanka Agaasime-waaxeedyada iyo shaqaalaha, sidaasi awgeed waxaan soo jeedinayaa in isbeddelka aad hormoodka ka tahay inuu noqdo ku dhaqanka Sharciga iyo la xisaabtanka Masuuliyiinta aad Magacowday ee Hay’addaasi.
Haddaba, iyadoo hadal-haynta Dadku u badan tahay in Handaraab dhaqaale ka jiro Dalka sanadkii aad hoggaamiyaha Qaranka ahayd, balse Handaraabka lagu hal-qabsadaa maaha mid ka yimid Kaantaroolidda kharashaadka iyo dakhliga Dawladda ee waa mid ku kooban Xafiiskaaga iyo Af ku xoogleyaasha siyaasadda oo meesha ka baxay, sidaasi darteed waxaan kuu soo jeedinayaa, inaad hawl-geliso Hanti-dhowrka Qaranka oo Hay’adda u xil-saaran Kaantaroolidda kharashka iyo dakhliga, taasi oo horumar iyo sharaf u ah Xukuumadda aad hoggaamiso, iyadoo Hay’adda Hanti-dhowrka Qaranka lafteedu u baahan tahay Masuul Aqoon iyo khibrad u leh Waajibaadka Hanti-dhowrka.
- Mudane Madaxweyne, waxa jira Hay’ado muhiim ah oo ay lagama maarmaan tahay inaad dib u eegis ku samayso xilka ay Qaranka u hayaan iyo khibradda Masuuliyiinta ku Magacaaban, sida Hay’adda Shaqaalaha Dawladda, Baanka dhexe ee Qaranka iyo Xeer ilaalinta guud ee Qaranka. Saddexdaa Hay’adood waxay Qaranka uga masuul yihiin tiirarka ugu muhiimsan Dawladnimada, balse wakhtigan waxa ka muuqda hoggaan la’aan.
- Mudane Madaxweyne, Miisaaniyadda Qaranka maaha mid Odoros iyo Qiyaas uun ku xidhan, balse waa inay ahaataa mid wasaarad walba lagula xisaabtamo Bajadkeedii inay ku fulisay wixii loo qorsheeyay. Sidaasi awgeed waxaan kuu soo jeedinayaa inaad magacowdo guddi Madax-banaan oo shaqadoodu tahay daba-galka sida Wasaaraduhu u isticmaaleen Lacagtii loo dhiibay, taasi oo kaabi doonta shaqada Hanti-dhowrka Guud iyo Xisbiyaha guud ee Dawladda.
Mudane Madaxweyne, Anigoo aad kuugu hambalyeynaya muddadii aad xilka haysay tix-gelinta aad siiso ka jawaabidda tabashada Shacabka Somaliland iyo Talo soo jeedinta Muwaadiniinta, waxaan rajeynayaa inaad ka midho-dhaliso qodobbadan wixii mudnaan leh ee Danta Qaranku ku jirto.
Wa billaahi Towfiiq
Mowliid Aadan Cumar
Hargeysa/Somaliland