Hargeysa(SLpost)-Waxa guud ahaan gobalada dalka mar labaad shalay laga beeray dhir tiro badan si loo nooleeyo maalinta loo asteeyay wadajirka iyo wax wada qabsiga Somaliland oo ku beegan 19 bil kasta.
waxa Hargeysa dhalinyaro is abaabushay ay dhir ku soo beereen xarunta darbijiifka Maxamed Mooge ee magaaladda Hargeysa, halkaas oo sida oo kalena ay gaadhsiiyeen buug loogu talo galay in ardaydaasi ay wax ku dhigtaan.
sida oo kale magaalooyinka Berbera,Burco,Boorama, Ceerigaabo iyo Laasacaanood ayaa iyagna si sidan la mid ah waxa dhalinyaro is abaabushay ay ku beereen tiro badan oo dhir noocyo kala duwan ah leh, si ay u nooleeyaan maalintan wada jirka iyo wax wada qabsiga Somaliland oo ku beegan 19 bil kasta.
kooxahan dhalinyarada ah oo ka hadlay meelo kala duwan ayaa ka codsaday dhalinyarada Somaliland in ay kula soo biiraan maalinta loo asteeyay inay dadka reer Somaliland wax wada qabsadaan, maalintan ayaa loogu talo galay in lagu taageero deegaanka,dadka tabaalaysan isla markaasna dhalinyarada ay u noqoto xudun ay kaga baraarugaan wax u qabashada dadkooda iyo dalkooda.