Hargeysa (SLpost)- Madaxweynaha Somaliland Md Muuse Biixi Cabdi, ayaa maanta daah-furay Carwo dhinaca caafimaadka ah oo lagu soo bandhigi doono adeegyada ay bixiyaan Mihnadleyaasha iyo xarumaha Caafimaadka ee dalka.
Shirweynaha Caafimaad oo noqonaya kii ugu horeeyey noociisa ee lagu qabto dalka muddadii Somaliland jirtay, waxa soo qaban-qaabiyey Wasaaradda Horumarinta Caafimaadka Somaliland oo kaashanaysa urur waddani ah, waxaana socon doontaa muddo shan maalmood ah, iyadoo ay ka qayb-qaadanayaan Mihnadleyaasha Caafimaadka, Goobaha adeegyada Caafimaad u qabta bulshada, hay’adaha Caalamiga ah ee Somaliland ka taageera kalana shaqeeya dhinaca Caafimaadka.
Munaasibadda carwada oo lagu qabtay Huteel Maansoor ee magaalada Hargeysa, ayaa waxa ka qaybgalay madaxweynaha Jamhuuriyadda Somaliland, Mudane Muuse Biixi Cabdi, xubno kamid ah golaha wasiirrada, saraakiisha ugu sarraysa wasaaradda horumarinta Caafimaadka, kullliyadaha kala duwan ee dhinaca Caafimaadka ee jaamacadaha dalka ka jiraa leeyihiin, hay’adaha qaramada midoobay ee dhinaca caafimaadka ka shaqeeya, shirkadaha kala duwan ee ka ganacsada agabka caafimaadka, dhakhaatiir iyo marti-sharaf kale oo aad u tiro badan, waxana halkaas laga jeediyey hadallo salka ku haya muhiimadda uu caafimaadku nolosha u leeyahay, cudurrada kusoo badanaya bulshada Somaliland iyo dedaalka ay wasaaradda horumarinta Caafimaadku ugu jirto sidii loo daryeeli lahaa caafimaadka bulshada Somaliland.
Drs. Edna Aadan Ismaaciil oo ugu horrayn madasha ka hadashay, ayaa ku dheeraatay muhiimadda ay leedahay daryeelka caafimaadka Bulshada iyo ka wada-tashiga sidii looga hortegi lahaa cudurrada halista ku haya nolosha bulshada reer Somaliland, waxana ay hay’adaha caalamiga ee dhinaca caafimaadka ka shaqeeya ka costaday inay xil gaar ah iska saaraan sidii meesha looga saari lahaa xannuuno aan hore u jiri jirin oo lagu arkay Hooyooyin iyo dhallaanka reer Somaliland.
Wasiirka wasaaradda Horumarinta Somaliland, Mudane Cumar Cali Cabdilaahi oo hadal dhinacyo badan taabanaya madasha ka jeediyey, ayaa ku dheeraaday dedaalka ay wasaarad ahaan ugu jiraan daryeelka bulshada ee dhinaca caafimaadka, isaga oo xusay inay wasaaradda uu masuulka ka yahay ku dedaashay sidii adeegga caafimaadka iyo agabka lagama maarmaanka ahba u gaadhsiin lahayd deegaannada caasimadda ka durugsan ee dalka.
Sidoo kale, waxa uu wasiirku shaaciyey in carwada caafimaadka ee ka furantay caasimaddu ay wasaarad ahaan iyagu soo abaabuleen, ugana gol leeyihiin sidii looga wada-tashan lahaa horumarinta caafimaadka oo hawlbawle u ah nolosha ummadda, islamarkaana uu muddo saddex maalmood ah oo ay carwadani socon doonto ay barbar wadayaan shirar kala duwan oo lagu gorfaynayo caafimaadka guud ee qaranka.
Madaxweynaha Jamhuuriyadda Somaliland, Mudane Muuse Biixi Cabdi hadal ka jeediyey carwada caafimaadka lagu furayey, ayaa ugu horrayn bogaadiyey bahda caafimaadka ku hawllan, isaga oo xirfadle kasta oo caafimaadka ka shaqeeya ku sifeeyey mujaahid badbaadinta shacabkiisa nafta u huray, waxana isaga oo arrimahaas ka hadlaya uu yidhi, “Inaad shirkan isugu timaaddeen oo ka tashanaysaan sidee ummaddiina loo daaweeyaa iyo sidee loo daryeelaa aad iyo aad baan idiinku hambalyeynayaa, waanan idinku garab gelayaa, waanan idinku dhiirrigelinayaa, waxa kale oo aan doonayaa inaan idiin qiro in Innanta maanta baranaysa Kalkaalisinimada ama ummulisada, ama inanka baranaysa kalkaaliyenimada in haddii cidi mujaahid tahay aad dhammaantiin mujaahidiin tihiin.”
Ugu dambayntii waxa uu madaxweynuhu si rasmi ah xadhiga uga jaray carwada caafimaadka, isaga oo mid mid usoo kormeeray goobo ay kulliyada caafimaadka ee qaar kamid ah jaamacada dalka iyo ganacsatada ka ganacsata agabka kala duwan ee caafimaadku kusoo bandhigayeen waxyaabaha ay qabtaan iyo agabka ay keenaan.
Wasiirka Wasaaradda Horumarinta Caafimaadka ee Somaliland Md Cumar Cali Cabdilaahi Bade, ayaa 8-dii bishii hore shaaca ka qaaday in maanta oo bishu tahay 16 November si rasmi ah loo daah-furi doono Shirweyne Qaran oo lagu lafa-guri doono Arrimaha Caafimaadka, kaas oo ay bar-bar socoto Carwo dhinaca caafimaadka ah oo lagu soo bandhigi doono adeegyada Caafimaad ee dalka ka jira.
Muuqaalka Hoose ka daawo Hadalka madaxweynuhu ka jeediye munaasibadda