“Somalilandna ay ku xasuusan doonto xidhiidhkii soo jireenka ahaa ee hore uga dhaxayn jiray labada dal iyo labada shacbi ee Jamhuuriyadda Somaliland iyo Isu-tagga Imaaraadka Carabta oo intii uu talada hayey dib loo ambo qaaday”
Hargeysa (SLpost)- Waxa Jimcaha Maanta geeriyooday madaxweynihii dalka Imaaraadka Carabta Marxuum Sheekh Khaliifa bin Zayed al-Nahyan oo muddo 20 sanno ku dhow soo maamulayay dalkaas.
Madaxweynaha Somaliland Md Muuse Biixi Cabdi, ayaa hadlay geerida marxuumka oo uu ku tilmaamay hoggaamiye ruug-caddaa ah oo ka baxay dalalka Carabta, isla markaana door muhiim ah ku leh mashaariicda horumarineed ee dalkaasi ka wado Somaliland.
Md Muuse Biixi Cabdi waxa uu sheegay inay Somaliland marxuumka ku xusuusan doonto xidhiidhkii soo-jireenka ahaa ee labada waddan u dhaxayn jiray oo uu sheegay inuu marxuumka dib u soo nooleeyey.
Dhambaal tacsi ah oo ka soo baxay madaxtooyada, ayaa u dhignaa sidan:- “Madaxweynaha Jamhuuriyadda Somaliland, Mudane Muuse Biixi Cabdi isagoo ku hadlaya magaciisa, ka dawladda iyo ka shacbiga Jamhuuriyadda Somaliland, waxa uu Dhambaal Tacsi ah u dirayaa Dalka Isu-tagga Imaaraadka Carabta iyo shacbi-weynaha dalkaasi ee aynu walaalaha-nahay, isagoo ka tacsiyadaynaaya geerida ku timid madaxweynihii dalkaas Marxuum Sheikh Khalifa bin Zayed Al Nahyan oo maanta oo jimce ah taariikhduna tahay 13/05/2022 geeriyooday.
“Madaxweynuhu waxa uu madaxweynaha geeriyooday ku tilmaamay oday siyaasi ruugcadaa ah oo ka baxay guud ahaan Dunida iyo gaar ahaan Dalalka Carabta, isla markaana muddadii uu xilka hayey door laxaad leh ka qaatay dhismaha iyo horumarka dalkiisa, Somalilandna ay ku xasuusan doonto xidhiidhkii soo jireenka ahaa ee hore uga dhaxayn jiray labada dal iyo labada shacbi ee Jamhuuriyadda Somaliland iyo Isu-tagga Imaaraadka Carabta oo intii uu talada hayey dib loo ambo qaaday, kana dhasheen horumarada ka socda dalka Somaliland ee Imaaraadka Carabtu gacanta ku hayo.
Madaxweynuhu waxa uu marxuumka ALLE uga baryayaa inuu naxariistii janno ka waraabiyo, dalka Isu-tagga Imaaraadka Carabta iyo shacbigii uu ka baxayna samir iyo iimaan saadiqa ka siiyo.” Sidaas ayaa lagu yidhi dhambaalka tacsida ah ee ka soo baxay madaxtooyada.
Sheekh Khalifa ayaa noqday madaxweynihiii labaad ee dalka Imaaraadka sannadkii 2004-tii, isagoo xilka kala wareegay Aabihii oo ahaa hoggaamiyihii 15aad ee ay yeelato imaaradda Abu Dhabi.
Tobankii sanno ee u horreeyey hoggaamintiisa, waxa uu isbeddel ballaadhan ku sameeyey maamulka iyo nidaamka hay’adaha federaalka iyo kuwa imaaradda Abu Dhabi. Haseyeeshee, markii uu faaliggu ku dhacay sannadkii 2004-kii, lama arki jirin in kasta oo uu soo saari jiray digrootin maamul.
Sida uu dhigayo dastuurka dalka UAE, madaxweyne ku-xigeenka dalkaas Sheekh Maxamed Bin Rashid Al-Makhtoum oo ah maamulaha imaaradda Dubai, ayaa si ku-meel-gaadh ah ula wareegi doona xila madaxweynaha dalkaas.
Si loo doorto madaxweynaha cusub ee dalka Imaaraadka Carabta, waxa uu sharciga dalkaasi dhigayaa inay muddo 30 maalmood gudahood ah ay kulan isugu yimaaddaan golaha Federaalka oo ka kooban maamulayaasha toddobada Imaaradood ee dalkaasi ka kooban yahay.
Somalilandpost.net
contact@somalilandpost.net