Berbera, (SLpost)- Maareeyaha cusub ee dekadda Berbera Eng. Cali Cumar Maxamed (Cali Xoor xoor), ayaa maanta xilkii si rasmi ah ugala wareegay maareeyihii hore ee Axmed Yuusuf Dirir.Xafladii xil wareejinta oo lagu qabtay xarunta dekadda Berbera, waxa ka soo qeyb galay badhasaabka gobolka Saaxil, Maayarka Berbera, madaxda laamaha kala duwan ee marsada Berbera iyo marti sharaf kale oo lagu soo casuumay.
Maareeyaha hore ee dekadda Berbera Axmed Yuusuf Dirir, oo ka hadlay xafladaasi ayaa ku dooday inuu soo dhawaynayo xil ka qaadistiisa oo uu ku sifeeyay mid ka dhashay sunaha dawladnimo, waxaanu tilmaaamay inuu si niyadsami ah ugu wareejinayo maareeyaha cusub.
“Muddo lix iyo toban bilood ah oo aan xilka maareeyaha dekadda Berbera aan hayay waxaan isleeyahay wax badan oo dekaddu u baahnayd ayaad qabatay, wax badan oo ay u baahan tahayna way hadhsan yihiin, xilkana kolba qof baa haya waana sunne dawladnimo in la isbedelaa,”ayuu yidhi Maareeyihii hore.
Axmed Yuusuf Dirir, waxa uu sheegay inuu wax weyn ka qabtay nidaamka shaqada ee dekadda Berbera, waxaanu xusay inuu dhismeyaal cusub ku soo kordhiyay.
Maareeyihii hore wuxuu shaqaalaha iyo madaxda laamaha dekada u soo jeediyay inay ula shaqeeyaan sidii ay isaga ula shaqeeyeen.
Maareeyaha cusub ee dekadda Eng, Cali Cumar Maxamed (Cali xoor xoor) oo hadal kooban ka jeediyay madashaasi ayaa balan qaaday inuu xilkan u gudan doono si daacadnimo ku jirto, waxaanu si weyn ugu mahad celiyay Madaxweyne Siilaanyo oo dib ugu soo magacaabay marsadda Berbera.
“Waxaan ku faraxsan nahay inay dekaddii Berbera mar kale masuuliyadeeda dawladdu igu soo celiso, arrintaasna waxaan si weyn ugu mahad naqayaa Madaxweynaha iyo dawladda uu madaxda u yahay oo dhan, waxaan balan qaadayaa inaan si daacadnimo ah ula shaqayn doono oo illaa halka u dambeysa ah,”ayuu yidhi Eng. Cali Xoor Xoor.
Waxa kale oo ka hadlay xafladaasi Badhasaabka gobolka Saaxil Maxamuud Cali Saleebaan (Ramaax) waxaanu sheegay inay maamul ahaan sii sagootiyayaan maareeyihii hore oo uu xusay inuu dedaal badan sameeyay sanad iyo badhkii uu xilka hayay, waxa kale oo uu carabka ku dhuftay inay soo dhawaynayaan maareeyaha cusub Cali Xoor xoor.
Labadii maalmood ee la soo dhaafay waxa ka socday magaalada xeebta ku taalla ee Berbera dhaqdhaqaaqyo kala duwan oo lagu soo dhaweynayo maareeyaha cusub ee deka dda Berbera Cali Xoor xoor oo dadweynaha gobolka Saaxil ay si weyn ugu guuxeen magacaabistiisa.
Waxa ahayd 1 September, 2010 markii maareeyaha hadda xilka wareejinayaa uu munaasibad tan maanta ka mug weyn xilka Maareeyaha dekedda kala wareegay masuulkan isagana maanta xilka ka tirsaday, waxaana haatan laga joogaa muddo ku siman 14 bilood.
Dhinaca kale, markii ay munaasibada Xil wareejintu dhammaatay, waxaa xafiiskiisa shir jaraa’id ku qabtay Madaxa Xisaabaadka ee Dekeda Berbera Cismaan Kabo-weyne oo ayaa sheegay in ay jirto lacag dayn ah oo uu ka tagay maamulkii hore taas oo sida uu sheegay xaddigeedu dhan yahay $118,009 “Boqol iyo Sideed iyo Toban kun iyo Sagaal dollar”halka deynta Shilin-ka Somaliland ee uu maareeyihii hore ka tagay ay dhan tahay 1,388,272,088 SL Shilings “Hal Bilyan, Sadex boqol Sideed iyo Sideetan milyan laba boqol todobaatan iyo Laba Kun & Sideed iyo Sideetan Shilin.” Waxa uu Madaxa Xafiiska Xisaabaadka ee Dekeda Berbera Cismaan Kabo weyne uu intaas ku daray in Dayntaas aanu maareeyihii hore ku darin Xil wareejinta dhacday.
Somalilandpost.net
webmaster@somalilandpost.net