London (SLpost)- Maamulaha Guud ee Shirkadaha Dahabshiil Group, Cabdirashiid, ayaa sharraxay sida ay shirkadoodu mar kasta u garab taagan tahay bulshada afka soomaaliga ku hadasha meel kasta oo ay joogaan, taas oo uu sheegay in ay mar kasta garab iyo gaashaan u yihiin sidii ay ugu adeegi lahaayeen.
Mr. Cabdirashiid Maxamed Siciid Dahabshiil, waxaa uu ka warramay natiijada barnaamij midha dhalay oo ay shirkadda Dahabshiil maalgalisay kaasi oo ku saabsanaa kulan uu la qaatay 27 aqoonyahan oo wax ka bartay barnaamij ay Dahabshiil gacan ka geysatay oo ku saabsanaa hoggaaminta [Leadership].
“Waxbartaha Soomaaliyeed ee dadkiisa kula noqonaya aqoontiisa waxa uu mudan yahay dhiirrigelin kasta oo ka kaalmaynaysa gaadhidda hadafkiisa waxbarasho – heer kasta oo ay tahayba,” sidaa waxa yidhi Cabdirashiid MS Ducaale, oo lagu waraysatay barnaamijka Martida Makarafoonka ee ka baxa laanta afsoomaaliga ee idaacadda codka maraykanka [VOA], sabtidii la soo dhaafay, kaasi oo uu kaga jawaabay su’aalo ku saabsan doorka ay shirkadda Dahabshiil ka qaadato horumarinta dhinaca cilmiga hoggaaminta bulshada, waxaanu hoosta ka xariiqay in ay u arkeen mid wax ka qaban kara mashaakilaadka waqtigan ku gedaaman bulshada.
“Cilmiga bulshada si toos ah ugu laabanaya ee mashaakillada maanta haysta abbaaraya waa mudan yahay in la garab istaago,” ayuu yidhi Cabdirashid.waxana uu intaa ku ladhay “Ardaydaas markii u horreysey ee aannu kulanno, waxa na mideeyey waxa ay ahayd hadafka waxbarasho ee ay sheegteen oo na soo jiitey. Cid ay yihiin iyo gobollo ay ka yimaaddeen midina muhim nooma ahayn oo ma aan xiiseyneyn – keli ah yoolkooda waxbarasho ee ay ii soo bandhigeen,” ayuu yidhi Cabdirashiid.
Waxa uu Cabdirashiid sheegay in ardaydaas ballanka xilligaa dhex maray uu ahaa inay iyaguna oggolaanshaha Jaamacadaha doontaan oo culays saaraan sidii ay u aqbali lahaayeen (acceptance), shirkadduna uga taageeri lahayd dhammaystirka culuumta ay baranayeen ee saamaynta togan ku leh bulshada. Waxa uu Maamuluhu tibaaxay in ardaydaas, marka ay soo afjaraan aqoonta ay barteen, ay bulshada kula noqon doonaan waxtar saamayn hoggaamineed ku biiriya dhinacyada amniga dhaqaalaha, siyaasadda, IWM, bulshadaa aqoontoodu anfacaysaana aanay ahayn oo qudha tii dhulalka Soomaalida ee bulshada Soomaaliyeed ee, tusaale ahaan, Ingiriiska ku nool lafteedu u baahan tahay wax ka Kaaba ama la hatateeliya mashaakillada badan eek u haysta carrigan. “Halkan aynu joogno ee Ingiriiska laftiisa waxa jira dhallinyaro badan oo xidhan, kuwo dhibaatooyin ka haystaan dhinaca sharciyada, qaar kale oo luqadda ay isku dhibban yihiin. Dhallinyaradan wax aka mid ah qaar hore uga shaqaynayey ama hadda shaqo ka helay hay’ado dadka ka kaalmeeya dhibaatooyinka bulsho eek u taagan. Qaar badani waddankii ayay tageen oo aqoontoodii ay la wadaagaan,” ayuu yidhi. “Maanta qofkii aqoon leh, qofkii dedaala, qofkii karti leh ayaa wax badani u fududaanayaan, cid kalena wax tari kara,” ayuu tilmaamay Cabdirashiid. Waxana uu intaa ku daray “Dhallinyaradan wax baratay, waxa ay tusaale u noqon karaan kumanaan kale oo arkaya in qofkii wax bartaa aanu ku dhici Karin dhibaatooyinka in badan oo dhallinyarada ah hadda haysta, wax wanaagsanna ku soo kordhin karo bulshada uu ka dhashay ama ku dhaqan yahay. Waxa qofka dhallinyarada ahi is tusayaa aqoonta iyo waxbarashada walaalkaa ama walaashaa samaysay maxaad ugu dayan weydey, taas oo uu fahmayo in haddii aanu sidaa yeelin noloshu ciil iyo carcaraaf iyo jeel u horseedi doonto” ayuu yidhi Maamuluhu.