Djibouti (SLpost)- Madaxweynaha Jamhuuriyadda Jabuuti Md Ismaaciil Cumar Geelle, ayaa maanta qaatay tallaalka ka-hortagga Cudurka Covid-19, sida aanu ka soo xigannay warbaahinta dalkaas.
Madaxweyne Ismaaciil Cumar Geelle waxa uu hormuud ka noqday barnaamij olole caafimaad oo tallaalka ka-hortagga xannuunka lagu siinayo shacabka dalkaas kaas oo maanta ka bilaabmay guud ahaan dalka Djibouti.
Dalka Jamhuuriyadda Jabuuti waxa dhawaan soo gaadhay shixnado tallaalka Covid-19, waxaana la qorsheeyey in kumanaan ruux laga tallaalo cudurkan oo farabaas ku haya caalamka.
Jabuuti ayaa noqonaysa dalkii labaad ee ka tirsan waddamada Jaamacadda Carabta ee tallaalka ka-hortagga Covid-19 la gaadhsiiyo, waxaana ka horeeyey dalka Suudaan oo todobaadkii hore loo geeyey.
Wasiirka Wasaaradda Caafimaadka dalka Jabuuti Maxamed Warsame Diiriye ayaa toddobaadkii hore warbaahinta u sheegay in ololaha tallaalka laba weji loo fulinayo, wejiga horena lagu bilaabayo dadka waayeelka ah, kuwa xannuunada kale hayaan iyo hawl-wadeennada caafimaadka. Halka wejiga labaad ee tallaalka lala sugayo shixnad tallaalka xannuunka Covid-19 oo ay bixisay dowladda Shiinaha, taas oo dhawaan la filayo inay soo gaadho dalkaas.
“Tallaalku waa qayb muhiim u ah xakamaynta faafidda fayraska, si ay xaaladdu ugu soo noqoto sidii caadiga ahayd,” sidaas waxa yidhi Wasiirka Caafimaadka Jabuuti Maxamed Warsame, waxaanu ku boorriyey dadka loogu tala-galay wejiga kowaad inay isu diiwaangeliyaan qaadashada tallaalka.
Somalilandpost.net
contact@somalilandpost.net