Kampala, 09 April, 2012 (SLpost)- Madaxweynaha dalka Uganda Yoweri Museveni, ayaa uga digay Ciidamada Uganda ee ku sugan magaalada Muqdisho inay xidhiidh dhinaca Jinsiga ah la yeeshaan Haweenka Soomaalida, taasoo uu ku tilmaamay inay khatar ku keeni karto howlaha nabad-ilaalineed ee ay ka hayaan Soomaaliya, ka dib markii toddobaadkii hore ay Haweenay isku qarxisay Xaflad ay ka qaybgaleen Masuuliyiin dawladda Soomaaliya ka tirsan oo dhimasho iyo dhaawac sababay.
Museveni, ayaa maalintii Jimcaha ahayd ka sheegay Xerada Ciidamada Singo ee Uganda oo xilligaas ay ku sugnaayeen 1,700 Askari oo loo diyaariyay in loo soo qaado Soomaaliya si ay howlgalka AMISOM uga qaybqaataan. “Xidhiidh Jinsi oo aad la sameysaan Haweenka Soomaalida waxay khatar ku keeni kartaa howlgalka nabad-ilaalineed ee ka socda Soomaaliya.” ayuu Museveni u sheegay ciidamadii uu la hadlayay.
Ciidamadan ayaa loo diyaariyay sidii ay u xoojin lahaayeen Ciidamada AMISOM ee ku sugan magaalada Muqdisho ee dalka Soomaaliya, halkaas oo ay Uganda Ciidammo badani hore uga joogeen, waxaana kuwan loogu talagalay si loogu guuleysto howlgalka lagaga horjeedo Malleeshiyada Al-shabaab ee ka socda gobollada Koonfurta iyo Badhtamaha Soomaaliya.
Madaxweynaha Uganda wuxuu ugu baaqay ciidamada dalkiisa inay noqdaan kuwo daacad u ah howsha ay ka hayaan Soomaaliya. Isagoo ugu baaqay ciidamadiisa iyo Taliyeyaashooda inay ilaaliyaan shuruucda iyo asluubta ciidammada. Askari ka tirsan ciidammada dalka Uganda ayaa hore xidhiidh dhinaca Jinsiga ah ula yeeshay Haweeney Soomaaliyeed, kaasoo la xidhay laguna eedeeyay inuu ka baxay sharci u degsanaa Ciidamada UPDF.
Ciidammadii Uganda ee ka howlgalay dalka Jamhuuriyadda Congo sannadihii 1998-kii illaa 2001 ayaa waxay xidhiidho dhinaca Jinsiga ah la yeesheen Haweenka dalkaas u dhashay, taasoo keentay in Carruur badan ay ku dhashaan, kuwaasoo qaarkood ay Ciidammadu kula laabteen dalkooda Uganda.
Hadalkan Madaxweynaha Uganda ayaa ku soo beegmay maalmo ka dib, markii la sheegay qarax ka dhacay toddobaadkii hore xarunta Maadda iyo Madaddaalada ama Tiyaatarka Qaranka Soomaaliyeed ee magaalada Muqdisho inay fulisay Haweenay lagu soo rakibay waxyaabaha qarxa, kaasoo sababay khasaare dhimasho iyo dhaawac badan isugu jira, isla markaana uu dirqi kaga badbaaday Ra’iisal wasaaraha Soomaaliya Dr. Cabdiwali Maxamed Cali (Gaas), halka ay Masuuliyiin isugu jira Xildhibaanno, La-taliyeyaal iyo Madaxii Ciyaaraha Olombikada Soomaaliyeed qaraxaas ku geeriyoodeen markii uu dhacay iyo kuwo dhaawac ugu dhintay magaalada Nairobi ee xarunta Kenya oo Caafimaad ahaan loo geeyey.
SOMALILANDPOST.NET
webmaster@somalilandpost.net