Hargeysa (SLpost)- Madaxweynaha Jamhuuriyadda Somaliland Md Muuse Biixi Cabdi, ayaa ka hadlay shaqsiyada iyo doorkii siyaasadeed iyo Wax-qabad ee uu dalka ka soo gaystay Allah u naxariistee Maayarkii hore ee Caasimadda Hargeysa Cawl Cilmi Cabdalle oo maanta ku geeriyooday Magaalada Hargeysa.
Madaxweynuhu waxa uu shacabka Somaliland, ehelka iyo qaraabada ka tacsiyadeeyey Geerida ku timi Marxuum Cawl Cilmi Cabdalla oo maanta ku geeriyooday magaalada Hargeysa. Madaxweynuhu waxa uu marxuumka ku tilmaamay inuu caasimadda Hargeysa kaga tagay Astaamo ma-guuraan ah.
“Madaxweynaha Jamhuuriyadda Somaliland Md Muuse Biixi Cabdi isagoo ku hadlaya magaciisa, ka dawladda iyo ka shacbiga Somaliland, waxa uu tacsi u diray waxgaradka, waayeelka, aqoonyahanka dalka, qoyska, ehelada, qaraabada, asxaabta iyo shacbiga Somaliland ee uu ka baxay Alle ha u naxariistee Marxuum Cawl Cilmi Cabdalla oo ku geeriyooday maanta oo ay taariikhdu tahay 28/12/2019 Caasimada Somaliland ee Hargeysa.
Madaxweynuhu waxa uu marxuumka ku sifeeyey siyaasi ruug-cadaaya oo halgamadii kala danbeeyey ee dalka loo soo maray door muhiima ku lahaa, qayb-weyna ka qaatay dib u dhiskii iyo nabadayntii shacbiga Somaliland, markii danbena noqday maayarka caasimada Somaliland ee Hargeysa oo uu kaga tegay taariikh iyo astaamo ma guuraana muddadii uu xilka hayey.
Madaxweynuhu waxa uu marxuumka ALLE uga baryayaa inuu naxariistii janno ka waraabiyo waxgaradka, waayeelka, aqoonyahanka, qoyska, ehelada, qaraabada, asxaabta iyo shacbiga Somaliland ee uu ka baxayna samir iyo iimaan saadiqa ka siiyo.” Sidaa waxa lagu sheegay war qoraal kooban oo ka soo baxay afhayeenka madaxtooyada Somaliland.
Allah ah naxariistee, marxuumka ayaa maalinta Berri ah aas Qaran loogu samayn doonaa Magaalada Hargeysa, iyadoo aaskiisa uu ka qayb-gali doono Madaxweynaha Somaliland Md Muuse Biixi Cabdi.
Maxaa lagu xusuustaa Waxqabadkii Cawl Cilmi Cabdalle?
Marxuum Cawl Cilmi Cabdalle oo noqday maayarkii 20aad ee Hargeysa yeelato, waxa uu xilka hayey intii u dhaxaysay 2000-2002 xilligaas oo uu xilka ku wareejiyey Eng. Xuseen Maxamuud Jiciir oo muddo toban sannadood ah isaguna ahaa Duqa Magaalada kaddib markii Golihii deegaanka ee u horeeyey la doortay sanadkii 2002-kii.
Allah haw naxariistee Marxuum Cawl Cilmi Cabdalle, Maayarkii hore ee Caasimadda Hargeysa, in kasta oo waxqabadyadii uu magaalada ka hirgeliyey tira badan yihiin, haddana kuwa ugu muhiimsan ee lagu xusuusto waxa ka mid ah inuu noqday Maayarkii u horreeyey ee Caasimadda dalka ka hirgeliyey Ishaarooyinka ama Nalalka kala haga Baabuurta oo magaalada Hargeysa markii u horeysay taariikhda yeelato labaatan sanno ka hor.
Waxa kale oo lagu xusuustaa inuu faras-magaalaha Hargeysa ka dhex-taagay mid ka mid ah taallooyinka taariikhiga ah ee ku suntan waayihii soo maray shacabka caasimadda. Waa diyaaradda Miigga ah ee ka dhex-taagan barxadda hore ee Kheyriyadii hore ee Caasimadda, taas oo lagu xusuustay inay ahayd mid ka mid ah diyaaradihii dagaalka dowladdii Siyaad Barre ee intay ka soo kacdo garoonka diyaaradaha Hargeysa duqaynaysay ama rushaynaysay shacabka ku dhaqanka caasimadda.
Waxyaabihii kale ee uu qabtay laguna xuso waxa ay ka mid yihiin Dhismaha Suuqyada waaweyn ee Gobanimo, Waaheen iyo goobo kale oo muhiim ah oo hada ka mid ah goobaha ugu israraatiijisan.
Somalilandpost.net
contact@somalilandpost.net