Tixdan Masayr waxa ay soo baxday 20/Disember/2012-ka oo aan ku sugnaa magaalada Jabuuti oo aan kaga qaybgalay afartan-guurada qoraalka farta Soomaaliga…. Waxa ay ka warramaysaa waayo iyo dhacdo martay shakhsi ummadda ka mid ah..
Waa kuwan meerisyadii maansada Masayr:
Mafsuuska gobeed kashkaa mahadshoo
Mudeeca haween naftaa muhatee
Markaan ku bartaan muquurtay dhiboo
Intaan haftay mawjad baan mur dhamoo
Milgii adigaa maamuuska nacoo
Walaac maskaxdayda mashquul ku ladhoo
Tabtii mudacaad garaadka muddoo
Kolkaad maqalkii madluufisay baan
Ka maarmay inaan miciin ku bidee
Majiire xunbaad masayr hirdidoo
Adoo minan qoys masuul dhan ahbaad
Muraad dhagareed u mayrac tagtoo
Mamnuuc Alle diiday baad miratee
Waxaad midig saari midhaheedee
Maalmaa hadhay milicsandoonneeyey
Qacdaan milyan jeer masaalix unkeed
Jawaabta mayaa dhab soo mutuxday
Qalbiga murugadu ku meersantayoo
Sidaan milil cudur la jiifay mudduu
Dharaar midabkaygi muuqu libdhoo
Samii an mudnaa imaad marinoo
Macaanki darraad marwaan ahaydii
Shirqool mug lehbaad ku hoos macmashoo
Lurtaan maray maanso tirin maysee
Majiire xunbaad masayr hirdidoo
Adoo minan qoys masuul dhan ahbaad
Muraad dhagareed u mayrac tagtoo
Mamnuuc Alle diiday baad miratee
Waxaad midig saari midhaheedee
Maalmaa hadhay milicsandoonneeyey
Anoo madi geel ku maala gu’yaad
Malkooyin naqloo man daawada’oo
Xilkii madaxeedna maanka gashoo
Riyaaq la mushaaxa baad mudh tidhoo
Illaa meherkii mashaakiil dhacaa
Dhammaan muruq jiidh hankii murdiyoo
Dartaa magac dumar mas buu igu yoo
Inaan martiyaan ka maagaayoo
Midhkaad ku kacdaa macquul ka fogbee
Majiire xunbaad masayr hirdidoo
Adoo minan qoys masuul dhan ahbaad
Muraad dhagareed u mayrac tagtoo
Mamnuuc Alle diiday baad miratee
Waxaad midig saari midhaheedee
Maalmaa hadhay milicsandoonneeyey
Siciid Maxamuud Gahayr (Hargeysaawi)
Hargeysa