Hargeysa (SLpost)- Madaxwaynaha Somaliland Md Axmed Maxamed Maxamuud (Siilaanyo) iyo Wefti uu hoggaaminayo, ayaa maanta gelinkii dambe socdaal ugu baxay dalka Jamhuuriyadda Jabuuti oo ay kaga qayb-galayaan 40-guurada Qoraalka Farta Soomaaliga oo dalkaas lagu qabanyo.
Madaxwayne Siilaanyo oo safarkiisa ay ku weheliyaan Marwada Koowaad, Wasiiradda Arrimaha Debedda, Madaxtooyada, Boosaha iyo isgaadhiinta, Waxbarashada, Maareeyaha Hay’adda Abaabulka Saarka Qaran (NDC) iyo Xoghayaha Gaarka ah ee Madaxweynaha, ayaa warbaahinta la hadlay ka hor intii aanu ka dhoofin madaarka Caasimadda Hargeysa ee Egal International Aiport oo diyaarad khaas ahi ka qaadday.
Madaxweyne Siilaanyo waxa uu ka hadlay ujeeddada safarkiisa iyo rabshado khasaare nafeed sababay oo ka dhacay caasimadda Hargeysa, kuwaas oo ka dhashay natiijada doorashada goleyaasha deegaanka.
“Waxa na marti-qaaday Madaxwaynaha Jabuuti Ismaaciil Cumar Geelle, halkaasi oo loogu dedaal-dagayo 40 guurada qorista Afka Soomaaliga, markaa shirkaasi ayaanu ka qayb-galaynaa Haddii Alle yidhaahdo, wixii dano ah ee ka dhexeeya laba dal oo jaarka ah oo xidhiidh wanaagsanina ka dhexeeyo ayaynu nahay, waananu ka wada hadli doonaa. Somaliland-na shirkaasi doorka dadka kale ku leeyihiin ayay ku leedahay,” ayuu yidhi Madaxweynuhu, waxaanu intaas ku daray hadalkiisa, “Shirka ma jiraan awoodo lagu qayb-sanayaa, dhaqaale la isku siinayaana ma jiro, waana shir laga qayb-galayo oo dadka Afka Soomaaliga ku hadla la xidhiidha, markaa cid walba gacanta ay ka geysanayso way ka geysanaysaa.”
Madaxweynuhu waxa kale oo uu ka hadlay dhibaatooyinkii ka dhashay natiijada doorashada, “Aad iyo aad baan uga xumahay dhibaatooyinka dalka ka dhacay iyo ciddii dhibaato ku timidba, doorashaduna waxay ahayd mid dalka loogu talo-galay, hawshaa iyo xilkaana waxa gacanta ku hayey Komiishanka qaranka. Ayaan-darro way dhacday, horena waan u tacsiyadeeyay, imikana waan ka tacsiyadeynayaa wixii dadkeena ah ee dhibaato ka soo gaadhay, haddana doorashadii way inoo dhamaatay, waxaanuna Illaahay ka rejaynaynaa inaynu ku guulaysano, waxaanuna jecelahay in meel walba nabadgalyadda la ilaashado, dadnimadeena, dimuqraadiyadeena, wada-jirkeena iyo umadnimadeena ilaashano.”
Madaxweynaha oo ka jawaabayey su’aal nuxurkeedu ahaa in ka-qayb-galka shirkaasi ay dheer yihiin Kulamo laga yaabo inay la yeeshaan madaxda Jamhuuriyadda Jabuuti, waxa uu yidhi, “Dalka Jabuuti marti badanbaa isugu imanaysa, aniga oo kali ahi marti kama ahi, marka marti badan dalka joogtana waxa la isugu yimi ayuunbaa laga wada hadlaa, wixii kale ee labada dal ka dhexeeya ee furani waa wax wakhtigeeda iyo goorteena loo ballami karo haddii Alle yidhaado oo laga wada hadli karaa.”
SOMALILANDPOST.NET
contact[at]somalilandpost.net