Hargeysa (SLpost)-Madaxweynaha Somaliland Md. Axmed Maxamed Maxamuud (Siilaanyo) ayaa maanta Qasriga Madaxtooyada kulan balaadhan ugu sameeyey Ardayda Dhagoolayaasha Somaliland oo ka kala socday shan Iskuul oo ku yaala Magaalooyinka Boorama, Burco, Gabiley iyo Hargeysa.
Kulankan waxa kale oo goob joog ka ahaa Madaxweyne Ku-xigeenka Somaliland Md. C/Raxmaan Cabdillaahi Ismaaciil (Saylici), Wasiirka Madaxtooyadda Md. Xirsi Cali Xaaji Xasan, Wasiirka Waxbarashadda Marwo Samsam Cabdi Aadan, Wasiirka Maaliyadda Md Cabdicasiis Maxamed Samaale, Wasiirka Xanaanadda Xoolaha Mudane Cabdi Aw Daahir, Wasiirka Beeraha Mudane Faarax Cilmi Geedoole iyo Marwadda koowaad ee Somaliland Marwo Aamina Sh. Maxamed Jirde (Aamina Waris).
Ardayda wax ka barta Dugsiyada Dhegoolayaasha ee Madaxweyne Siilaanyo ku soo dhaweeyey Qasriga Madaxtooyada, ayaa munaasibadda soo dhaweynta ee loo qabtay ku soo bandhigay Heerkooda waxbarashada iyo Farta dhegoolayaasha ee ay wax ku bartaan.
Waxa xusid mudan in Ardaydan Laxaadka Maqalka Waxa Qaba ay madasha ka qaadeen Heesta Astaanta Qaranka, iyada oo isticmaalaya af-garashada dadka dhegoolayaasha ah.
Madaxweynaha oo gaba-gebadii kulankaas ka hadlay ayaa Ardayda ka socotay Dugsiyada dhagoolayaasha oo ka hadlay baahiya iyo waxyaabaha ay u baahan yihiin, waxa uu Madaxweynuhu u balan qaaday inuu wax kala qabanaayo baahiya ku gadaaman, isla markaana waxa uu sheegay inuu aad ugu faraxsan yahay kulankoodan maanta, waxaanu yidhi, “Waxa maanta farxad wayn ii ah inaan maanta halkan aan kula kulmo qayb aad iyo aad muhiim u ah oo xaggayagana ahmiyad wayn ka leh oo bulshada Somaliland ka mid ah. dhalinyaradaas quruxda badan ee halkaas fadhida iyo inta ka maqan ee la midaaba aad iyo aad ayaan u salamayaa,”ayuu yidhi Madaxweynaha Somaliland Md. Axmed Maxamed Maxamuud (Siilaanyo), waxaanu hadalkisii sii raaciyey, “Waxaan jecelay inaan idhaahdo aad ayaan ugu faraxsanay waxyaabihii idiin qabsoomay. Waxaan idinka balan qaadayaa baahidaas aad sheegateen in wixii allaale iyo wixii aanu ka qaban-karno aanu ka qabano. Waxaad la xaquuq tihiin oo aad la mid tihiin ama Ixtiraab gaara iyo mid kabadan ta dadka kale la siiyo in laydiin siiyo ayaan idinka balan qaadayaa.”
Madaxweynuhu waxa kale oo uu sheegay inuu arrintan baahiyadooda oo dhan uu kala hadli doono Ha’yadaha oo dhan, waxaanu yidhi, “Wasaaradda waxbarashada iyo Ha’yaddaha kale oo dhan waanu ka wada tashan doonaa wixii talabooyin ah ee la qaadidoono iyo baahiyaha aad noo sheegteen sidii aanu wax uga qaban lahayn. Aad iyo aad ayaan idinku mahdinayaa qiimaha iyo sharafta aad na sii seen iyo salaanta aad noogu timadeen.”
Waa markii u horreysay ee Madaxweynaha Somaliland munaasibad dhiirri-gelin ah ku qaabiley Ardayda Wax ka barata Dugsiyada Dhegooleyaasha ee gobollada Dalka.
SOMALILANDPOST.NET