Hargeysa (Slpost) Magaalada Jig-jiga ee caasimadda Dowlad-deegaanka Soomaalida-Itoobiya, ayaa waxaa maanta lagu saxeexay heshiis laga gaadhay Colaadihii ka dhacday deegaanka Daac-dheer oo ku yaalla Xadka ay labada waddan ee Soomaaliya iyo Itoobiya.
Heshiiskan saxiixiisa ayaa waxaa goobjoog ka ahaa Madaxwaynaha DDS Itoobiya Cabdi Maxamuud Cumar iyo Madaxweynaha Maamulka Maamulka Gal-mudug ee Soomaaliya Cabdikariin Xuseen Guuleed.
Qodobbada lagu heshiiyay ayaa waxaa ka mid ah sidii colaada lagu soo afjari lahaa iyo in la saaro guddi labada dhinac ah oo ka shaqeeya Ammaanka deegaannada ku yaalla Xadka Somalia iyo Itoobiya.
“Waxaa wadahadalladii aan u imid magaalada Jigjiga ee DDS dalka Itoobiya, kasoo baxay qodobbo aad muhiim u ah oo ay ka mid ahaayeen; Inaanay qulqulatadii ka dhacday xadka Soomaaliya iyo Itoobiya aanay mar kale soo laaban. In Dadka ku nool Xadka labada dal la walaaleeyo. Inaan Iskaashi ka yeellano innaga Galmudug ah iyo DDS Itoobiya arrimaha xuduudaha iyo wax walba oo amni-darro keeni kara,” ayuu yidhi Madaxweynaha Galmudug Cabdikariin Xuseen Guuleed oo la hadlay BBC-da.
Madaxweyne Guuleed ayaa sidoo kale in qodobbada lagu heshiiyay inay wax-tar u noqon doonaan colaadaha soo laalabtay ee ka dhaca deegaannada xadka ku dhaw, isgaoo sheegay in wixii hadda ka dambeeya ay ku daaali doonaan sidii nabadda ay u xoojin lahaayeen.
Mar la weydiiyay su’aal ah; in deegaannada ay colaaduhu ka dhacaan in dhanka Galmudug ay ku yaallaan iyo inay dhanka Itoobiya xigaan, ayuu ku Jawaabay. “Waxay u badan yihiin dhinaca Itoobiya, laakiin wax dhibaato ah hadda ma jiraan, waxaana ku dadaali doonnaa in aanay mar kale dhibaatadu soo laaban.”
Ugu dambayntii Cabdikariin Guuleed oo la weydiiyay, marka lsaga soo tago heshiiskaan aad saxiideen, waxaa jira dad ay dhibaato kasoo gaartay colaadahaan Dhinicii ay doonaanba ha kasoo jeedaanne, marka maxaad dadkaas la hortagaysaan, ayuu kaga jawaabay.
“Waxaan la hor-tagaynaa inaan nabad u soo qaadnay, inaysan dhibaatada hadda soo gaaray mid ka weyn aysan soo gaarin. Marka labaad waxaan u soo qaadnay in deegaannadoodii ay si nabad ah ku deggenaadaan, dadkii colaaddu saameyeen ee deegaannadii ka barakacayna ay dib ugu soo laabtaan, dib u walaaloobaan, dib u heshiiyaan, dhibaato dambena aysan ka dhex-dhicin, iyadoo Arrintaan ay kawada shaqeyn doonaan guddi gaar ah oo labada dhinac ka socda.”
Somalilandpost.