Waxa uu Madaxweynuhu Tacsi u diray Ehelka, qaraabada iyo Asxaabta ay ka baxeen 7 Qof oo maanta ku geeriyooday Shil-baabuur
Hargeysa (SLpost)- Madaxweynaha Somaliland Md Muuse Biixi Cabdi, ayaa si adag uga hadlay shilalka gaadiidka oo muddooyinkii u dambeeyey ku soo badanaya dalka kuwaas oo khasaare naf iyo maalba leh u keena bulshada.
Hadalka Madaxweynaha ayaa ka dambeeyey kaddib markii shalay iyo maanta ay shilal gaadiid ku geeriyoodeen dad tiradoodu gaadhayso ilaa 10 qof halka tobanaan kalena ku dhaawacmeen. Shilalka ayaa ka dhacay jidka u dhexeeya magaalooyinka Hargeysa iyo Berbera.
Mudane Biixi waxa uu tacsi u diray ehelka iyo qaraabada ay ka baxeen todoba qof oo ku geeriyooday Shil maanta ka dhacay jidka u dhexeeya Hargeysa iyo Berbera kaddib markii ay isku dhaceen laba gaadhi oo midkood yahay Bas ay saarnaayeen dad shacab ah halka gaadhiga kalena yahay nooca xamuulka qaada.
Sida lagu shaaciyey war-saxaafadeed ka soo baxay xafiiska Afhayeenka Madaxweynaha, Md Muuse Biixi waxa uu waxa uu faray hay’adaha dowladda ee ku shaqada leh inay ku tallaabsadaan sidii loo xakayn lahaa shilalka gaadiidka oo inta badan marka laga yimaaddo qaddarka Allah ay sababaan aqoon-darrada Darawallada iyo Jidadka oo tayadoodu aanay wanaagsanayn.
War-saxaafadeedka oo uu ku saxeexan yahay Afhayeen Maxamuud Warsame Jaamac, ayaa u qornaa sidan:-
“Madaxweynaha Jamhuuriyadda Somaliland, Mudane Muuse Biixi Cabdi, isagoo ku hadlaya magaciisa, ka dawladda iyo ka shacbiga Somaliland, waxa uu dhambaal tacsi ah u dirayaa qoysaska, qaraabada, ehelada, asxaabta iyo shacbiga Jamhuuriyadda Somaliland, ee ay ka baxeen Alle ha u naxariistee dhammaan Marxuumiinta ku geeriyooday shil baabuur oo sababay dhimashada todoba ruux (7 qof) kuna dhaawacmeen afar ruux, ka dib markii ay isku dhaceen laba gaadhi oo kala ah Bas rakaab siday oo ay leedahay shirkadda Dalmar iyo gaadhi weyn oo ah nooca loo yaqaano candha-maydle. Shilkaas oo ka dhacay inta u dhaxaysa Lafa-ruug iyo xamaas ee gobolka saaxil maanta oo ay taariikhdu tahay 07-05-2019 .
Sidoo kale madaxweynuhu wuxuu ku adkaynayaa mulkiilayaasha gaadiidka, shirkadaha gaadiidka ee gobolada isaga goosha, iyo wadayaasha gaadiidku inay u hoggaansamaan shuruucda gaadiidka iyo waddo-marista muujiyaana masuuliyada nafaha muwaadiniinta ay qaadan iyo ilaalinta maalka gaadiidka.
Madaxweynuhu wuxuu wax laga damqado ku tilmamay halista iyo khataraha soo noq-noqday ee shilalka gaadiidku sababeen oo khasaare naf iyo maalba leh u geystay muwaadinta Jamhuriyada Somaliland.
Waxaanu madaxweynuhu farayaa wasaaradda gaadiidka iyo horumarinta jidadka, taliyaha ciidanka Booliska iyo laanta nabad-gelyada wadooyinka inay fuliyaan awaamiirta iyo sharciga gaadiidka iyo wadidooda, isla markaana waajibaadkooda ka gutaan cid kasta oo baalmarsan shuruucda wadida gaadiidka iyo masuuliyada saaran.
Madaxweynuhu wuxuu marxuumiintaas ALLE uga baryayaa inuu naxariistii janno ka waraabiyo, qoysaska, qaraabada, ehelada, asxaabta iyo shacbiga Jamhuuriyadda Somaliland, ee ay ka baxaeena samir iyo iimaan saadiqa ka siiyo. Inta dhaawaca ahna caafimaad sareecana siiyo.”