Waa qormooyin taxane ah oo aan ku iftiimin doono ma-hadhooyinka xukuumada ee 913kii maalmood ee la soo dhaafay kuna beegay 27/januarey/2013 oo ay 2 sano iyo badh jirsatay xukuumadani.
2- Dagaalkii Kalshaale
Horaantii bishii December ee sanadkii 2010 kii waqtigaas oo xukuumada oo xukuumadu 5 bilood jirsatay, ayaa dhacdo labaad bar madaw kunoqotay xasiloonidii iyo nabadgelyadii dalku, kana dhacday gobalka togdheer iyo buuhoodle.
Waa ugub in beelaha oodwadaagta ahi isku qabsadaan ama ku diriraan bar biyood iyo dhul daaqsimeedka.
Bilawgii dirirta kalshaale waxay lamid ahayd dagaaladii iyo colaadihii soo jireenka ahaa ee ka dhici jiray ciidda somalida. Gundhigeeduna wuxuu ahaa baraago beesha qurilugud ay ka qodeen kalshaale inkastoo waqti danbe la aasay, laakiin u cuntami weyday deegaanka buuhoodle oo u arkayay dhul balaadhsi iyo in dhul xoolahoodu daaqayay la magaaleeyay.
Sida milgaha dhaqankeenu yahay waxaa markiiba u gurmaday oo fadhiga uga kacay damintii colaadaas abuurantay hogaamiyayaal dhaqameed iyo wax garad kale. Balse waxaa markaliya dabkii baxayay gaas ku huriyay hadalkii xaasaasiga ahaa madaxweynaha ee isugu jiray awaamirta uu ciidanka farayay, baaqa iyo hanjabaada ee uu ka horjeediyay fadhigii wada jirka ahaa ee labada aqal ee baarlamaanka.
Khudbadani oo u muuqatay mid ay kujiraan qorshayaal dahsoon waxay kicisay dareenka muwaadiniinta qaarkood, waxay dagaal beeleedkii u rogtay dagaal siyaasadeed.
Sidoo kale ciidanka qaranka oo fadhiisimo ka samaystay ,faranna ka dhigtay goobihii lagu muransanaa. Ayagoo qaadanaya amarkii madaxweynaha oo ah taliyaha guud ciidanka (commander-in-chief).
Udhawaanshiyaha goobta dagaalku ka holcayay xuduudka aynu la wadaagno dalalka somaliya iyo Ethiopia ayaa saaciday inay gacmo siyaasadeed kale dhakhso u soo galaan dhabarkana kasoo riixay beeshii buuhoodle. Ayagoo ka faa idaysanaya hadalkii madaxweynaha.
Qaska jaha wareerka mandaqada geeska afrika iyo guud ahaan qaarada madaw ka taagani ma jirto meel ka badbaaday, walaw melba uu heer ka joogo.
Waxaana sida noolaha yar ee ili maqabatayga ahi u galo unugyada jidhka uu ugu jiraa gobalada, degmooyinka, magaalooyinka iyo goobtay laba qof wax kabadani joogaan. Imaanshiyihii ciidanka qaranka iyo siyaasadii xukuumada ee soo faragalinta beelihii hirdamayay lama mahadin.
Sidaan hore usoo sheegay waxay albaab u noqotay dad la’aa afaaf ay ka burburiyaan midnimada iyo walaaltinimda dadka ku dhaqan dalka.
13-12-2010 ka waxaa dagaal ku soo qaaday ciidankii qaranka ee fadhiisimahaa la dajiyay jabhadaii SSC oo laga hagayay mid kamida caasimadaha gobalka, dana gaar ahaaneed iyo siyaasado qarsoona ka lahayd.
Hadaba khaladkii iyi gafkii ugu waynaa wuxuu dhacay markii ciidanka qaranku ku milmay beelihii dagaalamay iskuna daray si aan kala sooc lahayn jabhadii iyo beel kamida beel beelihii dirirtu dhexmaraysay, ayagoo labada beeloodba ahaayeen reer somaliland. Taasi waxay sii kala fogaysay dadkii deriska ahaa waxayna meel kaga dhacday karaamadii iyo haybadii ciidanka, waxay sidoo kale galaafatay nolasha boqolaal shicib iyo ciidanba leh, waxay somaliland ka dhigtay meel colaado kajiraan.
Waajibaadka ciidanku waa inay difaacaan, ilaaliyaan xuduudka dalka iyo duulaanada debedda kaga imaanaya.
Balse waxaa isweydiin leh markii lageynayay ciidanka aaga labada beelood isku hayaan maxaa laga difaacayay dalka?
Kala dhex galka, xalinta khilaafka iyo daminta shaqaaqadaba waxaa ka shaqaynayay oo ku hawlanaa oodayaasha iyo hogaamiyayaasha duubka u sita nabada iyo dhaqanka. Tan macnaheedu maaha inaan u jeedo in nabad gelyadii dalka oo dhan ilaalinteeda iyo wax ka qabashadeeda aan gacanta u galiyay odayaal haba yaraatee aan wax awood fulineeda lahayn, waxaase shaqada duubku yahay xal u helida iyo kala dhex galka dadka iyo beelaha arimahooda ka baxsan siyaasada iyo dacwadaha maxkamadaha loo gudbiyo.
Sidaa daraareed waxgaradkii iyo cuqaashii isu xilqaamay soo af jarida colaadaa, way dhamayn karaayeen haddii fursad loo siiyo iyo kalsooni buuxdo, waayo xabadi colaad ma damiso.
Dhulkaas (aaga Buuhoodle) waqtigaas waxa uu ahaa dhul somaliland oo ay kala riixanayeen laba beelood oo somaliland u dhashay, balse maanta waxaa sheeganaya maamul!. ……..Lasoco………???
S/Maxamed C/laahi Xasan
Burco,Somaliland.