Hargeysa (SLpost)- Madaxweynaha Somaliland Md Muuse Biixi Cabdi, ayaa ka hadlay geerida Allah haw naxariistee Taliyihii Ciidanka Booliska Sarreeye Gaas Cabdilaahi Fadal Iimaan oo fiidnimadii caawa ku geeriyooday magaalada Hargeysa.
Md Muuse Biixi Cabdi waxa uu tacsi u diray Ehelka, qoyska, asxaabta, Ciidanka Booliska iyo Shacbiga Somaliland ee uu ka baxay Marxuum Cabdilaahi Fadal Iimaan oo 7-dii sannadood ee u dambeeyey ahaa Taliyaha Guud ee Ciidanka Booliska Somaliland.
Sida lagu sheegay war-qoraal kooban oo xambaarsan dhambaalka tacsida ah ee Madaxweynaha, waxa uu Md Muuse Biixi Cabdi ku tilmaamay marxuumka hawl-kar u soo hagar-baxay oo wakhtigiisa inta badan galiyey dhismaha Ciidanka Booliska Somaliland.
Qoraalka ka soo baxay madaxtooyada Somaliland, ayaa u qornaa sidan:-
“Madaxweynaha Jamhuuriyadda Somaliland, Mudane Muuse Biixi Cabdi, isagoo ku hadlaya magaciisa, ka dawladda iyo ka shacbiga Somaliland, waxa uu dhambaal tacsi ah u dirayaa, ciidamada kala duwan ee qaranka, gaar ahaan ciidanka Booliska Somaliland, waxgaradka, waayeelka, aqoonyahanka, qoyska, ehelada, qaraabada, asxaabta, iyo shacbiga Somaliland ee uu ka baxay Alle ha u naxariistee Sareeye gaas Marxuum Cabdilaahi Fadal Iimaan oo ku geeriyooday caawa oo ay taariikhdu tahay 01/11/2019, Caasimada Somaliland ee Hargeysa.
Madaxweynuhu waxa uu marxuumka ku sifeeyey halyey hawlkar ahaa oo u hagar-baxay shaqadii uu qaranka u hayey, hadh iyo habeenna heegan adag ugu jiray adkaynta amniga, wuxuuna ku suntanaa ka qayb-qaadashadii aas-aaska ciidanka booliska Somaliland, isagoo shaqada qaranka ka soo bilaabay meel hoose isla markaana xilal kala duwan ka soo qabtay ciidanka booliska kana gaadhay derejada sareeye gaas. Waxaanu geeriyooday isagoo ah taliyaha ciidanka booliska Somaliland oo uu muddo dheer soo ahaa.
Waxaanu madaxweynuhu marxuumka ALLE uga baryayaa inuu naxariistii janno ka waraabiyo, Ciidamada kala duwan ee qaranka, gaar ahaan ciidanka Booliska Somaliland, waxgaradka, waayeelka, aqoonyahanka, qoyska, ehelada, qaraabada, asxaabta iyo shacbiga Somaliland ee uu ka baxayna samir iyo iimaan saadiqa ka siiyo,” Sidaas ayaa lagu sheegay qoraalka ka soo baxay madaxtooyada Somaliland.
somalilandpost.net
contact@somalilandpos.net