Stockholm, (SLP)- Maayarka caasimadda Hargaysa Cabdiraxmaan Maxamuud Caydiid (Soltelco), iyo wefti uu hogaaminayo oo booqasho ku jooga dalka Sweden ayaa maanta kulan la yeeshay maayarka caasimadda dalka Sweden ee Stockholm iyo masuuliyiin oo ka tirsan dawladda hoose magaaladaas.
Kulan-hawleedkaasi oo ku saabsanaa sidii dawladda Somaliland beesha caalamka uga heli lahayd Ictiraaf iyo mashaariic horumarineed gaar ahaana casriyaynta caasimada Hargeysa, iyadoo kulankaasi si weyn loogu faaqiday caqabadaha Somaliland ka hor taagan in ay hesho aqoonsi caalami ah iyo arrimo kale.
Maayerka magaalada Hargeysa, oo ka warbixiyay kulanka uu la yeeshay maayarka Stockholm iyo u jeedadda socdaalkiisa ayaa sheegay in socdaalkiisa dalka Sweden uu ka dambeeyay casuumad rasmi ah oo ay ka heleen maayarka magaaladda Stockholm ee caasimadda dalka Sweden.
Waxaanu tilmaamay in dalka Sweden uu diyaar u yahay in uu kala shaqayn doono ka midho-dhalinta ictraaf ay Somaliland ka hesho beesha caalamka.
Cabdiraxmaan Soltelco, ayaa dhinaca kale waxa uu sheegay in dawladda hoose ee magaaladda Stockholm ay caasimadda Hargaysa ka taageerayaan fulinta mashaariic horumarineed oo ku aadan casriyaynta caasimada Hargeysa.
Maayar Hargaysa oo ka hadlayay safarka shaqo ee isaga iyo weftiga uu hogaaminayaa ay ku joogaan Sweden, waxa uu yidhi
“Safarkani wuxuu ku saabsanaa casuumad rasmiya oo aanu ka helnay dawlada hoose ee Stockholm, oo daba socda anaga oo hore ugu casuunay dawlada hoose ee Stockholm oo uu ka socday xoghayaha fulinta iyo muwaadiniin reer Somaliland oo Hargeysa hore ugu casuunay tii cagteedii labaad ayay halkan (Stockholm) nagu casuumeed inaanu nimaadno”.
Dhinaca kale maayarka caasimadda Hargaysa, waxa uu sheegay in dhawaan la filayo in in mid ka mid ah magaalooyinka dalka Sweden goleyaashooda deegaanku ay ku dhawaaqi doonaan in ay aqoonsadaan Somaliland.
“Iyadoo laga wada hadli doono sidii ay labada magaalo u wada shaqeyn lahaayeen, iyadoo marka laga tago iskaashiga labada magaalo shirkan maanta ayaa daarnaa sidii loogu ololayn lahaa qadiyadaSomaliland, iydoo magaalo ka mida magaalooyinka dalkan Sweden 23 bishan April ku dhawaaqi doonto aqoonsiga Somaliland sida ay nagu wargeliyeen” ayuu yidhi maayarka Hargaysa.
Somalilandpost.net