Hargeysa (SLpost)- Madaxweynaha Somaliland Md Muuse Biixi Cabdi, ayaa maanta xafiiskiisa ku qaabilay Wasiirka Cadaaladda Zambia iyo wefti uu hoggaaminayo oo shalay socdaal ku yimi Hargeysa.
War-saxaafadeed ka soo baxay xafiiska warbaahinta madaxtooyada oo lagu faahfaahiyey arrimaha kulanka lagaga hadlay, ayaa u qornaa sidan:-
“Madaxweynaha Jamhuuriyadda Somaliland, Mudane Muuse Biixi Cabdi waxa uu maanta qasriga madaxtooyada ku qaabiley wefti uu hoggaaminayo wasiirka caddaaladda ee dalka Zambia, Mr Gavin Lubinda oo safar shaqo ku yimid Dalka.
Ugu horrayn madaxweynaha Jamhuuriyadda Somaliland waxa uu xubnaha weftiga warbixin ka siiyey xaaladda guud ee dalka iyo halka uu maanta marayo oo ah mid ku timid iskaashiga shacbiga iyo dawladda ka dhexeeya, waxa kale oo uu u sheegay wasiirka taariikhda iyo jiritaanka dawladnimo ee Somaliland, inay tahay dal 1960-kii xornimadiisa ka qaatay boqortooyadii Ingiriiska, si xoriyad ahna ula midoobay Jamhuuriyaddii la isku odhan jiray Soomaaliya ee Talyaanigu gumaysan jiray, si loo abuuro Jamhuuriyad Soomaaliyeed oo ay u dhan yihiin shucuubta Soomaaliyeed ee ku dhaqan geeska Afrika, balse midawgaasi uu socon waayey, Somalilandna ay kala kulantay dhibaatooyin naf iyo maalba leh midawgii la doonayey in Soomaali odhan la mideeyaana uu fashilmay, sidaa awgeedna Somaliland waxay dib ula laabatay xornimadeedii iyo qarannimadeedii 1991-kii, taas oo macneheedu aanu ahayn gobol ka go’aya dalka intiisi kale, balse ay tahay laba dal oo la kala noqday xornimadoodii.
Waxaana kulankaasi lagaga wada hadlay qodobbo ay ka mid ahaayeen xoojinta xidhiidhka labada dal ee Jamhuuriyadda Somaliland iyo Zambia, taariikhda ay labada dal wadaagaan oo kasoo bilaabantay xilligii gumaysiga, taasoo keentay in dadka reer Somaliland ay ilaa maanta degganyihiin kuna dhaqan yihiin dalkaasi. Xidhiidhka labada dalna aanu cusbayn ee uu hore Somaliland laba jeer u yimi madaxweynihii hore ee dalka Zambia, Kenneth Kaunda oo xidhiidh wanaagsan oo saaxiibtinimo ka dhexeeyey Jamhuuriyadda Somaliland.
Waxa kaloo kulanka lagaga wada hadlay xidhiidh cusub oo dhexmari doona Somaliland iyo Zambia, salkana ku haya ganacsi iyo iskaashi dhaw oo ay yeeshaan labada dal.
Sidoo kale, intii kulanku socday waxa si toos ah khadka taleefanka ku wada hadlay labada madaxweyne ee labada dal ee Jamhuuriyadda Somaliland, Mudane Muuse Biixi Cabdi iyo madaxweynaha Zambia, mudane Edgar Chagwa Lungu, iyagoo ka wada hadlay labada madaxweyne xidhiidhka iyo danaha labada dal.
Ugu danbayntiina waxa uu kulankaasi ku doo dhammaaday isfahan iyo xidhiidh wadashaqayneed oo labada dal ay dardar-gelintiisa ka wadashaqayn doonaan.” sidaas ayaa lagu sheegay warka ka soo baxay xafiiska warbaahinta madaxtooyada.
Somalilandpost.net
contact@somalilandpost.net